Amos 5:11 - Manobo Western Bukidnon OT

¹¹ Midaagdaag niw is menge pubri ne midteǥel niw he mebeǥey ziyà te keniyu te neraǥun dan. Umbe kenè niw en egkeubpaan is dezekelà he menge valey he mibangun niw, wey kenè kew en ebpekeinum te vinu he ebpuun diyà te impemula niw he menge paras.

Amos 5:11 교차 참조

Job 20:19

Su midaagdaag din is menge pubri wey mibey-anan din is ebpemenlised. Mid-angken din is menge valey he kenà kandin.

Isaias 16:10

Naawà is kelipey wey kegkebibu tenged te zekelà he selebpeten he menge vevesukà. Wazè en egkanta etawa ed-ugyab diyà te menge pemuleey te paras. Wazè en egkeres te paras he para ebeelan he vinu. Impeengked en te Nengazen is kebpekeugyab dan.

Ezekiel 26:12

Ed-eǥawen dan is menge ketiǥeyunan niw wey menge velegyè niw. Edrundusen dan is menge verengbeng niw wey mekempet he menge valey niw, ne idtimbag dan diyà te zaǥat is menge vatu, menge kayu, wey is langun he egkesamà te nengevengkag.

Ezekiel 34:21

Su sikiyu is menge melambù, eduǥehungen niw zà wey edsungayen is meluya he menge kerehidu taman te ebpekepekeziyù sikandan.

Hoseas 9:2

Piru ziyà te huziyan he timpu egkaawà diyà te keniyu is menge trigu wey vinu.

Leviticus 26:16

iyan heini ebeelan ku keniyu: Egketeranta kew te kegkahandek su ebpeeǥiyan ku sikiyu te menge zaru he kenà egkeulian wey dateng he ebpekezezaat te menge mata niw wey menge lawa niw. Ebpemula kew ne kenà heini ebpulus diyà te keniyu su edsurungen kew te menge kuntada niw ne egkeenen dan is menge abut niw.

Amos 2:6

Iyan heini migkaǥi te Nengazen mehitenged te Israel: “Tenged te kedtulung kebaal te salà te menge tig-Israel, edsilutan ku sikandan. Su imbelegyè dan he menge uripen is menge etew he wazà mekesalà, tenged dà te utang dan. Mibeelan dan heini ziyà te menge pubri minsan nekeutang dà diyà te kandan te senge paris he sandalyas.

Amos 2:7

Edèdaaǥen dan is menge pubri wey wazè dan beǥayi te hustu he kukuman. Neulaula ziyà te kandan, he is amey wey is anak din he maama ebpekidhilavet te sevaha zà he vahi. Tenged kayi mibpendezeisey zan is waǥas he ngazan ku.

Amos 3:15

Edrundusen ku is menge valey zan he para te timpu te meǥenew wey menge valey he para te timpu te meinit. Edrundusen ku zaan is mahalen he menge valey zan. Umbe mahabet is menge valey zan he egkengerundus. Iyan a, is Nengazen, is migkaǥi kayi.”

Amos 3:9

Keǥiyi niw is menge pengulu he ed-ubpà diyà te melig-en he menge vahin te Ashdod wey is diyà te Ehipto he medtiǥum sikandan diyà te menge vuntud he nekeliǥuy te Samaria ne ahàa zan is kegubut kayi he inged wey is kedlisliseza te menge meǥinged kayi.

Amos 4:1

Sikiyu is dungganen he menge vahi ziyà te Samaria, iring kew te menge vaka ziyà te Bashan he mibpurungan elimahi. Edèdaaǥen niw wey mibpesipelahan is menge pubri, ne edsuǥuen niw pa is menge esawa niw he uwiti kew zan te inumen. Umbe pemineǥa niw heini is

Amos 6:11

Benar iyan, emun iyan en ebmandù is Nengazen, edrunteken din is langun he menge valey, deisey se zekelà.

Amos 6:12

Ebpekepelelaǥuy ve is menge kudà diyà te vetuwen he kelendiǥan? Igkeeradu ve ziyà te zaǥat is baka? Simpri kenà. Piru is kukuman midhimu niw he ebpekezezaat te etew, ne is metazeng midhimu niw he mezaat.

Amos 8:4

Pemineǥa niw heini, sikiyu is edlislisezen dan is menge pubri wey edtinguhà te kedezaat kandan.

Amos 9:14

Ibpeulì ku is menge etew ku he menge tig-Israel ziyà te tanè dan puun te kegkevihaǥa kandan. Ed-umanan dan ebenguna is nevengkag he menge inged dan ne zutun sikandan ed-ubpà. Ebpemula zan te menge paras ne ed-inum dan te vinu kayi. Ebpemula zan diyà te menge pemuleey zan ne egkaan dan te menge veǥas kayi.

Micas 1:6

Umbe, migkaǥi is Nengazen te, “Edezeetan ku is Samaria ne kenè en heini egkeubpaan, kekenà, ebpemulaan dà te paras. Edlilizen ku is menge vatu kayi pehendiyà te suǥud taman te ebpekelepew is menge pundasyun kayi.

Micas 2:2

Ed-eǥawen niw is menge vevesukà wey menge valey he egkesuatan niw. Edlimbungan niw is menge etew wey niw mekuwa is baley zan wey is tanà he kevilin dan.

Micas 6:15

Umbe, ebpemula kew, piru kenè kew iyan ebpekeraǥun kayi. Ebpetiǥis kew te menge ulibu, piru kenè kew iyan ebpekepulus te lana kayi. Egkeres kew te menge paras, piru kenè kew iyan ebpekeinum te vinu kayi.

Zefanias 1:13

Ed-eǥawen is menge azen dan ne ed-ewaan dan is menge valey zan. Kenà iyan sikandan ebpekeubpà diyà te menge valey he mibangun dan. Wey kenà iyan sikandan ebpekeinum te vinu he ebpuun diyà te menge pinemula zan he paras.”

Haggai 1:6

Dekelà is impemula niw piru zeisey zà is neraǥun niw. Duen niw keenen, piru kenà heini ereg. Duen niw inumen, piru kurang heini. Duen niw visti, piru kenà heini utew ebpekaalang te meǥenew. Duen egkezawat niw he suwildu, piru meǥaan dà heini egkaamin.

Malakias 1:4

“Emun egkaǥi is menge Edomanhen he menge kevuwazan ni Esau te, ‘Minsan nezeetan en is ubpaan dey, ne ed-umanan dey heini ebenguna,’ iyan a, kes Nengazen he Mekeǥeǥehem, egkaǥi te, ‘Minsan ed-umanan dan ebenguna haazà is inged dan ne edrundusen ku zed gihapun. Egngezanan sikandan he “mezaat he nasyun” wey “menge etew he layun dà igkeepes te Nengazen.”

Deuteronomio 28:30

“Is bahi he ed-esewaan niw ne ed-eǥawen te zuma he maama. Ebevaley kew ne kenè kew ebpekeubpà duen. Ebpemula kew te paras piru kenà ebpulus diyà te keniyu is beǥas din.