Exodus 8:6 - Manobo Western Bukidnon OT

⁶ Ne imbayew ni Aaron is belad din he ibpetezù diyà te zivavew te menge wahig diyà te Ehipto, ne zutun migaun is utew midtaman he mahabet he menge vakbak ne giranap dan diyà te tivuuk he Ehipto.

Exodus 8:6 교차 참조

2 Samuel 7:22

“Nengazen he MEGBEVAYÀ, utew ka iyan gemhanan! Wazà iyan ebpekerepeng kenikew wey wazè en minsan hentei pa he Megbevayà gawas kenikew. Wazè dey nezineg he megbevayà he iring kenikew.

2 Cronica 6:14

Ne nengemuyù sikandin, “He Nengazen, Megbevayà te Israel, wazè en Megbevayà he iring kenikew ziyan te langit wey kayi te tanà. Metinumanen ka te saad nu wey layun nu ibpaahà is kebmahala nu te menge suluǥuen nu he edsunud kenikew te tivuuk he ǥehinawa zan.

Salmo 105:30

Utew migerabi is bakbak diyà te tanè dan, ne minsan is menge ruǥu te menge pengulu midselezan te utew gerabi he vakbak.

Salmo 78:45

Mibpehurepunan din sikandan te utew subra he langew para merasey sikandan; impelepew zin is gerabi he menge vakbak he nekezezaat te menge pinemula zan.

Salmo 86:8

Wazà megbevayà he iring kenikew, Nengazen; wazà minsan hentei he ebpekehimu te nengehimu nu.

Salmo 90:2

Hein wazà nu pa limbaǥa is menge vuntud wey is kelibutan, ne Megbevayè ke en, ne iyan ka ǥihapun Megbevayà te wazà pidtemanan.

Exodus 10:2

su wey niw metudtul ziyà te menge anak niw wey menge apù niw is paaǥi te kedsiluti ku te menge Ehiptohanen wey is paaǥi te kebpaahà ku kandan te menge singyal he mibeelan ku, su wey niw metueni he iyan a Nengazen.”

Exodus 15:11

Wazà ed-ezapen te menge etew he ebpekerepeng kenikew, Nengazen. Wazà ebpekerepeng kenikew te kegkewaǥas nu wey kegkemekeǥeǥehem. Iyan ke zà Megbevayà he mibaal te egkein-inuwan he menge vaal!

Exodus 7:19

Ne migkeǥiyan si Moises te Nengazen te, “Keǥiyi nu si Aaron te, ‘Kuwaa nu is tuked nu ne ivayew nu ziyà te menge wahig kayi te Ehipto: dezekelà he wahig he edtudà, beuǥan, kanal, wey menge wahig he mibpeneng, wey ziyà te langun he punduwà te wahig.’ Ne is langun dutun ebaluy he lengesa. Iyan heini egkeulaula ziyà te Ehipto. Minsan is wahig he ziyà te menge teleǥuey he kayu etawa vatu ne egkehimu he lengesa.”

Exodus 9:14

Ne emun kenè nu sikandan edtuǥutan, ne ibpeiseg ku en is keveǥat te menge pigada ku kenikew, ragkes is menge upisyal nu wey is tivuuk he gin-etawan nu su wey nu metueni he wazà ebpekerepeng kedì kayi te tivuuk he kelibutan.

Exodus 9:29

Ne midtavak si Moises te, “Kengkuwan te kebpekeǥawas ku kayi te inged, ibayew ku is belad ku su ed-ampù e en diyà te Nengazen. Ne ed-engked is menge veransì ne egkaawà is giyew, su wey nu metueni he gaked te Nengazen heini is kelibutan.

Isaias 43:10

Sikiyu is menge etew ziyà te Israel, iyan kew menge tistiǥus ku. Mibpilì ku sikiyu he menge suluǥuen ku wey a keniyu mekilala, ne edtuu kew kedì ne egkesavut niw he iyan e zà Megbevayà. Ne wazè en duma he Megbevayà he nehuna kedì etawa ebpeketinundug kedì.

Deuteronomio 32:31

Su is batu he iyan endilungà te menge kuntada tew ne kenà iring te kenitew he endilungà he vatu ne minsan sikandan nesayud kayi.

Deuteronomio 33:26

Wazà iring te Megbevayà he ed-ezapen niw te menge Israilihanen. Ed-untud sikandin te ǥapun is edtavang keniyu. Pinaaǥi te gehem din edseǥazan din is langit.

Deuteronomio 4:35

Impeehè keniyu haazà he menge hitavù su para metueni niw he is Nengazen iyan Megbevayà ne wazè en duma pa.