Exodus 13:5 - Manobo Western Bukidnon OT

⁵ Is tanà te menge Canaanhen, menge Hitihanen, menge Amorihanen, menge Hivihanen wey menge Jebusihanen, iyan kes tanà he impenangdù te Nengazen diyà te menge kepuun niw he ibeǥey zin keniyu, su heini he tanà, ne meupiya wey uuzaran. Ne emun ibpeseled kew en te Nengazen dutun he tanà, tumana niw heini he sulunuzen kayi he vulan te egkehuna he vulan te tuig:

Exodus 13:5 교차 참조

Genesis 26:3

Kayi ke zà ubpà dèpa su edumahan ku sikew wey edtuvazan ku sikew. Ibeǥey ku heini kenikew wey ziyà te menge kevuwazan nu heini is langun he tanà. Edtumanen ku is pesarig ku te amey nu he si Abraham.

Genesis 50:24

Duen timpu he migkaǥi si Jose ziyà te menge suled din te, “Meǥaan en is kebpatey ku, piru kenà egkehimu he kenè kew en edtevangan te Megbevayà. Ne ibpaawè kew zin ded kayi he tanà, ne ibpeulì kew zin diyà te tanà he impesarig din te menge kepuun tew he si Abraham, si Isaac, wey si Jacob.”

1 Cronica 1:15

menge Hivihanen, menge Erekihanen, menge Sinihanen,

Exodus 12:24

Tumana niw heini he sulunuzen wey te menge kevuwazan niw taman te taman.

Exodus 13:10

Umbe, tumana niw heini kada egkeuma is kedtumana zuen te kada tuig.

Exodus 13:11

“Emun diyè kew en te tanà te menge Canaanhen su ibeǥey en te Nengazen haazà diyà te keniyu sumalà is impenangdù din diyà te menge kepuun niw,

Exodus 3:17

Nenangdù sikandin he ibpeǥawas kew zin puun te menge kemereǥenan he nengeseǥazan niw zini te Ehipto, ne ziyè kew zin ed-uwita te tanà te menge Canaanhen, menge Hitihanen, menge Amorihanen, menge Pirisihanen, menge Hivihanen wey menge Jebusihanen–tanà he egkeerubasa he ebpunan te edtudà he ǥatas wey teneb.’

Exodus 3:8

Ne umbe mibulus a su edlibriyen ku sikandan te menge pesipala kandan te menge tig-Ehipto, wey ibpaawè ku sikandan diyà te Ehipto ne ziyè ku sikandan ibpeubpà te tanà he meupiya wey meluag, tanà he egkeerubasa he ebpuunan te edtudà he ǥatas wey teneb he iyan ed-ubpaan te menge Canaanhen, Hitihanen, Amorihanen, Pirisihanen, Hivihanen wey Jebusihanen.

Exodus 32:13

Tentunuzi nu is menge suluǥuen nu he si Abraham, si Isaac wey si Jacob; tentenuzi nu is meheǥet he penangdù nu ziyà te kandan he ibeǥey nu kandan is utew mahabet he kevuwazan su ebpekeiring te kahabet te menge vituen diyà te zivavew, ne id-amin nu ibeǥey zutun te menge kevuwazan dan is tanà he ingkepenaad nu he ibeǥey ziyà te kandan, ne egkepengevilin dan haazà te taman te taman.”

Exodus 33:1

Ne migkeǥiyan en maan te Nengazen si Moises te, “Awè ke en kayi he lugar, ne zumaha nu sikan is menge etew he impeǥawas nu puun te Ehipto, ne hendiyè kew en te tanà he insaad ku he ibeǥey ku ziyà te ki Abraham, ki Isaac wey ki Jacob wey ziyà te menge kevuwazan dan.

Exodus 34:11

Tumana nu is menge suǥù he ibeǥey ku kenikew ǥuntaan he andew. Emun edlaus kew en, edsegseǥen ku is menge Amorihanen, menge Canaanhen, menge Hitihanen, menge Pirisihanen, menge Hivihanen wey menge Jebusihanen puun duen te tanà he insaad ku keniyu.

Exodus 6:4

Midhimu ku is kebpekid-uyun ku kandan, he ibeǥey ku kandan is tanà te Canaan he iyan neubpaan dan dutun te kegkelumelengyawè dan.

