33 Ne zutun mibpein-inseey zan te, “Duen be vuwa nekeveg̵ey kandin te egkeenen?”
Ne hein nepawà dutun ne miburun din is menge sumusundan din ne mibpilì din dutun is sepulù wey zezuwa ne migeraran din haazà he menge epustul.
Ne is menge sumusundan din, wazè dan dutun mesavut is ibpesavut ni Jesus. Wazà ipesavut te Megbevayà kandan su wey kenè dan metueni. Ne wazè dan mekeaku he ed-insà kandin ke hengkey is kehulug̵an dutun.
Iyan si Andres sevaha zutun te zezuwa he nekezineg te migkag̵i ni Juan wey miduma ki Jesus. Telesuled si Andres wey si Simon he migeraran ki Pedro.
Ne zutun daan si Jesus wey is menge sumusundan din, su neumbita zaan sikandan he medtelavuk dan.
Ne midtavak si Jesus te, “Duen egkeenen ku he wazè niw metueni.”
