2 Cronica 15:2 - Manobo Western Bukidnon OT

² Ne mibpekid-ahà sikandin ki Asa ne migkeǥiyan din te, “Pemineǥa a keniyu Hadì Asa, wey sikiyu is langun he tig-Juda wey tig-Benjamin. Is Nengazen ne kenà edsuwey keniyu emun kenè kew edsuwey kandin. Emun edangep kew kandin ne egkeehè niw is keupiya zin. Piru ke ed-iniyuǥan niw sikandin, ne ed-iniyuǥan kew zin daan.

2 Cronica 15:2 교차 참조

1 Hadì 11:25

Ne nehimu si Rezon he hadì diyà te Aram ne migkuntada zin is Israel. Nehimu sikandin he kuntada te Israel zutun te uuyag pa si Solomon. Mid-umanan din pa is kegubut he ebeelan ni Hadad diyà te Israel.

1 Hadì 18:18

Midtavak si Elias te, “Kenà a iyan ebpendezaat te Israel, kekenà, iyan ka wey is pemilya te amey nu. Su wazè niw tumana is menge suǥù te Nengazen wey mid-azap niw is menge ledawan ni Baal.

2 Hadì 21:14

Idselikwey ku minsan is nengesamà duen te menge etew ku, ne ibeǥey ku sikandan diyà te menge kuntada zan he ed-aǥew te menge azen dan.

1 Cronica 28:9

“Ne sikew, Solomon he anak ku, kilelaa nu wey silbiyi nu is Megbevayà te amey nu te tivuuk he ǥehinawa nu wey isip nu, su naahà te Nengazen is kada ǥehinawa wey netuenan din is tuyù tew wey ked-isip-isip tew. Emun ed-aput ka ziyà te kandin, ne edtevangan ke zin; piru emun ed-iniyug ka kandin ne ebeleǥazen ke zin te wazà pidtemanan.

2 Cronica 11:12

Mibpesevukan din heini he menge inged te menge kelasag wey menge vangkew he ebpekeuman te kelig-en kayi. Umbe mibpedayun is kegkesekupa zin te Juda wey Benjamin.

2 Cronica 12:5

Ne midhendiyà is ebpeneuven he si Shemaya te ki Rehoboam wey te menge pengulu te Juda, he mibpelaǥuy pehendiyà te Jerusalem su nahandek dan ki Shishak. Migkeǥiyan sikandan ni Shemaya te, “Iyan heini lalag te Nengazen: Geina te mid-iniyuǥan a keniyu, ne ǥuntaan ebey-anan ku sikiyu keniyan te kedsurunga keniyu ni Shishak.”

2 Cronica 13:12

Is Megbevayà ne eduma kenami; iyan sikandin pengulu zey. Ne emun edsurung key keniyu ne iyan ebpengulu kenami is menge memumuhat he ebpezaǥing te menge trumpita. Sikiyu is menge keet-etawan te Israel, kenè niw sukuli is Nengazen, he Megbevayà te menge kepuun niw, su kenè kew ebpekezaag.”

2 Cronica 13:4

Hein nekeuma ensi Abia ziyà te vuvungan te Efraim, ne midhitindeg si Abia ziyà te Buntud he Zemaraim ne migkulahì din si Jeroboam wey is menge tig-Israel, “Pemineg kew kedì.

2 Cronica 15:15

Utew nengelipey is langun he tig-Juda su nekevaal zan te kebpenaad he ebpuun te ǥehinawa zan. Ne utew meheǥet is gehinawa zan te kedangep te Nengazen, ne neehè dan is keupiya zin. Ne mibeǥayan din sikandan te kelinew su wazè dan mekepekidtebek te menge kuntada zan diyà te peliǥuy.

2 Cronica 15:4

Piru hein edlised dan en, ne midangep dan diyà te Nengazen he Megbevayà te Israel, ne midtevangan din sikandan.

2 Cronica 20:15

Migkaǥi si Jahaziel te, “Hadì Jehoshafat, wey sikiyu is langun he mid-ubpà kayi te Juda wey Jerusalem, pemineg kew! Iyan heini egkeǥiyen te Nengazen keniyu, ‘Kenè kew mahandek wey mebmeluya tenged kayi te mezakel he menge sundaru, su kenè kew iyan ebpekidtebek, kekenà, iyan a is Megbevayà.