Exodus 6:8

Ne ziyè ku sikiyu ed-uwita te tanà he insaad ku he ibeǥey ku ziyà te ki Abraham, ki Isaac, wey ki Jacob. Ibeǥey ku haazà keniyu, ne egkaangken niw en. Iyan a sikan is Nengazen.’ ”

Jeremias 11:5

Ne zutun, edtumanen ku is impenaad ku ziyà te menge kepuun niw he ebeǥayan ku sikandan te meupiya wey selebpeten he tanà. Ne haazà is tanà, iyan is tanè niw ǥuntaan.’ ” Midtavak a te, “Berakat he metuman, Nengazen.”

Jeremias 32:22

Imbeǥey nu kandan heini is meupiya wey selebpeten he tanà he insaad nu is kebeǥaya nu zuen diyà te menge kepuun dan.

Ezekiel 20:6

Ne zutun daan he timpu nenangdù a he ibpeǥawas ku sikandan puun te Ehipto ne ed-uwiten ku sikandan diyà te tanà he mibpilì ku para kandan–meupiya wey selebpeten he tanà, kineupiyahan te langun he tanà.

Leviticus 20:24

Ne sumalà te nekaǥi ku keniyu egkaangken niw is tanè dan. Ibeǥey ku keniyu heini is meupiya wey selebpeten he tanà su wey niw maangken. Iyan a kes Nengazen he Megbevayè niw he midhimu keniyu he segradu puun te zuma he menge etew.

Numero 11:12

Menge anak ku ve sikandan? Iyan e ve mid-anak kandan? Maan is egkeǥiyan a kenikew he ed-eturen ku sikandan iring te ked-atur te perevantey te vatà he edsepipiyen din wey ibpesusu zin. Ne ibpezuma nu sikandan kedì diyà te tanà he insaad nu ziyà te menge kepuun dan?

Numero 13:27

Migkeǥiyan dan si Moises te, “Midhendiyè key te lugar he impesusi nu kenami, meupiya heini wey selebpeten he tanà. Heini zed is nekuwa zey he menge prutas.

Numero 14:16

‘Wazà mekehimu is Nengazen he ed-uwit te menge Israilihanen diyà te tanà he insaad din kandan, umbe mibpenhimetayan din en sikandan diyà te sibsivayan.’ ”

Numero 14:30

he ebpekeseled duen te tanà he impenangdù ku he ibeǥey keniyu, gawas ki Caleb he anak ni Jefune wey ki Josue he anak ni Nun.

Numero 32:11

‘Geina te wazè dan medsunud kedì te ebpuun diyà te gehinawa zan, ne wazà minsan sevaha kandan te ebpenuiǥen te 20 pehendiyà te metikang he migawas puun te Ehipto he ebpekaahà duen te tanà he insaad ku ki Abraham, ki Isaac wey ki Jacob

Deuteronomio 12:29

“Ebpengelinteuwan te Nengazen he Megbevayè niw he mezezeeti niw is menge etew ziyà te menge nasyun he edsurungen niw. Segseǥa niw is menge meǥinged duen ne ubpai niw is lugar zan.

Deuteronomio 19:1

“Emun edezeetan en te Nengazen he Megbevayè niw is menge etew ziyà te menge nasyun he ibeǥey zin keniyu is tanè dan, wey egkesegseg niw en sikandan ne ziyè kew en ebpemen-ubpà te menge inged dan wey menge valey zan,

Deuteronomio 26:1

“Emun egkaangken niw en sikan is tanà he ibeǥey keniyu te Nengazen he Megbevayè niw wey niw mepengevilin, ne zutun kew en he meǥinged,

Deuteronomio 7:1

“Emun ed-uwiten kew en te Nengazen he Megbevayè niw zutun te tanà he edselezan niw su ed-engkenen niw, ibpesegseg din keniyu is menge etew ziyà te pitu he nasyun he edhuna he mahabet wey edhuna he gehemanen kenà sikiyu: is menge Hitihanen, menge Girgasihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.

Josue 24:11

“Ne midlayun kew te Wahig he Jordan ne nekeuma kew ziyà te Jerico. Nekidtebek keniyu is menge tig-Jerico, wey is menge Amorihanen, menge Pirisihanen, menge Canaanhen, menge Hitihanen, menge Girgasihanen, menge Hivihanen, wey menge Jebusihanen. Piru nezaag niw sikandan pinaaǥi kedì.