Hibriyuhanen 7:27 - Manobo Western Bukidnon

²⁷ Kenà sikandin iring te menge zaan he lavew he memumuhat su wazà kinahanglan he ebpemuhat sikandin andew-andew iring kandan. Su andew-andew ebpemuhat dan. Edhuna zan ebpemuhat tenged te kandan he keugelingen he salà, ne human dan ebpemuhat tenged te menge salà te menge etew. Iyan, si Jesus mulà, kesevaha zà is kandin he kebpemuhat ne wazè din en umani. Midhimu zin heini zutun te kebpehimatey zin diyà te krus.

Hibriyuhanen 7:27 교차 참조

Ruma 6:10

Kesevaha zà is kebpehimatey zin he elili te langun he menge etew, ne netengkaan en haazà ne tenged kayi naawè en diyà te kandin is kegkesemuki kandin te salè tew. Ne g̵untaan nevanhew en, ne nehimu is untung din he igkezalig te Megbevayà.

Ipisu 2:22

Ne sikiyu zaan is kenà menge Hudiyu, ragkes kew kayi, ne nehimu kew en daan he menge himan kayi te valey he zutun ed-ubpà is Megbevayà pinaag̵i te Wag̵as he Mulin-ulin.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Hibriyuhanen 5:1

Su ke zuen etew he ebpilien he lavew he memumuhat, idsarig kandin is ked-etuvang te Megbevayà ne iyan sikandin datù te menge etew. Ne idsarig daan kandin is menge ibeg̵ey ziyà te Megbevayà wey is kebpemuhat wey mepelisi is menge etew te menge mezaat he ulaula.

Hibriyuhanen 5:3

Ne tenged te zuen daan kandin he menge sayep, kinahanglan he zuen ibpemuhat din tenged te kandin he menge mezaat he ulaula iring te zuen daan ibpemuhat din tenged te menge mezaat he ulaula te menge zuma zin he etew.

Hibriyuhanen 8:4

Iyan, dutun te kemulu pa sikandin dini te kelibutan, kenà egkehimu he memumuhat sikandin su puun pa te zengan dà taman guntaan duen menge memumuhat he ebpemuhat sumalà is insug̵ù kandan dutun te kesug̵uan he imbilinbilin ni Moises.

Hibriyuhanen 9:12

Ne kesevaha zà is kedseled din dutun te utew mahal he rug̵u te simbahan he ziyà te langit ne kenè en ed-uman. Ne wazà sikandin mekeseled dutun tenged te kebpelengesa zin te lengesa te menge ayam dà duen, iring te menge kambing wey menge nati he vaka, kekenà, nekeseled dutun tenged te impelengesa zin is kandin he lengesa. Ne tenged kayi te kebpemuhata te lawa zin, midhimu zin he wazà pidtemanan te kedlibriya zin kenita te silut.

Hibriyuhanen 9:14

Ne emun egkehimu he egkelumpiyuwan haazà pinaag̵i zà te lengesa te menge vaka wey kambing, iyan pe be kenà utew pa lavew is egkelumpiyuwan pinaag̵i te lengesa ni Kristu. Su pinaag̵i te tavang te Wag̵as he Mulin-ulin he wazè din pidtemanan, impemuhat ni Kristu ziyà te Megbevayà is kandin he lawa; ne wazà igkesewayi kandin. Ne pinaag̵i te kebpelisi kenita te lengesa zin, in-awè din is menge salè ta wey is kebpekesarig ta te menge ulaula he wazè dan pulus. Ne tenged kayi ebpekeazap ki en te wazè din kemetayen he Megbevayà.

Hibriyuhanen 9:25

Ne is lavew he memumuhat te menge Hudiyu, ne kada tuig edseled sikandin dutun te utew mahal he rug̵u zutun te simbahan dini te kelibutan su ibpemuhat din is lengesa te langgam. Iyan, si Kristu mulà, wazà melelayun is kebpemuhata zin te lawa zin

Hibriyuhanen 9:26

su emun iyan haazà egkinehenglanen, puun pa te kedlimbag̵a te kelibutan, ne utew mezakel is kebpekeantus din te kebpehimatey. Iyan, wazà iyan haazà kinehenglana su iyan mid-ulaula zin kayi te timpu he meg̵aan en egketapus is kelibutan is: midlepew sikandin wey zin maawà is salè tew pinaag̵i te kebpemuhata zin te keugelingen din he lawa. Ne kesevaha zà is kedhimuwa zin kayi.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

Hibriyuhanen 9:7

Iyan, haazà is sevaha he rug̵u he egngezanan te utew mahal he rug̵u, iyan dà ebpekeseled dutun is lavew he memumuhat. Ne kesevaha zà sikandin edseled dutun te sengetuig. Ne emun ed-ahuk sikandin dutun, kinahanglan he ed-uwiten din is lengesa he ibpemuhat wey mepalis is menge salè din wey is menge salà he wazà tuyua te langun he menge zuma zin he kevuwazan ni Israyil.