Santiago 4:12 - Manobo Western Bukidnon

¹² Sebsevaha zà is ebpuunan te kesug̵uan he iyan is Megbevayà ne sebsevaha zà daan is duen din keg̵ehem te kedhukum te menge ulaula te menusiyà ne iyan ded daan is Megbevayà. Iyan sikandin edsilut ne iyan daan ebpekelibri te silut. Iyan, sikita mulà, wazè ta keg̵ehem te kedhukum te minsan hentei.

Santiago 4:12 교차 참조

Mateo 10:28

Kenè kew mahandek te menge etew zà duen su iyan dà egkepatey zan is lawa niw; ne kenè dan egkepatey is gimukud niw. Iyan ikehandek niw is Megbevayà su egkepatey zin is lawa wey minsan is gimukud niw pinaag̵i te Impirnu.

Lucas 12:5

Egkeg̵iyen ku keniyu ke hentei is engayan he igkehandek niw. Iyan niw ikehandek is Megbevayà su kenè din iyan dà egkepatey is lawa niw su zuen din keg̵ehem he ebpeketimbag te g̵imukud niw ziyà te Impirnu. Uya, iyan niw sikandin ikehandek!”

Ruma 14:13

Ne tenged dutun, menge suled, ed-engkezan te en is kedsawey ta te menge ulaula te menge zuma ta he tumutuu. Su kinahanglan he ed-ahaan ta is kenita he menge ulaula su wey wazà minsan hengkey he ulaula ta he ibpekesalà te menge zuma ta.

Ruma 14:4

Kenà egkehimu he edsusiyen ta is menge ulaula te sulug̵uen te sengeeetew en su haazà is egalen din, iyan edsusi kandin ke netuman din en be is ebpeveelan kandin wey ke wazà. Ne iring din ded daan, kenà egkehimu he edsusiyen ta is menge ulaula te zuma ta he tumutuu su iyan edsusi kandin is Megbevayà. Siguradu he egketuman din is ebpeveelan kandin te Megbevayà su edtavang kandin is Megbevayà.

Ruma 2:1

Netuenan ta he utew metazeng is idsiluti te Megbevayà te menge etew he ed-ulaula te menge mezaat he iring kayi, iyan, sikew is egkag̵i he utew mezaat heini is menge ulaula kayi te menge etew, wazè nu zaan kebpekeg̵awas su edsudien nu is mezaat he ulaula te zuma, iyan, mezaat daan is ed-ul-ulahan nu. Ne tenged kayi zutun te kedsudia nu kandin, nesudì nu zaan is kenikew he ulaula.

Ruma 9:20

Ne iyan egkekag̵i ku kayi is: ebpeketavak ki ve te Megbevayà is linimbag din dà? Egkehimu ve he ebpekeinsè ki is mibeelan te mibaal kenita te, “Maan is mibeelan a kenikew he iring kayi?”

Hibriyuhanen 7:25

Ne tenged kayi, egkehimu te minsan keenu he timpu he edlibriyen din te silut is minsan hentei he menge etew emun pinaag̵i kandin ed-aput sikandan diyà te Megbevayà su wazà pidtemanan te untung din, ne layun din egkehimu te edtavang sikandan diyà te etuvangan te Megbevayà.

Santiago 5:9

Kenè kew, menge suled, meked-eepesà su wey kenè kew mesiluti te Megbevayà. Meg̵aan en ebpekeuma is edsusi te menge ulaula ta; iring te ziyè en te g̵emawan.