Hibriyuhanen 13:21 - Manobo Western Bukidnon

²¹ Berakat he pinaag̵i ki Jesu Kristu, is Megbevayà he ebeg̵ey te kelinew, beg̵ayi kew zin te minsan hengkey he tavang wey niw tumana is egkesuatan din. Berakat daan he himuwa kiw zin he menge etew he utew zin egkesuati is menge ulaula. Edelig̵en tew si Jesu Kristu te wazà pidtemanan.

Hibriyuhanen 13:21 교차 참조

Mateo 12:50

Su is minsan hentei he edtuman te egkesuatan te Amey tew he ziyà te langit, iyan daan iney ku, menge suled ku he maama, wey suled ku he vahi.”

Mateo 21:31

Ne ke si Jesus te, “Hentei zutun te zezuwa he telesuled is hustu he neketuman te sug̵ù te Amey zan?” Ne ke sikandan diyà te ki Jesus te, “Iyan haazà is kakey.” Ne ke si Jesus dutun te, “Benar iyan he edhuna keniyu is menge mezaat he etew iring te menge menunukut te vuhis wey is menge vahi he ibpenapì dan is dengeg dan su edewaten sikandan te Megbevayà wey zin mehedii kenà sikiyu.

Mateo 28:20

Penurua niw sikandan he tumana zan sikan is langun he insug̵ù ku keniyu. Ne kenè niw lipati he layun a eduma keniyu taman te kenè pa egketapus heini is timpu.”

Mateo 6:13

Ipekeziyù key kenikew te mezesen he penuley ne ilikey key kenikew ki Setanas.’

Mateo 7:21

Su zuen menge etew he ebpengumew-umew kedì te, ‘Nengazen, he Nengazen!’ Iyan, kenà langun te sikandan ebmehimuwen he mehedii te Amey ku he Megbevayà he ziyà te langit, kekenà, iyan dà sikan is edtuman te egkesuatan te Megbevayà.

Juan 17:23

Su ziyà a te kandan ne zini ka zaan te kedì wey mehustu is kegkesevaha te isip dan su wey metueni te tivuuk he menusiyà he midsug̵ù a kenikew, ne wey metueni zaan te menusiyà he mahal sikandan diyan te g̵ehinawa nu iring daan te mahal a ziyan te g̵ehinawa nu.

Juan 7:17

Is etew he egkesuat he edtuman te ebpeveelan te Megbevayà, iyan egkesayud ke ziyè be ebpuun te Megbevayà is ibpenurù ku wey ke zini zè be ebpuun te isip ku.

Ruma 11:36

Iyan sikandin sikan is nenlimbag te minsan hengkey; ne iyan sikandin ed-uwit te minsan hengkey he linimbag, ne pinaag̵i zaan te minsan hengkey he linimbag edelig̵en sikandin. Berakat he zelig̵a is Megbevayà te wazè pidtemanan.

Ruma 16:27

Is sebsevaha zà he Megbevayà he iyan dà nesayud te minsan hengkey, berakat he wazà pidtemanan te kedelig̵a kandin pinaag̵i ki Jesu Kristu.

2 Kurintu 9:8

Ne egkehimu te Megbevayà he ibeg̵ey zin kenita is subra pa zutun te egkinehenglanen ta, su wey ta layun maazen is langun he menge kinahanglan ta wey zuen ta zaan subra he igketavang ta te zuma.

Gelasya 1:5

Berakat he zelig̵a is Megbevayà te wazà pidtemanan.

Ipisu 2:10

Su is kedlimbag̵a kenita he veg̵u, ne iyan baal te Megbevayà. Pinaag̵i te kebpekidsevaha ta ki Jesus midlimbag ki zin su wey ta meulaula is meupiya he midteg̵ana zin en he zaan wey ta meveeli.

Ipisu 2:18

Tenged te kebpekidsevaha tew ki Kristu, sikami is menge Hudiyu wey sikiyu is kenà menge Hudiyu, ebpekeuvey kiw en ziyà te Amey tew he Megbevayà pinaag̵i te kedtavang te Wag̵as he Mulin-ulin.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Pilipus 2:11

ne ebpekekag̵i zan he iyan si Jesu Kristu Nengazen te minsan hengkey. Ne pinaag̵i kayi egkevantug dan daan is Amey tew he Megbevayà.

