Lucas 10:11 - Manobo Western Bukidnon

¹¹ ‘Minsan is menge eliyavuk kayi te inged niw he nemendeket te menge paa zey, edtektaken dey en wey niw metueni he edsilutan kew te Megbevayà.’ Ne ke sikiyu zaan te, ‘Kinahanglan he metueni niw he meg̵aan en is timpu te kedhadì te Megbevayà.’

Lucas 10:11 교차 참조

Mateo 10:14

Ne ke zuen inged he wazà dutun egalewg̵alew keniyu, wey ke wazà ebpemineg te ibpesavut niw kandan, ewai niw sikandan wey tektaka niw is menge eliyavuk diyà te menge paa niw he tuus diyà te kandan he edsilutan sikandan te Megbevayà.

Mateo 10:7

Ipesavut niw kandan he meg̵aan en edhadì te menusiyà is Megbevayà.

Mateo 3:2

Ke sikandin te, “Iniyug̵i niw is memezaat he ulaula su meg̵aan en edhadì kenitew is Megbevayà he ziyà te langit.”

Marcos 6:11

Ne ke zuen inged he kenè kew zuen igalewg̵alew wey kenè dan ebpemineg̵en is ibpesavut niw, ne tektaka niw is eliyavuk diyà te menge paa niw he iyan lag̵uy he edsilutan sikandan te Megbevayà.”

Lucas 10:10

Iyan, emun ebpekeuma kew ziyà te inged ne wazà egalewg̵alew keniyu zutun, ne peehè kew te menge etew zutun, ne ke sikiyu te,

Lucas 10:9

Pemewii niw is egkengezeruwan dutun te inged. Ne keg̵iyi niw is menge etew zutun he meg̵aan en is timpu te kedhedii kandan te Megbevayà.

Lucas 9:5

Ne emun duen inged he wazà dutun etew he egalewg̵alew keniyu, ne ewai niw ne penektaka niw is menge eliyavuk diyà te menge paa niw he iyan lag̵uy he edsilutan sikandan te Megbevayà.”

Nengeulaula 13:26

Ne menge suled,” ke si Pablo, “sikiyu is menge zuma ku he kevuwazan ni Israyil wey kevuwazan ni Abraham, wey sikiyu zaan is kenà Hudiyu he ed-azap daan te Megbevayà, iyan kiw kes mibpeuwitan te Megbevayà te Meupiya he Tudtulanen wey kiw melibri te kedsiluti kenitew.

Nengeulaula 13:40

Purungi niw isipa heini su wey kenà mehitavù diyà te keniyu is netagnà dengan he Lalag te Megbevayà he insurat te ebpemeneuven he ke sikandin te,

Nengeulaula 13:46

Ne minsan pa zutun wazà mahandek si Pablo wey si Bernabe su ke sikandan dutun te menge Hudiyu te, “Kinahanglan he edhunaan dey sikiyu is menge Hudiyu edtudtuli te ibpesavut te Megbevayà, iyan, geina te kenè niw edewaten, ibpeehè niw he kenè kew zait he ebeg̵ayan te untung he wazà pidtemanan. Ne tenged dutun kenè dey en maan ibpesavut is Meupiya he Tudtulanen diyan te keniyu, kekenà, edhendiyè key te kenà menge Hudiyu.

Nengeulaula 13:51

Ne zutun te ked-awà ni Pablo wey si Bernabe, in-awè dan is tanà diyà te parapara zan wey metueni te menge etew he kuntada sikandan te Megbevayà. Ne midlaus dan diyà te inged he Ikunya.

Ruma 10:21

Ne zuen daan egkeg̵iyen te Megbevayà pinaag̵i te menge lalag ni Esaias mehitenged te menge etew he kevuwazan ni Israyil he edhenduen te, “Utew mezesen is gehinawa zan he menge etew wey utew zan mesinupaken su layun ku sikandan edhengyui he medtuu zan kedì, iyan, kenè dan ebpemineg.”

Ruma 10:8

Su zuen duma pa he insurat he Lalag te Megbevayà he ebpesavut kenita he utew melemu is kebpeketuu ta te Lalag te Megbevayà su is Lalag te Megbevayà, daan dini te kenita, ne egkehimu he ibpenudtul ta te zuma. Ne heini is Lalag te Megbevayà mehitenged te kedtuu ki Kristu, ne iyan daan edtudtulen dey.

Hibriyuhanen 1:3

Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.