Daniel 7:4 - Manobo Western Bukidnon OT

⁴ Is nehuna he langgam, ne henduen be te erimaung, piru zuen din pakpak he pakpak te kulaǥu. Ne zutun te kedtengteng ku, midtamped is pakpak din. Ne impehitindeg sikandin iring te etew ne mibeǥayan te isip he iring te isip te etew.

Daniel 7:4 교차 참조

2 Samuel 1:23

Utew mibmahal te menge Israilihanen si Saul wey si Jonatan su nesuatan dan sikandan. Wazè dan mekedsuwey taman te kemetayen dan. Diyà te tebek, henduen be te meǥaan pa sikandan te vanug wey mezesen dan pa te erimaung.

Job 25:6

iyan pe be is etew he utew minus is bali zin su iring dà te tetaru.”

Salmo 9:20

Ipeǥezam nu, Nengazen, is gehinawa zan te kegkahandek kenikew. Ipeisip-isip nu kandan he menge etew zà sikandan.

Jeremias 25:38

Is Nengazen, egkeiring te erimaung he migawas puun te elesè din su ebpen-ahà te edewiyen din. Egkehimu is tanà he mekevulungbulung tenged te tebek, wey tenged te utew kegkepauk te Nengazen.

Jeremias 4:13

Tengteng kew! Ebpekeume en is kuntada tew he iring te ǥapun. Is menge kerwahi zin, henduen be te eribpures, ne is menge kudè din, edhuna pa he elistu te menge mendereǥit. Mekehizuhizu kiw! Su egkezeetan kiw en.

Jeremias 4:7

Edsurung en is ebpendezaat te menge nasyun he henduen be te erimaung he migawas puun te elesè din. Migenat en sikandin puun te inged din su edezeetan din is tanè niw. Ebengkaǥen din is menge inged niw taman te kenè en egkehimu he ed-ubpaan.

Jeremias 48:40

Mibpedayun pa megkaǥi is Nengazen te, “Ehàa niw man! Is kuntada te menge tig-Moab neiring te kulaǥu he midlayang he edawi kandan.

Jeremias 49:19

Edtik-ew a edsurung diyà te Edom he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Edom is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì?

Penhulùhulù 4:19

Meǥaan pa te menderaǥit is menge kuntada zey he edal-as kenami. Edel-asen key zan taman te menge vuvungan. Ne minsan diyè key te sibsivayan ne zutun daan sikandan is edtaǥad he ed-etaki kenami.

Ezekiel 17:3

ne keǥiyi nu sikandan he iyan a, is Nengazen he MEGBEVAYÀ migkaǥi kayi: duen dekelà he kulaǥu he midlayang pehendiyà te Lebanon. Meluag is menge pakpak din wey merapung is bulvul zin he nekedseselekawà is barek. Ne midlatun heini ziyà te purù te kayu he sidru,

Ezekiel 28:2

“Sikew is etew, keǥiyi nu is pengulu te Tyre he iyan a, is Nengazen he MEGBEVAYÀ migkaǥi te: Tenged te kebpelavew nu migkaǥi ka he sevaha ka he megbevayà he mibpinuu ziyà te pinuuwà te hadì he ziyà te teliwazà te zaǥat. Piru iyan benar is, minsan mid-isip nu he metau ka iring te megbevayà, ne kenè ka Megbevayà, kekenà, etew ke zà.

Ezekiel 28:9

Ne ed-ahaan ta ke ebpekekaǥi ke pa ǥihapun diyà te etuvangan te menge edhimatey kenikew te Megbevayè ka. Etew zà is ked-isipa zan kenikew ne kenà Megbevayà.

Daniel 2:38

Mibpeveyveyaan din kenikew is menge etew, menge langgam, menge tagbis, diyà te minsan hendei. Ne iyan ka impetug-iring duen te vulawan he ulu zuen te ledawan.

Daniel 4:36

“Ne hein midlikù en kayi te kediey is meupiya he ked-isip-isip ne inlikù daan kayi te kediey is dengeg wey ventuǥan te hadì. Midawat e en maan duen te menge upisyal ku wey menge megsesambag ku, ne edhunè a pa he mekeǥeǥehem kenà duen te nehuna he kedhadì ku.

Daniel 7:12

Ne sikan is nesamà he tetelu he langgam midhawì diyà te kandan is keǥehem dan piru intuǥut kandan is kegkeuyag-uyag seled te mevavà he timpu.

Daniel 7:5

Is ikezuwa he langgam ne henduen be te bir. Midhitindeg heini pinaaǥi te huziyanan he menge paa zin, ne ebangà heini te tetelu he ǥusuk he nekepetug-elang diyà te menge ngipen din, ne zuen lalag he edhenduen te, “Hala! Purung ka pekahantey te usa.”

Deuteronomio 28:49

“Ketau te Nengazen he surunga kew te sevaha he nasyun he ziyà te utew meziyù, he kenè niw egkesavut is kineǥiyan dan. Iring dan te kulaǥu he edawi zutun te kedsurunga zan keniyu.