Amos 6:11 - Manobo Western Bukidnon OT

¹¹ Benar iyan, emun iyan en ebmandù is Nengazen, edrunteken din is langun he menge valey, deisey se zekelà.

Amos 6:11 교차 참조

2 Hadì 25:9

Mibinsulan din is baley te Nengazen, is turuǥan, is langun he menge valey ziyà te Jerusalem, wey is langun he impurtanti he menge bilding.

Salmo 105:16

Mibpengelinteuwan te Megbevayà he mehitavù is bitil ziyà te Canaan. Mid-amin din kuwaa is langun he keuyaǥan dan.

Salmo 105:31

Pinaaǥi te suǥù te Megbevayà, duen utew gerabi he langew wey kutu ziyà te tanè dan.

Salmo 105:34

Pinaaǥi te suǥù din, nekeuma is utew gerabi he terapan he kenè en egkevilang.

Megwewali 10:18

Emun igkepeǥuli te etew is kebpurung ta atep te valey zin, ne edtiǥisan heini ne egkewaǥey.

Isaias 13:3

Midsuǥù ku en is pinilì ku he menge sundaru te kedsilut te menge etew he egkeepesan ku. Heini he menge sundaru nengelipey sikandan su edsarig dan he edhimuwen ku heini he kedsilut.

Isaias 55:11

Ne iring daan keniyan is menge lalag he egkeǥiyen ku, kenà egkehimu he wazà kayi pulus, kekenà, edtumanen kayi is pelanu ku; edlampus heini para meulaula is tuyù te kebpetudtula ku kayi.

Hoseas 13:16

Ereg he edsilutan is menge tig-Samaria tenged te kebpekidsukulè dan kediey te Megbevayè dan. Egkeǥerà sikandan tenged te tebek. Edrunteken is dezeisey he menge anak dan, ne edsirian is meǥingey he menge vahi kandan.”

Amos 3:15

Edrundusen ku is menge valey zan he para te timpu te meǥenew wey menge valey he para te timpu te meinit. Edrundusen ku zaan is mahalen he menge valey zan. Umbe mahabet is menge valey zan he egkengerundus. Iyan a, is Nengazen, is migkaǥi kayi.”

Amos 5:11

Midaagdaag niw is menge pubri ne midteǥel niw he mebeǥey ziyà te keniyu te neraǥun dan. Umbe kenè niw en egkeubpaan is dezekelà he menge valey he mibangun niw, wey kenè kew en ebpekeinum te vinu he ebpuun diyà te impemula niw he menge paras.

Amos 6:8

Nenangdù is Nengazen he MEGBEVAYÀ, kes Megbevayà he Mekeǥeǥehem. Ke sikandin te, “Igkeepes ku is kebpelavew te menge kevuwazan ni Jacob, wey midrewakan ku is melig-en he menge vahin te inged dan. Umbe ibeǥey ku ziyà te menge kuntada is inged dan wey is langun he taǥù kayi.”

Amos 9:1

Migkaǥi si Amos te, “Neehè ku is Nengazen he midhitindeg diyà te pemuhatà he ke sikandin te, ‘Pukpuka nu is in-ulu keniyan te menge tukud te valey ku su wey merundus is atep din ne wey merundusi is menge etew. Ne is kenà ebpatey kandan ne edhimetayan ku pinaaǥi te tebek. Wazà minsan sevaha kandan he ebpekelikey etawa ebpekepelaǥuy.

Amos 9:9

Benar iyan, emun iyan a ebmandù, ne ed-eyaǥen ku sikiyu is menge etew te Israel duma te menge etew ziyà te langun he menge nasyun, iring te ked-ayag te trigu. Iring te kenà edlahus diyà te eyagan is nekesahug he menge vatu, ne kenà daan ebpekeliyu te silut is menge lalung keniyu, kekenà,

Nahum 1:14

Iyan heini migkaǥi te Nengazen diyà te menge tig-Asiria: “Id-awè ku is menge kevuwazan niw wey edezeetan ku is ledawan he kayu etawa mital ziyà te simbahan he ed-ezapan niw te menge ed-ezapen niw. Ed-endamen ku en is menge edlevengan keniyu su kenè kew ereg he egkeuyag.”

Zacarias 14:2

Su edtiǥumen te Nengazen is menge etew ziyà te langun he menge nasyun su wey zan mekepekidtebek diyà te Jerusalem. Ed-eǥawen dan heini he inged, egkuwaan dan is menge azen diyà te menge valey, ne edleyuǥen dan is menge vahi. Ed-uwiten dan diyà te zuma he lugar is ketengà te menge meǥinged keniyan he inged. Piru is duma, egkesamà keniyan te inged.

Malakias 1:4

“Emun egkaǥi is menge Edomanhen he menge kevuwazan ni Esau te, ‘Minsan nezeetan en is ubpaan dey, ne ed-umanan dey heini ebenguna,’ iyan a, kes Nengazen he Mekeǥeǥehem, egkaǥi te, ‘Minsan ed-umanan dan ebenguna haazà is inged dan ne edrundusen ku zed gihapun. Egngezanan sikandan he “mezaat he nasyun” wey “menge etew he layun dà igkeepes te Nengazen.”