35 Ne zutun, is duma he etew he ebpemenhithitindeg dutun te uvey, hein nezineg dan haazà is lalag, ke sikandan te, “Pemineg kew su ebpengumawen din si Elias is sevaha zuen te ebpeneuven dengan te Megbevayà.”
Ne hein liwazè en he ebpenaug is andew zutun, ingkulahì ni Jesus is utew mezag̵ing he lalag he edhenduen te, “Ili, Ili, lama sebektani,” he ke và dà egkeg̵iya, “He Megbevayè ku, maan is ed-iniyug̵an a kenikew?”
Ne sevaha zutun te menge etew is migaanggaan megkuwa te ispungha ne intereb din diyà te sukà ne midtiyuk din te zeisek he kayu ne impaahuk din diyà te vèbà ni Jesus wey zin haazà mesupsup. Ne migkag̵i te, “Pesegdana niw su ed-ahaan tew ke edlepew si Elias su wey zin ikepenaug!”