2 Cronica 20:17

Kenè en kinahanglan he ebpekidtebek kew pa. Andam kew zà wey mebpekelig-en, ne ahaà niw is kezeeǥan he ebeelan te Nengazen para keniyu. Sikiyu is menge tig-Juda wey tig-Jerusalem, kenè kew mahandek wey mebmeluya. Etuvanga niw sikandan keeselem su is Nengazen iyan eduma keniyu.’ ”

2 Cronica 20:20

Meselem dutun te sunud he andew, si Jehoshafat wey is menge sundaru zin, midhipanew zan pehendiyà te sibsivayan te Tekoa. Te kemulu pa sikandan edhipanew, midteren si Jehoshafat ne migkaǥi te, “Pemineǥa a keniyu, sikiyu is tig-Juda wey tig-Jerusalem! Tuu kew te Nengazen he Megbevayè niw, ne ebmelig-en kew. Tuuwi niw is menge ebpeneuven din ne ebmezeeǥen kew.”

2 Cronica 24:20

Ne midumala te Mulin-ulin te Megbevayà si Zacarias he anak ni Jehoyada he memumuhat. Midhitindeg sikandin diyà te etuvangan te menge etew he egkaǥi te, “Iyan heini lalag te Megbevayà: Maan is wazè niw tumana is menge suǥù te Nengazen? Wazè niw en ed-iseǥan. Su mid-iniyuǥan niw is Nengazen, ne ed-iniyuǥan kew zin daan.”

2 Cronica 26:5

Midangep sikandin te Megbevayà hein timpu ni Zacarias, he iyan mibpenurù kandin te kedtahud te Megbevayà. Te kebpedayun din te kedangep te Nengazen, ne ibpeuswag sikandin te Megbevayà.

2 Cronica 32:8

Menge etew zà is duma keniyan te hadì, piru is kenitew he zuma, ne iyan is Nengazen he Megbevayè tew. Iyan sikandin edtavang kenitew wey ebpekidtebek para kenitew.” Umbe mibmelig-en is menge etew tenged dutun te migkaǥi ni Hadì Hezekia he hadì te Juda.

2 Cronica 33:11

Umbe, impesurung sikandan te Nengazen te menge sundaru te Asiria. Mibihag dan si Manase, migkew-itan dan is izung din, migkedinahan dan te brunsi, ne miduma zan diyà te Babilonia.

2 Cronica 33:12

Ne tenged te kedlised din, ne wazè en human sikandin mebpelavew, ne mibpehizuhizu sikandin te Nengazen he Megbevayè din, he Megbevayà daan te menge kepuun din.

2 Cronica 34:3

Dutun te ikewalu he tuig te kedhadì din he vatè pa sikandin, mibpuun en sikandin medangep diyà te Megbevayà te kepuun din he si David. Ne hein ike12 he tuig te kedhadì din, mibpuunan din lumpiyuwi is Juda wey Jerusalem pinaaǥi te kebpependezeeti zin te menge simbahan diyà te metikang he menge lugar, te menge tukud he simbulu te vahi he ed-ezapen he si Ashera, zuma he menge ed-ezapen wey menge ledawan.

Ezra 8:22

Su egkeeled a he edhangyù diyà te hadì te menge sundaru wey menge pereuntud te kudà he ebpekevantey kenami wey key kenà mekevut te menge kuntada zutun te kedhipanew zey, su nekeǥiyan dey en is hadì he edtevangan te Megbevayè dey is langun he edsarig diyà te kandin. Piru egkepeukan te Megbevayà is edselikwey kandin.

Salmo 34:4

Mid-ampù a ziyà te Nengazen ne midtavak e zin. In-awè din is langun he kegkehandek ku.

Salmo 53:2

Puun te langit edtengtengan te Megbevayà is keet-etawan, su edsusiyen din ke zuen be nekesavut te tutuu wey ke zuen be midangep diyà te kandin.

Isaias 45:19

Wazè ku ieles is kegkaǥi ku, he wazà duen netau. Wazè ku keǥiyi is menge kevuwazan ni Jacob he medangep dan kayi te kedì he wazè dan egkepupulus. Siak, is Nengazen, egkeǥiyen ku is tutuu. Ibpehayag ku ke hengkey is hustu.”

