Santiago 1:25 - Manobo Western Bukidnon

²⁵ Iyan, ke zuen etew he ebpurungan din ed-istudyuwi is kesug̵uan he wazè din kurang he iyan ebpekelibri kenitew, ne kenè din edlipatan, kekenà, edtumanen din, edtuvazan te Megbevayà is minsan hengkey he ed-ul-ulahan din.

Santiago 1:25 교차 참조

Lucas 11:28

Iyan, midtavak si Jesus te, “Lavew pa he zekelà is kelipey te etew he ebpemineg te Lalag te Megbevayà ne ebpezumdumahan din!”

Juan 13:17

Emun egkesavut niw en heini is impenurù ku keniyu, igkelipey niw utew ke edtumanen niw.

Juan 8:36

Umba, ke ebelukasan kew te Anak te Megbevayà, tutuu iyan he kenè kew en maan egkeveyveyaan te zaan he teg̵iuripen keniyu.

Nengeulaula 13:43

Ne zutun te ked-awè dan puun te simbahan, mezakel is menge etew he nemenduma ki Pablo wey ki Bernabe. Elin dutun is menge Hudiyu wey kenà menge Hudiyu he edsimba zuma te menge Hudiyu. Mibpekibitiyara kandan ensi Pablo. Ne midsembag̵an dan sikandan he kenè dan engkezi is kedsarig dan te g̵ag̵ew te Megbevayà.

Nengeulaula 2:42

Ne te kada andew ebpemineg dan te ibpenurù kandan te menge epustul. Mibpekid-upakat dan te langun he menge tumutuu ne mibeelan dan te tedeman is kebpatey ni Jesus pinaag̵i te kegkaan te supas ne layun dan ed-ampù.

Nengeulaula 26:22

Iyan, taman en guntaan midtevangan a te Megbevayà umba zini ad guntaan te etuvangan niw. Ne ibpenurù ku heini is langun diyà te minsan hentei, dekelà is pid-etawan din se zeisey is pid-etawan din. Ne is ibpenurù ku, iyan ded sikan is netagnà dengan ni Moises wey kes ebpemeneuven te Megbevayà,

Ruma 11:22

Ne pinaag̵i kayi egkesavut ta is gag̵ew te Megbevayà wey ke maan is edsilut sikandin. Midsilutan din is wazà mebpemineg, iyan, igkehizu kew zin ke edhemenan niw is gag̵ew zin, su emun kenà, ne id-awè kew zin daan.

Ruma 2:13

Su emun iyan ta edserig̵an is kesug̵uan, kenè egkehimu he ed-isipen ki te Megbevayà he metazeng pinaag̵i zà te kebpemineg te insug̵ù dutun te kesug̵uan, kekenà, kinahanglan he wazà minsan hengkey he sayep ta zutun te kedtumana ta te kesug̵uan.

Ruma 7:12

Is kesug̵uan, diyà ebpuun te Megbevayà, ne is langun he menge sug̵ù dutun, menge sug̵ù te Megbevayà, ne kenà haazà mezaat, kekenà, meupiya wey metazeng.

Ruma 8:15

Su is Wag̵as he Mulin-ulin he imbeg̵ey kenitew te Megbevayà, ne wazè kiw zin himuwa he menge uripen he utew egkengehandek te Megbevayà, kekenà, midhimu kiw zin he menge anak te Megbevayà. Ne pinaag̵i te g̵ehem te Wag̵as he Mulin-ulin egkehimu en he egkeamey tew is Megbevayà.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

1 Kurintu 15:58

Na, menge mahal ku he menge suled, geina te iyan heini, heg̵eta niw is kedsarig niw te Megbevayà su wey wazà ebpekezezaat te kedtuu niw. Peniguduwi niw tumana is ebpeveelan keniyu te Nengazen; hag̵ù kew te taman te egkehimu niw su netuenan niw he emun iyan edtumanen niw is ebpeveelan te Nengazen, kenà egkehimu he wazà pulus te vaal niw.

