Exodus 8:8 - Manobo Western Bukidnon OT

⁸ Ne mibpesuǥuan te hadì te Ehipto si Moises wey si Aaron ne migkeǥiyan din te, “Ampù kew ziyà te Nengazen he iawè din heini is menge vakbak kayi te kediey wey te menge etew ku, ne edtuǥutan ku te kegenat is menge zuma niw su wey zan mepemuhat is Nengazen.”

Exodus 8:8 교차 참조

1 Hadì 13:6

Ne migkaǥi haazà is hadì dutun te suluǥuen te Megbevayà te, “Iampù a kenikew ziyà te Nengazen he Megbevayè nu he vewii zin is belad ku.” Umbe mid-ampù haazà is suluǥuen te Megbevayà diyà te Nengazen, ne neulian is belad dutun te hadì.

Salmo 66:3

Keǥiyi niw sikandin te, “He Megbevayà, utew iyan egkein-inuwi is menge vaal nu. Tenged te zekelà he ǥehem nu nekeluhud diyà te etuvangan nu is menge kuntada nu.

Exodus 10:16

Ne tenged dutun migègaanan pesuǥui te hadì si Moises wey si Aaron, ne ke sikandin diyà te kandan te, “Nekesalà a ziyà te Nengazen he iyan Megbevayè niw wey ziyà daan te keniyu.

Exodus 10:17

Umbe, peseyluwa ad maan keniyu tenged te salè ku te minsan kesevaha zà, ne ampù kew ziyà te Nengazen he Megbevayè niw he iawè din heini is ebpekepatey he pigada.”

Exodus 10:18

Ne mid-awà dutun si Moises te hadì, ne mid-ampù diyà te Nengazen.

Exodus 14:5

Ne hein netudtulan sikan is hadì he mibpelaǥuy is menge Israilihanen, nahalin is isip din wey is isip te menge upisyal zin mehitenged te kegenat te menge Israilihanen. Ke sikandan te, “Nesayep kiw su midtuǥutan tew is menge Israilihanen te kegenat ne ǥuntaan kenè en sikandan ebpekepenilbi kenitew.”

Exodus 32:11

Iyan, midhangyù si Moises diyà te Nengazen he iyan Megbevayè din he ke sikandin te, “He Nengazen, maan is utew nu egkepeuki is menge etew nu he impeǥawas nu ziyà te Ehipto pinaaǥi te zekelà he ǥehem nu?

Exodus 5:2

Ne migkaǥi is hadì te, “Hentei is Nengazen he ebpepezumdumahan niw kedì is lalag din he tuǥuti ku is menge kevuwazan ni Israel te kegenat? Wazè ku mekilala is Nengazen ne kenè ku edtuǥutan is menge kevuwazan ni Israel te kegenat.”

Exodus 8:15

Iyan, hein naahà duen te hadì he naawè en sikan is menge vakbak, ne impemezesen din en maan is gehinawa zin, ne wazà sikandin mebpemineg ki Moises wey ki Aaron, sumalà te nekaǥi te Nengazen.

Exodus 8:29

Midtavak si Moises te, “Ǥuntaan ke ed-ewaan ku en sikew, id-ampù ku en sikew ziyà te Nengazen, ne keeselem ed-awà is menge zezeizey he keranapranap diyà te keniyu te langun. Iyan dà is, kinahanglan he kenè key en kenikew ed-umanan edlimbungi pinaaǥi te kenè nu kebpeǥenata kenami emun egenat key en su wey zey mepemuhat is Nengazen.”

Exodus 8:32

Ne zutun he timpu impemezesen en maan duen te hadì is gehinawa zin he kenè din edtuǥutan he mekeǥenat haazà is menge Israilihanen.

Exodus 8:9

Ne migkaǥi si Moises te, “Iyan ke en telaan ke keenu ku sikew id-ampù duma te menge upisyal nu wey te tivuuk he gin-etawan nu, su wey maawà is nenggaun he menge vakbak diyà te keniyu wey ziyà te menge valey niw. Iyan dà egkesamà he menge vakbak is diyà te Wahig he Nilo.”

Exodus 9:27

Ne mibpesuǥuan te hadì si Moises wey si Aaron. Ne ke sikandin diyà te kandan te, “Guntaan netuenan ku en he nekesalà a; netuenan ku he ebpekevenar is Nengazen ne iyan a nesayep wey is menge etew ku.

Exodus 9:28

Iampù niw ziyà te Nengazen he ipeengked din en heini is gerabi he veransì wey giyew. Ne human ku en sikiyu edtuǥuti te kedhipanew; kenè kew en ereg he ed-ubpè pa kayi.”

Exodus 9:33

Ne mid-ewaan ni Moises haazà is hadì, ne migawas sikandin dutun te inged. Imbayew zin is menge velad din te ked-ampù diyà te Nengazen; ne mid-engked is beransì, is kebpenggiyew, wey is uzan.

Numero 21:7

Midhendiyà is menge etew te ki Moises ne ke sikandan te, “Nekesalè key su mezaat is menge lalag dey mehitenged te Nengazen wey kenikew. Iampù nu te Nengazen he iawè din diyà te kenami heini is menge uled.” Umbe mid-ampù si Moises para te menge etew.

1 Samuel 12:19

Migkeǥiyan dan si Samuel te, “Edhangyù key kenikew he, pengemuyù ka ziyà te Nengazen he Megbevayè nu he kenè key pezem mebpematey, su neumanan dà is menge salè dey te kebuyù dey te hadì.”