Amos 5:16 - Manobo Western Bukidnon OT

¹⁶ Su iyan heini migkaǥi te Nengazen he Megbevayà he Mekeǥeǥehem: “Egkeuma is timpu he zuen ebpemenineǥew wey ebpemen-erang diyà te menge zalan niw wey menge pelasa. Is menge perevasuk ibpetawag su wey zan mesineǥawi is menge minatey zuma te menge etew he edsuhulan wey mekesineǥew.

Amos 5:16 교차 참조

2 Cronica 35:25

Mibaal si Jeremias te menge penhulùhulù he tedeman para ki Josia, ne taman en guntaan is kegkentaha kayi te menge perekanta. Heini he menge penhulùhulù ne layun egkentaha ziyà te Israel, ne ingkesurat diyà te menge penhulùhulù.

Isaias 15:8

Is kegkezineǥa te ked-erang dan ne taman en te zulunà te Moab wey Eglaim wey taman te Beer Elim.

Isaias 22:12

Dutun he andew mid-umew kew te Nengazen he MEGBEVAYÀ he Mekeǥeǥehem su ibperuǥur kew zin wey ibpesineǥew. Migkeǥiyan kew zin he ipetuusi niw is kedlalew niw pinaaǥi te kepevangul niw wey kebivisti niw te saku.

Jeremias 4:31

Nezineg ku is erang wey zag-es, he iring te erang wey zag-es te vahi he ed-anak te penganey. Erang heini te menge meǥinged diyà te Jerusalem he kenè en ebpekeǥehinawa is ebpenepayà he egkaǥi te, “Mekehizuhizu key; henduen be egkevidtawan key en. Su heeyan en is menge kuntada zey he edhimatey kenami.”

Jeremias 9:10

Migkaǥi si Jeremias te: Edlelendag a tenged te menge vuntud; edlalew a tenged te menge penebtavà diyà te sibsivayan. Su egkehimu en heini he mekevulungbulung ne wazè en edsaǥad kayi. Kenè en egkezineg kayi is ked-engà te menge vaka, ne mibpekeziyù en is menge tagbis wey minsan is dumezaas he menge langgam.

Jeremias 9:16

Ibpeyapat ku sikandan diyà te zuma he menge nasyun he wazè dan duen hanew wey is menge kepuun dan. Ibpezal-as ku sikandan te menge kuntada zan taman te egkaamin sikandan egkepatey.”

Hoseas 4:3

Tenged kayi mibmemaza is tanè niw ne ebpematey is langun he meǥinged duen, ragkes is langun he uyaǥen he edhipanew, edlayang, wey edlayewlayew.

Joel 1:11

Sikiyu is menge perevasuk, keseeng kew! Sikiyu is ed-atur te pemuleey te paras, habet kew sineǥew! Su wazè en menge abut diyà te menge vevesukà; wazè en menge trigu wey menge barli.

Joel 1:14

Keǥiyi niw is menge edumala te Juda wey is langun he meǥinged kayi, he medtiǥum dan is langun diyà te valey te Nengazen he Megbevayè niw ne mebpuasa zan. Mebuyù dan te tavang diyà te Nengazen.

Joel 1:15

Egkeuvayan en is andew te kebpendezaat te Nengazen he Mekeǥeǥehem.

Joel 1:8

Sineǥew kew iring te raǥa he mibivisti te saku te kebpaahà he ingkeseeng din is kebpatey te ebpengesawa kandin.

Amos 3:13

Migkaǥi is Nengazen he MEGBEVAYÀ, kes Megbevayà he Mekeǥeǥehem, ke sikandin te, “Pemineǥa niw heini is egkeǥiyen ku ne tudtula niw ziyà te menge kevuwazan ni Jacob:

Amos 5:27

Umbe, ibpevihag ku sikiyu ziyà te hunaan pa te Damascus.” Iyan heini migkaǥi te Nengazen he migngezanan te Megbevayà he Mekeǥeǥehem.

Amos 8:10

Edhimuwen ku he sineǥawan is kedlipey niw emun timpu te pista, ne edhimuwen ku he hulùhulù is menge kegkanta niw. Ebpevistiyan ku sikiyu te saku wey edsuǥuen ku he mebpevangul su wey niw ikepaahà is kedlalew niw, iring te menge ǥinikanan he edsineǥew tenged te kebpatey te vudtung he anak dan. Piru edhuna pa he mesakit is ketepusan kayi he menge silut.”

Amos 8:3

Dutun he andew te kedsiluti kandan, is melipayen he kegkanta ziyà te valey ku egkehimu he sineǥawan su mahabet is ebpekepeyapat diyà te minsan hendei he ebpemematey. Ne zutun wazè en egkezineg he keǥurub. Iyan a, is Nengazen he Megbevayà, is migkaǥi kayi.”

Micas 1:8

Migkaǥi si Micas te, “Tenged te kegkezeeti te Samaria, ne edisineǥew a wey ebpenhulùhulù a. Edhipanew a he wazà apid te paa ku wey kenà a egkukumbalà su ibpeehè ku is kedlalew ku. Edtaul a iring te leew he asu wey ed-iringan ku is kegkaǥi te ekang.

Micas 2:4

Dutun he andew edsudien kew te menge etew pinaaǥi te mekeseseeng he penhulùhulù he edhenduen te, ‘Mibpurungan key zezeeti! Migkuwa te Nengazen is tanè dey ne imbeǥey zin diyà te menge limbungan.’ ”