2 Cronica 7:10 - Manobo Western Bukidnon OT

¹⁰ Sunud dutun he andew, he iyan ike-23 he andew te ikepitu he vulan, impeulì ni Solomon is menge etew. Mid-ulì dan he melipayen utew tenged te langun he meupiya he mibeelan te Nengazen ki David wey ki Solomon, wey te menge etew zin he menge Israilihanen.

2 Cronica 7:10 교차 참조

1 Hadì 8:66

Ne hein nepasad haazà is Pista impeulì ni Solomon is menge etew. Mibpenubtuvazan dutun te menge etew si Hadì Solomon, ne hein nepasad nemen-ulì dan he melipayen tenged te langun he meupiya he mibeelan te Nengazen diyà te suluǥuen din he si David wey ziyà te menge etew zin he menge Israilihanen.

2 Cronica 29:36

Midlipey si Hezekia wey is menge etew tenged te tavang te Megbevayà, su meǥaan dan dà nepasad is langun kayi.

2 Cronica 30:26

Utew bibu is Jerusalem. Wazà iring kayi he nehitavù diyà te Jerusalem puun te timpu he si Solomon he anak ni David is midhadì te Israel.

2 Cronica 6:41

“Guntaan, Nengazen he Megbevayà, hendiyè ke en te valey nu, kes lugar he himelayè nu, he zutun isavuk kes Kavan te Kebpekid-uyun nu, he ebpesavut te ǥehem nu. Berakat he meseǥazi te menge memumuhat nu is kedlibriya nu kandan, ne egkelipey is metinumanen he menge etew nu tenged te keupiya nu.

2 Cronica 7:11

Ne nepasad ni Solomon is kebangun duen te valey te Nengazen wey te turuǥan din. Nepasad din is langun he menge pelanu zin para kayi.

2 Cronica 7:9

Hein ikewalu en he andew, mibeelan dan is ketepusan he keburunburun, su midsilibra zan is kebpehinunguza zuen te pemuhatà wey te tivuuk he valey te Nengazen seled te pitu he andew, wey te kedsilibra te Pista te Kebaal te menge Lawig seled daan te pitu he andew.

Nehemias 8:10

Migkaǥi pa si Nehemias te, “Silibra kew ne kaan kew te metaam he menge keenen wey inum kew te metaam he inumen. Beǥayi niw is wazè dan egkekaan, su heini he andew segradu para te Nengazen. Ne kenè kew lalew, su is kelipey he ibeǥey te Nengazen ebpekepelig-en keniyu.”

Salmo 100:2

Silbiyi niw is Nengazen duma is kelipey. Uvey kew ziyà te kandin he egkanta te kegkelipey.

Salmo 105:3

Deliǥa niw is kegkewaǥas din. Kelipey kew is midangep diyà te kandin.

Salmo 106:5

su wey e zaan mekesaǥad te keuswagan te pinilì nu he nasyun, su wey e zaan mekaambit te kelipey zan ne ebpekezalig a kenikew duma kandan.

Salmo 32:11

Umbe, sikiyu is menge metazeng, lipey kew tenged te mibeelan te Nengazen diyà te keniyu! Sikiyu is nengungubpaan te hustu he paaǥi, ugyab kew tenged te kegkelipey niw!

Salmo 92:4

Su midlipey a kenikew, Nengazen, pinaaǥi te egkein-inuwan he menge vaal nu. Tenged te mibpemeelan nu, egkanta a te kegkelipey ku.

Exodus 18:1

Si Jetro, sikan is memumuhat diyà te Midian he enuǥang ni Moises, netudtulan sikandin te langun he mid-ulaula te Megbevayà diyà te ki Moises wey ziyà te menge etew zin he menge kevuwazan ni Israel. Nezineg din ke mibmenumenu te Nengazen is kebpeǥewasa zin te menge Israilihanen puun te Ehipto.

Ezekiel 45:25

Mebpemuhat daan is pengulu zutun te Pista te Kebaal te menge Lawig, he ebpuunan te ike-15 he andew te ikepitu he vulan. Ne seled daan te pitu he andew, ebpemuhat is pengulu te iring ded te menge pemuhat he ibpemuhat din emun Pista te Kedlavey te Belinsuǥuen: menge pemuhat he para idlumpiyu, menge pemuhat he edtutungen, menge pemuhat he para gasa, wey lana.”

Deuteronomio 12:12

Ne medlipey kew zutun diyà te etuvangan te Nengazen he Megbevayè niw, duma te menge anak niw, menge suluǥuen niw, wey is menge Levihanen he wazà mekepengevilin te tanà he ebpen-ubpà diyà te inged niw.

Deuteronomio 12:18

Diyè niw zà heini keena te etuvangan te Nengazen he Megbevayè niw duma te menge anak niw, menge suluǥuen niw, wey menge Levihanen he ebpen-ubpà diyà te inged niw te lugar he ebpilien din. Lipey kew ziyà te etuvangan te Nengazen he Megbevayè niw pinaaǥi te langun he ed-ul-ulahan niw.

Deuteronomio 12:7

Ne ziyè kew egkaan te etuvangan te Nengazen he Megbevayè niw duma is menge pemilya niw, ne igkelipey niw is langun he nepasad niw su midtuvazan kew te Nengazen.

Deuteronomio 16:11

Ne medlipey kew ziyà te etuvangan te Nengazen he Megbevayè niw ziyà te lugar he ebpilien din he zutun sikandin ebeǥayi te zengeg. Silibra kew zuma te menge anak niw, menge suluǥuen niw, menge Levihanen he menge meǥinged diyà te menge inged niw, menge kenà Israilihanen, menge ilu wey menge valu he vahi he menge meǥinged diyà te menge inged niw.

Deuteronomio 16:14

Medlipey kew is edsilibra kayi he pista duma te menge anak niw, menge suluǥuen niw, menge Levihanen, menge kenà Israilihanen, menge ilu wey menge valu he vahi he menge meǥinged diyà te inged niw.