2 Kurintu 13:5

Susiya niw is gehinawa niw wey niw metueni ke tutuu ve is kedtuu niw ki Kristu. Wazè niw ve metueni he midlumunan kew ni Kristu? Ne emun wazà, ne tarù is kedtuu niw ne wazè kew mezawat ni Kristu.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Gelasya 5:1

Pinaag̵i te kebelukasi kenitew ni Kristu, nelibri kiw en te kedtumana te kesug̵uan. Umba, kinahanglan he edsukul kiw is mibelukasan su wey kenè kiw en maan meuripen.

Gelasya 6:2

Layun kew mebpetebtevangà te uman sevaha keniyu su emun ed-ul-ulahan niw heini egketuman niw is insug̵ù kenitew ni Kristu.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

1 Timoteo 2:15

Ne minsan pa te iyan haazà, egkelibri g̵ihapun is menge vahi te silut pinaag̵i te ked-anak te vatà ke kenè dan edlekaan is kedtuu zan, wey is kebmahala zan te menge zuma zan wey is menge ulaula zan he igkesuat te Megbevayà wey is ked-erengana zan te langun he ed-ul-ulahan dan.

1 Timoteo 4:16

Purungi nu susiya is kenikew he ulaula wey is kebpenurù nu. Su emun edhemenan nu heini kenà iyan ke zà is egkelibri te silut, kekenà, pinaag̵i kenikew egkehimu he egkelibri zaan is menge etew he ebpememineg te ibpenurù nu.

Hibriyuhanen 12:15

Bantey kew su kela ke zuen duma keniyu he kenà edawat te g̵ag̵ew te Megbevayà. Su is iring kayi he etew, ne ebpekeiring te sagbet he ebpemeg̵as te mepait he ebpekehilu. Ebpekesamuk sikandin te menge tumutuu ne mezakel he etew is ebpekeiring kandin te ed-ulaula te mezaat.

Santiago 2:12

Duen selakew en he kesug̵uan he ebpekelibri kenita wey ki kenà mekesalà ne iyan heini kesug̵uan he idhukum kenita keuzemà te Megbevayà. Ne tenged kayi kinahanglan he ebpurungan ta is menge lalag ta wey ulaula ta su wey kenè ta mesupak haazà is kesug̵uan.

1 Pedro 2:16

Ne g̵eina te nelibri kiw en te Megbevayà, egkehimu he iyan kiw en ebayàbayà te ed-ul-ulahan tew, iyan, kinahanglan he kenè tew edhimuwen is kelibriyanan tew he pesangil wey kiw mekeulaula te mezaat. Su minsan pa te nelibri kiw en, kinahanglan he menge sulug̵uen kiw g̵ihapun te Megbevayà.

1 Juan 2:24

Is tuluuwen he impenurù keniyu hein aney kew medtuu, kinahanglan he edhemenan niw su emun edhemenan niw kenà egkehimu he kenè kew layun egkesevaha te Amey tew he Megbevayà wey te Anak din he si Jesu Kristu.

Impezayag 14:13

Ne zutun nezineg ku is egkag̵i ziyà te langit te, “Isurat nu heini: Utew mulà meupiya is egkengeulaula te menge etew he ebpatey ke menge tumutuu sikandan te Nengazen.” “Benar iyan,” egkag̵i is Wag̵as he Mulin-ulin. “Utew zan en egkengelipey su wazè en igkehag̵ù dan ne ebpekehimeley sikandan. Ne zutun edsuhulan sikandan tenged te menge meupiya he menge vaal zan.”

Impezayag 22:14

Utew egkengelipey haazà is langun he ebpìpian dan is ugelingen dan, he ke và dà egkeg̵iya, ibpepalis dan is menge salè dan su wey utew meputì su emun ebeelan dan haazà, ebeg̵ayan sikandan te ketenged te kegkaan te veg̵as dutun te kayu he ebpekeveg̵ey te untung wey te kedseled dutun te menge pultahan te inged.