Isaias 51:1

Migkaǥi is Nengazen te, “Pemineg kew kediey, sikiyu is egkesuat he egkelibri wey midangep kayi te kediey. Tentenuzi niw si Abraham wey si Sara he kepuun niw, iring sikandan te vatu he zutun kew tipaka etawa vudsi he zutun kew keluta. Hein mid-umew ku si Abraham, ne sebsevaha zin dà, piru midtuvazan ku sikandin ne mibeǥayan ku te mahabet he menge kevuwazan.

Isaias 7:13

Migkaǥi si Isaias te, “Pemineg kew is menge kevuwazan ni David! Kenè be subre en is kebpetigkerà niw te menge zuma niw he menge etew? Ne ǥuntaan iyan niw en maan ibpetigker is Megbevayè ku!

Jeremias 2:17

“Iyan kew mismu is menge Israilihanen, mid-uwit kayi he kezeetan diyà te keniyu. Su hein mibpenguluwan ku sikiyu ziyà te zalan, inselikwey a keniyu, is Nengazen he Megbevayà,

Amos 5:14

Guntaan, beeli niw is meupiya ne kenà is mezaat su wey kew meuyag-uyag ne ebpekiduma keniyu is Nengazen he Megbevayà he Mekeǥeǥehem sumalà is egkeǥiyen niw he zuma niw sikandin.

Numero 14:42

Kenè kew ǥenat, su is Nengazen wazà mebpekiduma keniyu, ne egkezaag kew te menge kuntada niw.

Numero 14:43

Emun ebpekidtebek keniyu is menge Canaanhen wey menge Amalikanhen ne ebpemematey kew; kenà ebpekiduma is Nengazen keniyu su inselikwey niw sikandin.”

Deuteronomio 20:1

“Emun edhipanew kew is ebpekidtebek te menge kuntada niw, ne egkeehè niw is menge kudè dan, menge kerwahi wey menge sundaru zan he edhuna he mahabet te keniyu, kenè niw sikandan ikahandek, su zuma niw is Nengazen he Megbevayè niw he mibpeǥawas keniyu ziyà te Ehipto.

Deuteronomio 31:17

Dutun he andew egkepeukan ku sikandan ne ed-engkezan ku sikandan. Ed-iniyuǥan ku sikandan ne egkengezeetan dan. Mahabet he menge kemeresayan wey menge kemereǥenan he ebpekeuma ziyà te kandan, ne zutun he timpu ebpekeinsè sikandan te, ‘Iyan be ingkeul-ulaha te menge kemereǥenan diyà te kenitew is tenged te wazè en mebpekiduma kenitew is Megbevayà?’

Deuteronomio 4:29

Piru emun ebpen-ahaan niw zutun is Nengazen he Megbevayè niw, egketuredu niw sikandin emun ebpen-ahaan niw sikandin pinaaǥi te tivuuk he ǥehinawa niw.

Josue 22:31

Umbe, migkaǥi si Finehas he anak te memumuhat he si Eleazar te, “Netuenan tew ǥuntaan he mibpekiduma kenitew is Nengazen su wazè kew medsupak kandin. Midlibri niw is Israel te silut te Nengazen.”

Josue 24:20

Emun ed-engkezan niw is Nengazen ne ebpenilbi kew te zuma he menge ed-ezapen, egkepeukan kew zin ne edsilutan kew zin. Edèdeetan kew zin minsan pa te mibpurungan kew zin dutun te nehuna he timpu.”

Zatù 10:13

Piru mid-iniyuǥan a ǥihapun keniyu su iyan niw mid-azap is duma he menge ed-ezapen. Umbe kenè ku en sikiyu edlibriyen guntaan.

Zatù 9:7

Ne hein nezineg haazà ni Jotam, midtekezeg sikandin diyà te puntur te Buntud he Gerizim ne imbensag din diyà te kandan is menge lalag he edhenduen te, “Menge tig-Shekem, pemineg kew kedì emun egkesuat kew he ebpemineg keniyu is Megbevayà.

1 Samuel 12:14

Sikiyu wey is hadì niw, wazà minsan hengkey he ebpekekaid keniyu, emun edtahud kew te Nengazen he iyan Megbevayè niw wey edsunud kew te menge suǥù din.

1 Samuel 12:15

Piru emun kenè kew edsunud te Nengazen, ne kenè niw edtumanen is menge suǥù din, ne edsilutan kew zin iring ded te mibeelan din te kepuun niw.