Exodus 5:6 - Manobo Western Bukidnon OT

⁶ Ne zutun daan he andew, migkeǥiyan te hadì te Ehipto is menge Ehiptohanen he edumala te ebpemenerebahu he menge Israilihanen wey is impepengulu zin kandan he menge Israilihanen te:

Exodus 5:6 교차 참조

2 Cronica 26:11

Duen daan menge sundaru ni Uzia he menge metau he andam he ebpekidtebek. Heini sikandan ne mid-urgenisar wey migrupugrupu ni Jiel he sikritaryu wey ni Maasea he upisyal, he dizalem te kedumala ni Hanania he sevaha te menge upisyal zutun te hadì.

Exodus 1:11

Umbe, duen menge upisyal he midseriǥan te kedlisliseza te menge kevuwazan ni Israel pinaaǥi te kebpeterebehuwa kandan te utew subra, ne zutun netukud dan is menge inged he iyan is Pitom wey Rameses he zutun is menge budiga te hadì te Ehipto.

Exodus 3:7

Migkaǥi is Nengazen te, “Neehè ku is kemereǥenan te menge etew ku ziyà te Ehipto. Nezineg ku is kebuyù dan te tavang tenged te kebpesipelahi kandan te menge edumala kandan te edterebahu, ne edtevangan ku su egkehizuwan ku sikandan.

Exodus 5:10

Ne zutun sikan is menge upisyal te kebantey te ebpemenerebahu wey sikan is menge pengulu zan, midhendiyà te kandan, ne migkaǥi ziyà te kandan te, “Iyan suǥù te hadì is kenè kew en kun human ebeǥayan te reǥami.

Exodus 5:19

Ne zutun te kegkeǥiyi kandan he kenà edterinan is kahabet te menge brik he ebpeveelan kandan te kada andew neisip dan he mereǥen en is kebpekesavuk dan.

Exodus 5:7

“Kenè niw en human beǥayi is menge etew te reǥami he egkaǥamit dan te kebpemaal te menge brik, iyan en human sikandan ibpepen-ahà te reǥami he egkeǥamit dan.

Erubasa 12:10

Is metazeng he etew, ed-elimahan din is menge uyaǥen din, piru is ketulanged te etew he mezaat is menge ulaula zin, ebpekezezaat su seligkep dà.

Numero 11:16

Umbe, migkaǥi is Nengazen diyà te ki Moises te, “Tiǥuma nu is 70 he menge edumala te menge Israilihanen he nekilala nu he nengulu te menge etew, ne ipehendiyè nu sikandan te Tulda he Edtelevukaayan ne ipehitindeg nu sikandan dutun duma kenikew.

Deuteronomio 1:15

Umbe, iyan impezumala ku keniyu is midhimu ku he menge zatù wey menge upisyal he uluwanen wey menge telehuzen he menge etew he ebpuun diyà te menge tribu niw. Duen impezumala ku te 1,000 he etew, ne is duma 100, ne is duma 50, ne is duma pa impezumala ku te 10 he etew.

Deuteronomio 16:18

“Pilì kew te menge zatù wey menge upisyal te kada tribu niw ziyà te langun he inged he ibeǥey keniyu te Nengazen he Megbevayè niw. Ne heini sikandan emun ebpenhusey zan ne kinahanglan he wazà egkevintahaan.

Josue 24:1

Ne zutun midtiǥum ni Josue is langun he tribu te Israel ziyà te Shekem. Ne mid-umew zin is ebpemendumala, menge pengulu, menge zatù, wey menge upisyal te Israel, ne mid-uvey zan diyà te etuvangan te Megbevayà.

Josue 24:4

ne si Isaac ne iyan amey ni Esau wey ni Jacob. Imbeǥey ku ki Esau is buvungan te Seir he kandin he vahin, piru is kepuun niw he si Jacob wey is menge anak din ne midhendiyà te Ehipto.

Josue 8:33

Is langun he menge Israilihanen, duma te menge pengulu zan, menge upisyal, wey is menge zatù ragkes is kenà menge Israilihanen he zuma zan he meǥinged midhitindeg he ebpesinsineruwà. Ne ziyà medhitindeg te teliwazè dan is menge memumuhat (he menge kevuwazan ni Aaron) he mibinting duen te Kavan te Kebpekid-uyun kandan te Nengazen. Is ketengà kayi te menge etew, ne ed-iniyuǥan dan is Buntud he Gerizim ne is sevaha he ketengà, ne ed-iniyuǥan dan is Buntud he Ebal. Si Moises he suluǥuen te Nengazen is midsuǥù kandan te kebaal kayi emun egkeume en is timpu te kedewata zan te kebpenubtuvazi kandan.