Exodus 3:16 - Manobo Western Bukidnon OT

¹⁶ “Genat ke en ne tiǥuma nu is menge edumala te menge kevuwazan ni Israel ne keǥiyi nu sikandan te, ‘Is Nengazen, is Megbevayà he ed-ezapen te menge kebpuun niw he si Abraham, si Isaac, wey si Jacob mibpaahà kediey, ne migkeǥiyan e zin te: Ebpurungan kew zin ebentayi, ne egkeehè din is ed-ulaula keniyu te menge Ehiptohanen.

Exodus 3:16 교차 참조

Genesis 1:7

Ne zutun nehimu is elang ne pinaaǥi kayi impedsivey zin is wahig he ziyà te zizalem wey is wahig he ziyà te zivavew.

Genesis 21:1

Midtentenuzan te Nengazen is migkaǥi zin he edhimuwen din diyà te ki Sara sumalà is insaad din.

Genesis 28:13

Ne ziyà te zivavew zutun te heǥezan, neehè din is Nengazen he edhithitindeg ne migkaǥi sikandin te, “Iyan a sikan is Nengazen, is Megbevayà ni Abraham wey ni Isaac. Ibeǥey ku kenikew wey te menge kevuwazan nu heini he tanà is midhizeǥaan nu.

Genesis 48:15

Ne zutun mibpenubtuvazan din sikandan ke sikandin te, “Berakat he ebpenubtuvazan heini he menge vatà te Megbevayà he ed-ezapen te menge kepuun ku he si Abraham wey si Isaac, kes Megbevayà he mid-elima kedì te tivuuk he untung ku taman en guntaan.

Genesis 50:24

Duen timpu he migkaǥi si Jose ziyà te menge suled din te, “Meǥaan en is kebpatey ku, piru kenà egkehimu he kenè kew en edtevangan te Megbevayà. Ne ibpaawè kew zin ded kayi he tanà, ne ibpeulì kew zin diyà te tanà he impesarig din te menge kepuun tew he si Abraham, si Isaac, wey si Jacob.”

Salmo 102:21

Ne tenged kayi, idsangyew ziyà te Zion he iyan is inged he Jerusalem is menge mibeelan te Nengazen, ne zutun he inged sikandin edeliǥa.

Salmo 33:18

Ebentayan te Nengazen is menge edtahud kandin, he edsarig te kebmahala zin kandan.

Salmo 8:4

ebpekeinsà a ziyà te ǥehinawa ku te hengkey ves is menusiyà, maan is utew nu edseǥipaa? Menusiyè dà sikandin, piru maan is utew nu igkeseeng?

Exodus 1:8

Ne zuen beǥu he nehimu he hadì diyà te Ehipto he wazà mesayud mehitenged ki Jose.

Exodus 13:19

Mid-uwit ni Moises is menge tulan ni Jose su geina te impepenangdù ni Jose is menge suled din su ke sikandin te, “Kenà duwazuwa he edtevangan kew te Megbevayà, ne emun ed-awè kew en kayi te Ehipto kinahanglan he ed-uwiten niw is menge tulan ku.”

Exodus 15:14

Egkezineg heini te zuma he menge nasyun ne egkerkeren sikandan te kegkahandek. Utew egkeherati is menge Filistihanen.

Exodus 17:5

Midtavak is Nengazen diyà te ki Moises te, “Kuwaa nu is tuked nu he inlagkut nu te Wahig he Nilo, ne huna ka te menge etew. Dumaha nu is duma he menge ebmeǥurangen te menge Israilihanen.

Exodus 18:12

Ne si Jetro he enuǥang ni Moises, nemuhat diyà te Megbevayà te pemuhat he edtutungen wey zuma he menge ibpemuhat diyà te Megbevayà. Ne zutun te kemulu zin en ebeeli haazà, ne nekeuma si Aaron wey is langun he menge edumala te Israel. Ne migkaan dan duma ki Jetro zutun te etuvangan te Megbevayà.

Exodus 2:25

Naahà sikandan te Megbevayà ne nehizuwan din sikandan.

Exodus 24:11

Iyan, minsan pa te neehè dan is Megbevayà ne wazè din sikandan himetayi. Migkaan pa ganì sikandan wey mid-inum diyà te etuvangan te Megbevayà.

Exodus 3:2

Ne zutun mibpaahà kandin is belinsuǥuen te Nengazen pinaaǥi te egkeregreg he hapuy ziyà te teliwazà te dezeisey he kayu. Naahà ni Moises haazà ne minsan pa te egkeregreg haazà, iyan, kenà egketutung.

Exodus 3:6

Ne mid-uman sikandin megkaǥi te, “Iyan a sikan is Megbevayà he ed-ezapen te menge kepuun nu, ed-ezapen a ni Abraham, ed-ezapen a ni Isaac wey ed-ezapen a ni Jacob.” Ne zutun midtembunan ni Moises is dagwey zin su egkahandek he ed-ahà te Megbevayà.

Exodus 4:1

Ne midtavak si Moises te, “Hengkey is ebeelan ku emun kenà sikandan edtuu kediey etawa kenà sikandan ebpemineg kediey? Su và dan dà egkaǥi te, kenà tutuu he mibpaahà kenikew is Megbevayà.”

Exodus 4:29

Umbe midhendiyè dan is dezuwa, ne midtiǥum dan is langun he ebpemendumala te menge Israilihanen.

Exodus 4:31

ne midtuu sikandan. Ne hein netuenan dan he igkeseeng sikandan te Nengazen wey naahà te Nengazen is kemeresayan dan, midluhud sikandan te ked-azap kandin.

Exodus 4:5

Ne migkaǥi is Nengazen te, “Pinaaǥi keniyan he singyal ebpeketuu zan he, is Nengazen, he Megbevayà he ed-ezapen te menge kepuun dan he si Abraham, si Isaac, wey si Jacob, iyan mibpaahà kenikew.”

Ruth 1:6

Hein netuenan ni Naomi he edtentenuzan te Nengazen is menge etew zin pinaaǥi te kebeǥayi zin kandan te meupiya he sebpet, ne mibpenines sikandin wey ambey zin su edlikù dan diyà te Juda.