1 Samuel 21:5 - Manobo Western Bukidnon OT

⁵ Midtavak si David te, “Kenè key ebpekidhulid te vahi emun duen tuyù dey. Minsan kenà utew impurtanti is ebeyaan dey ne ed-uraman dey is meremerik, lavi en be ǥuntaan he utew impurtanti is tuyù dey.”

1 Samuel 21:5 교차 참조

Exodus 19:14

Ne zutun midtupang si Moises puun dutun te vuntud ne midsuǥù din is menge etew he mebpekelumpiyu. Ne mibpemìpian dutun te menge etew is menge visti zan.

Exodus 19:15

Migkeǥiyan ni Moises sikandan te, “Pengandam kew para te meketelu ǥuntaan; kenè niw en dèpa hileveti is esawa niw.”

Exodus 25:30

Kinahanglan he pirmeninti is supas dutun te lemisahan he ibpemuhat kayi te kedì.

Leviticus 24:9

Heini he menge supas, ne para ki Aaron wey te menge kevuwazan din. Egkeenen dan heini ziyà te segradu he lugar zutun te Tulda, tenged te utew heini segradu he vahin te menge pemuhat. Ne para heini kandan taman te taman.

Leviticus 8:26

Ne migkuwa si Moises te tigselimbaha ziyà te kada kelasi te menge supas he wazè din tapey he intaǥù diyà te revan, ne impemuhat din diyà te Nengazen. Is migkuwa zin supas he mekepal he wazè din tapey, supas he midsehuǥan te lana, wey supas he menipis. Impetepayè din heini ki Aaron wey te menge anak din ragkes is langun he menge tavà wey sikan is kewanan he vuvun te kerehidu, ne imbayew zin heini ziyà te Nengazen su pemuhat heini he ibayew.