Hibriyuhanen 8:5 - Manobo Western Bukidnon

⁵ Alung dà is kandan he vaal su ed-iringan dan dà haazà is tutuu he ebpeiringan kandan he ziyà te langit. Netuenan ta heini su zutun te kebeeli ni Moises te simbahan he terapal he iyan dengan baley te Megbevayà dini te kelibutan, migkeg̵iyan sikandin te Megbevayà te, “Purungi nu te ed-iring is simbahan diyà te langit he impeehè ku kenikew ziyà te vuntud.

Hibriyuhanen 8:5 교차 참조

Mateo 2:12

Ne impesavut kandan te Megbevayà pinaag̵i te teg̵einep he kenè dan en medlikù diyà te ki Hirudis. Ne tenged kayi, wazè dan en med-ikul zuen te imbayè dan dutun te ked-ulì dan.

Nengeulaula 7:44

Ne ke si Esteban te, “Dengan te kemulu pa ziyà is menge kepuun tew te tanà he wazà duen ed-ubpà he etew, insarig kandan sikan is lawig he manggad he iyan tuus he kenà edsuwey ziyà te kandan is Megbevayà. Midhimu zan heini sumalà is insug̵ù te Megbevayà diyà te ki Moises, sumalà is ebpeiringan te Megbevayà kandin.

Kulusas 2:17

Su is menge iring dutun, ne nehimu zengan he alung dà. Ne ziyè pa te huziyan is teg̵ialung dutun he iyan si Kristu.

Hibriyuhanen 10:1

Ne egkesavut te en he is kesug̵uan he imbilinbilin ni Moises, ne alung dà; ne is langun he meupiya he egkehimu pinaag̵i ki Kristu, ne iyan hustu he impaalung dutun te kesug̵uan. Su insug̵ù dutun te kesug̵uan he kinahanglan kada tuig, ne layun edhimuwa is menge kebpemuhat. Ne tenged kayi egkesavut ta zaan he pinaag̵i kayi te kebpemuhat kenà egkehimu he ebmetazeng is menge etew.

Hibriyuhanen 11:7

Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

Hibriyuhanen 12:25

Umba, purung kew pemineg te Lalag te Megbevayà ne kenè kew sukul. Su is menge etew zengan he wazè dan pemineg̵a is Lalag te Megbevayà he insug̵ù kandan ni Moises dini te kelibutan, emun wazà sikandan mekelikey te silut te Megbevayà, iyan kew pe be mekelikey te silut emun kenè niw ebpemineg̵en is egkeg̵iyen din te ebpuun te langit.

Hibriyuhanen 13:10

Sikitew is menge tumutuu ki Kristu, duen tew en ingkepemuhat, iyan, haazà is menge memumuhat he Hudiyu he ziyà ebpemuhat te simbahan he ziyà te Hiruselim, wazè dan ketenged te kegkaan kayi.

Hibriyuhanen 9:9

Ne alung heini he ibpesavut kenita he is menge ibpemuhat dutun he menge langgam wey is menge halad, kenà heini ebpekeawà te menge salà te menge etew he ed-azap dutun su nesavut dan he pinaag̵i kayi wazè dan pa himuwa he metazeng.

Impezayag 15:5

Ne neipus haazà, neehè ku he nepuwasan is simbahan diyà te langit ne ziyà te seled din, neehè ku is rug̵u he zutun is tuus te g̵ehem te Megbevayà.