Ipisu 3:20 - Manobo Western Bukidnon

²⁰ Edelig̵en tew is Megbevayà su, pinaag̵i te zekelà he g̵ehem din he impelumun din dini te kenitew, utew zekelà is egkehimu zin su lavew pa is egkehimu zin, kenà te minsan hengkey he egkeisip ta he ebuyuen.

Ipisu 3:20 교차 참조

Mateo 3:9

Ne kenè niw iyan serig̵i is kevuwazan kew ni Abraham su wazà dutun pulus diyà te Megbevayà. Su egkeg̵iyan ku sikiyu he emun iyan egkinehenglanen te Megbevayà, egkehimu he ebeelan din heini is menge vatu he kevuwazan ni Abraham.

Juan 10:10

Umba edhendutun te tudil is tekawen su wey mekepenakew, ne wey mekehimatey, ne wey mekezezaat. Siak mulà, midhendini a te kelibutan wey meveg̵ayi is menusiyà te untung he wazà pidtemanan wey wazè en kurang dutun te untung.

Ruma 16:25

Edelig̵en tew is Megbevayà! Pinaag̵i te Meupiya he Tudtulanen he ibpenudtul ku he iyan is mehitenged ki Jesu Kristu, wey pinaag̵i te tuluuwen he neug̵et he timpu is ked-elesa zuen te Megbevayà, egkehimu he edheg̵eten din is kedtuu niw.

Ruma 4:21

Su utew mezesen is kedsarig din he edtumanen te Megbevayà is penaad din.

1 Kurintu 2:9

Ne tenged kayi iyan ibpenurù dey is insurat dengan he Lalag te Megbevayà he edhenduen te, “Is utew meupiya wey egkein-inuwan he wazè pa maahà wey wazè pa mezineg te menusiyà wey wazè pa meisip te minsan hentei he etew, ne iyan heini mid-andam te Megbevayà he ibeg̵ey zin diyà te langun he menge etew he mahal sikandin diyà te g̵ehinawa zan.”

2 Kurintu 9:8

Ne egkehimu te Megbevayà he ibeg̵ey zin kenita is subra pa zutun te egkinehenglanen ta, su wey ta layun maazen is langun he menge kinahanglan ta wey zuen ta zaan subra he igketavang ta te zuma.

Ipisu 1:19

Ne id-ampù ku zaan he ipesavut din keniyu ke hengkey is kenà egkesukud he utew lavew he zekelà he g̵ehem te Megbevayà he zini edterebahu te kenitew te menge tumutuu kandin. Ne iyan heini sikan is utew zekelà he g̵ehem

Ipisu 3:7

Nehimu a he sulug̵uen te Megbevayà te kedsengyawa te Meupiya he Tudtulanen. Tenged dà te g̵ag̵ew zin kediey wey pinaag̵i te g̵ehem din imbeg̵ey zin kediey heini is ketengdanan.

Kulusas 1:29

Siak, ebpenigudu a ebaal he edlig-enan te zekelà he zesen ni Kristu su wey metuman heini.

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

Hibriyuhanen 11:19

Su neisip ni Abraham he ke ebpatey si Isaak, egkehimu he ebenhawen te Megbevayà. Ne henduen be te nevanhew iyan si Isaak dutun su neisip ni Abraham he kenè en ebperis he ebpatey sikandin.

Hibriyuhanen 7:25

Ne tenged kayi, egkehimu te minsan keenu he timpu he edlibriyen din te silut is minsan hentei he menge etew emun pinaag̵i kandin ed-aput sikandan diyà te Megbevayà su wazà pidtemanan te untung din, ne layun din egkehimu te edtavang sikandan diyà te etuvangan te Megbevayà.

Santiago 4:12

Sebsevaha zà is ebpuunan te kesug̵uan he iyan is Megbevayà ne sebsevaha zà daan is duen din keg̵ehem te kedhukum te menge ulaula te menusiyà ne iyan ded daan is Megbevayà. Iyan sikandin edsilut ne iyan daan ebpekelibri te silut. Iyan, sikita mulà, wazè ta keg̵ehem te kedhukum te minsan hentei.

2 Pedro 1:11

ne zekelà is kelipey tew keuzemà su egkeg̵alew is Megbevayà kenitew zutun te kebpeseleza zin kenitew zutun te wazà pidtemanan he g̵inhedian te Nengazen tew he si Jesu Kristu he iyan Menluluwas tew.

Hudas 1:24

Utew zekelà is kebpeselemati tew te Megbevayà. Iyan metau he edtavang kenitew su wey kenè kiw mekesuwey ziyà te kandin. Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.