Exodus 24:4 - Manobo Western Bukidnon OT

⁴ Ne insurat ni Moises is langun he nekaǥi te Nengazen. Ne hein nepawà midselemselem sikandin med-enew ne mibaal sikandin te pemuhatà diyà te nevunsuzan duen te vuntud ne impelastar zin is 12 he tedeman he vatu he iyan ibpesavut dutun is 12 he tribu te Israel.

Exodus 24:4 교차 참조

Genesis 12:7

Ne mibpaahà is Nengazen ki Abram ne ke sikandin te, “Heini is tanà, ne ibeǥey ku ziyà te menge kevuwazan nu.” Ne zutun mibaal si Abram te pemuhatà su ebpemuhaten din is Nengazen he iyan mibpaahà kandin.

Genesis 28:18

Utew pa zutun meselem te ked-enew ni Jacob. Migkuwa zin haazà is batu he mid-ulunè din, ne impehitindeg din haazà he tedeman din. Mid-itisan din haazà te lana su wey mehimu he segradu.

Genesis 28:22

Ne heini is batu he impelastar ku kayi he tedeman ku, ebpekepenistiǥus he kayi ka ed-ubpà he lugar. Ne ibeǥey ku kenikew is ikesepulù te langun he ibeǥey nu kediey.”

Genesis 31:45

Umbe migkuwa zutun si Jacob te zekelà he vatu ne impelastar zin he tedeman.

1 Hadì 11:30

Ne midluwas ni Ahia haazà is pendivavew he visti zin ne mibindasbindas din te 12 he vahin.

1 Hadì 18:31

Migkuwa sikandin te 12 he menge vatu he iyan ibpesavut din is 12 he tribu he menge anak ni Jacob, sikan is etew he migngezanan te Nengazen ki Israel.

Ezra 6:17

Kayi te kebpehinunguza zuen te valey te Megbevayà nemuhat sikandan te 100 he tudu he vaka, 200 he meǥurang he meemahan he menge kerehidu, wey 400 he meemahan he nati he menge kerehidu. Nemuhat daan sikandan te 12 he meemahan he menge kambing he pemuhat he para idlumpiyu te kada tribu te Israel.

Nehemias 10:1

Is nehuna he mibpirma iyan si Gubirnedur Nehemias he anak ni Hacalia, wey si Zedekia.

Exodus 17:14

Ne migkaǥi is Nengazen diyà te ki Moises te, “Isurat nu heini zuen te libru para kenà heini melipati ne ipehibelu nu heini ki Josue: Edezeetan ku is menge Amalikanhen.”

Exodus 17:15

Ne mibaal si Moises te pemuhatà he migngezanan din te, “Iyan Bendirè ku te Kezeeǥan is Nengazen.”

Exodus 21:1

Migkaǥi is Nengazen diyà te ki Moises, “Iyan heini menge sulunuzen he ibpetuman nu te menge Israilihanen:

Exodus 24:7

Ne migkuwa zin sikan is Libru te Kebpekid-uyun te Megbevayà ne mibasa zin diyà te etuvangan te menge etew. Ne midtavak sikandan te, “Ebeelan dey is minsan hengkey he nekaǥi te Nengazen; ebpezumdumahan dey sikandin.”

Exodus 28:21

Is kada sevaha zuen te sepulù wey dezuwa he menge vatu, ne id-ukir zutun is sevaha zaan he ngazan te sevaha he anak ni Jacob, su iyan haazà edriprisintar te sepulù wey dezuwa he ebpuunan te menge kevuwazan ni Israel. Is ked-ukira zutun ne iring te ked-ukir te para ibmarka.

Exodus 34:27

Migkeǥiyan si Moises te Nengazen te, “Isurat nu heini he menge lalag su iyan heini paaǥi te kebpekid-uyun ku kenikew wey te tivuuk he menge Israilihanen.”

Isaias 19:19

Dutun he timpu ebengunen is pemuhatà para te Nengazen diyà te teliwazà te tanà he Ehipto, ne ibpelastar zaan is tedeman he vatu ziyà te dulunà kayi.

Leviticus 24:5

Baal kew te 12 he vuuk he supas, he is kada sevaha mibeelan puun te heepat he kilu he meupiya he kelasi te herina.

Numero 17:2

“Keǥiyi nu is menge Israilihanen he mebeǥey te tuked diyà te kenikew is kada pengulu te tribu. Ne pesurati heini te kada ngazan dan. 12 langun he tuked.

Deuteronomio 31:9

Insurat ni Moises heini he menge suǥù ne imbeǥey zin diyà te menge memumuhat he menge kevuwazan ni Levi, he iyan ed-uwit duen te Kavan te Kebpekid-uyun te Nengazen, wey ziyà te langun he ebpemendumala te Israel.

Josue 4:20

Ne zutun punduka ni Josue sikan is 12 he menge vatu he impekuwa zin puun te Wahig he Jordan.

Josue 4:5

“Hendiyè kew te teliwazà te wahig etuvangan duen te nesevukan te Kavan te Kebpekid-uyun te Nengazen he Megbevayè niw. Is kada sevaha keniyu ne megkuwa te sevaha he vatu he ed-uwiten din, sevaha te kada tribu te Israel.