Amos 8:11 - Manobo Western Bukidnon OT

¹¹ Migkaǥi pa is Nengazen he MEGBEVAYÀ te, “Egkeuma is timpu he ibpaaǥi ku is bitil ziyà te tanè niw. Piru kenà heini vitil te keenen etawa kegkemezahi te wahig, kekenà, bitil heini wey kegkemezahi te kebpemineg te menge lalag ku.

Amos 8:11 교차 참조

2 Cronica 15:3

Meluǥayad he timpu ne wazà kilelalaa te menge Israilihanen is tutuu he Megbevayà; wazè dan menge memumuhat he mibpenurù kandan, wey wazè dan menge kesuǥuan.

Salmo 74:9

Wazè en tuus te kebpekiduma nu kenami; wazè en nesamà duen te ebpemeneuven nu, ne wazè en netau kenami ke keenu egkeengked heini is pesipala kenami.

Erubasa 29:18

Emun wazà lalag te Megbevayà he ebpenurù te sevaha he inged, wazà kayi kegkelinew. Utew zeyzey is menge etew he edtuman te menge ibpenurù te Megbevayà.

Isaias 5:6

Ebpesegdanen ku en heini he pemuleey. Kenè ku en ebpenempezen is subpang etawa edterebehuwen is tanà duen. Etuvuan dà heini te menge sagbet wey duǥiyen he dezeisey he kayu. Ne egkeǥiyan ku is menge ǥapun he kenè dan heini petiǥisi te uzan.”

Ezekiel 7:26

Egkeumahan sikandan te ebpekedtutundug he kezeetan wey mezaat he menge tudtul. Ebpepenudtul zan pezem te menge ebpeneuven piru kenà sikandan egketudtulan. Kenè en ibpenurù te menge memumuhat is mehitenged te kesuǥuan, ne wazè en daan penurù he ebpuun diyà te menge pengulu.

Hoseas 2:3

Emun kenà sikandin ed-engked ne edluwasan ku sikandin ne egkelevasan iring hein in-anak sikandin. Edhimuwen ku sikandin he iring te sibsivayan etawa disirtu, ne ebpatey sikandin te kegkemezahi.

Micas 3:6

Tenged te kedtezina niw te menge etew ku ne kenè kew en ebpekelawas, wey kenè kew en ebpekepenagnà. Henduen be te ziyè kew te utew merusirem he zutun wazè niw egkaahà.

1 Samuel 28:15

Migkeǥiyan ni Samuel si Saul te, “Maan is midsamuk a kenikew pinaaǥi te ked-umawa nu kedì?” Midtavak si Saul te, “Duen dekelà he prublima ku. Mibpekidtebek kedì is menge Filistihanen ne mid-iniyuǥan a te Megbevayà. Wazè e zin en tevaka, minsan pinaaǥi zà te menge ebpeneuven wey te menge teǥeinep. Umbe impeumew ku sikew su wey a kenikew mekeǥiyi ke hengkey is ebeelan ku.”

1 Samuel 28:6

Ne zutun mid-insaan din is Nengazen, ne wazà sikandin tevaka te Nengazen minsan te teǥeinep dà, wey pinaaǥi te Urim wey te menge ebpeneuven.

1 Samuel 3:1

Dutun he menge andew he si Samuel ebpenilbi en te Nengazen, dizalem sikandin te kedumala ni Eli, ne mezelag dà ebpekidlalag is Nengazen, wey deisey zà is egkengelewasan.