1 Samuel 30:20 - Manobo Western Bukidnon OT

²⁰ Apil en dutun is menge kerehidu wey menge vaka. Te kemulu pa ed-evuǥa te menge sakup ni David haazà is langun he menge layud he edhuna kandan, ke sikandan te, “Ki David heini he naaǥew.”

1 Samuel 30:20 교차 참조

2 Cronica 14:15

Midsurung dan daan is menge kampu te ebantey te menge layud, ne mibpenguwa zan is mezakel he menge kerehidu, wey menge kambing, wey menge kemilyu. Ne midlikù dan diyà te Jerusalem.

2 Cronica 20:25

Ne mibeyaan haazà ni Jehoshafat duma is menge sakup din ne mibpenguwa zan is menge azen dan. Dekelà is nekuwa zan he menge gelemiten, menge visti wey zuma pa he menge vutang he menge mahalen he kenè dan egkeekatan te ed-uwit. Tetelu he andew is kedtiǥuma zan dutun su utew zekelà haazà he azen.

Isaias 53:12

Umbe, ebeǥayan ku sikandin te zengeg he para te ventuǥan wey gemhanan he menge etew, su imbeǥey zin is untung din: Mid-isip sikandin he sevaha te menge mekesesalà. Ne nekaantus sikandin para te mahabet he menge mekesesalà ne mid-ampù sikandin he peseyluwa sikandan te Megbevayà.”

1 Samuel 30:21

Hein nekelikù en ensi David diyà te zal-ug he Besor, midsinuǥung sikandan dutun te 200 he menge sakup din he mibpelintetaǥak tenged te utew zan kegkeveley. Migkemusta sikandan ni David.

1 Samuel 30:26

Hein nekeuma ensi David diyà te Ziklag, impeuwit din diyà te menge pengulu te Juda he menge emiǥu zin is duma he menge naaǥew zan, duma zutun is lalag he: “Heini zed is ibeǥey ku keniyu he naaǥew zey ziyà te menge kuntada te Nengazen.”