Pilipus 2:13

Su layun edtavang keniyu is Megbevayà wey niw mesuati ne wey niw mehimu is kedtumana te tuyù din diyan te keniyu.

Pilipus 4:13

Egkehimu ku is minsan hengkey he ibpeulaula kedì tenged te tavang ni Kristu he iyan edlig-en kedì.

Pilipus 4:18

Nezawat ku en is impeuwit niw ne utew subra is imbeg̵ey niw. Ne kenà ad egkealang-alang su inhated en ni Ipepruditu zini is idtavang niw kedì. Iring heini te pemuhat he utew mehemut, he ke và dà egkeg̵iya, utew igkesuat te Megbevayà.

Kulusas 3:17

Ne minsan hengkey he egkeg̵iyen niw wey ed-ul-ulahan niw, kinahanglan he zait heini he ulaula te sulug̵uen te Nengazen tew he si Jesus. Ne kinahanglan daan he layun dekelà is kebpeselemati niw te Amey tew he Megbevayà pinaag̵i te kebpekidsevaha niw ki Jesus.

Kulusas 3:20

Sikiyu is menge vatà he tumutuu te Nengazen, pemineg̵a niw layun is menge sug̵ù te g̵inikanan niw su utew heini egkesuati te Megbevayà.

Kulusas 4:12

Ebpengemusta zaan keniyu si Ipapras. Duma niw zaan he tigKulusas he sulug̵uen ni Jesu Kristu. Layun kew zin id-ampù. Ed-ampù sikandin diyà te Megbevayà he mebmelig-en wey meheg̵et is kedtuu niw ne wey meheg̵et daan is kedtumana niw te egkesuatan te Megbevayà.

1 Tiselunika 3:13

Berekati zin daan he mebmelig-en kew te kedtuu niw su wey wazà igkesewayi keniyu te menge g̵aked te Megbevayà emun diyè kew ed-etuvang te Amey tew he Megbevayà dutun te kebpekeuma te Nengazen tew he si Jesus he edumahan te langun he tumutuu kandin.

1 Tiselunika 4:3

Iyan egkesuatan te Megbevayà is: kinahanglan he zait is menge ulaula niw te etew he g̵aked din. Kinahanglan he kenè niw hileveti is kenè niw esawa.

1 Tiselunika 5:23

Is Megbevayà, ne iyan ebeg̵ey te kelinew, berakat he purungi zin lumpiyuwi is ulaula niw. Lig-eni zin is tivuuk he g̵ehinawa niw, isip niw, wey lawa niw su para wazà igkesewayi keniyu keuzemà te kedlikù te Nengazen tew he si Jesus.

1 Timoteo 1:17

Kes sebsevaha zà he Megbevayà, kenà egkeahà. Iyan sikandin hadì te minsan hengkey ne wazè din kemetayen; berakat he tehuza wey zelig̵a sikandin te wazè din pidtemanan.

1 Timoteo 5:10

Ne kinahanglan daan he nevantug sikandin tenged te menge vaal zin he meupiya iring te ked-elimahi te menge vatà, ked-elimahi te menge meg̵eliyug; nekelùlù sikandin te paa te menge tumutuu, midtavang sikandin te nengeseeng wey mibeelan din is minsan hengkey he menge meupiya.

1 Timoteo 6:16

Iyan sikandin wazà kemetayen. Diyà sikandin ed-ubpà te kerayag he kenà egkeuvayan. Wazà etew he nekeahà kandin ne kenà sikandin egkeahà te minsan hentei he etew. Berakat he zelig̵a sikandin wey medhadì sikandin te wazà pidtemanan.

2 Timoteo 3:17

Pinaag̵i te ked-istudyuwi kayi te lalag ebmetau ki is sulug̵uen te Megbevayà ne egkehimu ta is minsan hengkey he meupiya he ed-ul-ulahan.

2 Timoteo 4:18

Ne kenà dutun dà taman su edlibriyen e pa te Nengazen te minsan hengkey he ebpekekaid kedì ne edlig-enan e zin taman te ed-uwiten e zin dutun te g̵inhedian din diyà te langit. Berakat he zelig̵a sikandin te wazà pidtemanan.

Hibriyuhanen 10:36

Kinahanglan he meinentusen kew wey niw metuman is egkesuatan te Megbevayà ne human niw egkezawat is impenaad din keniyu.

Hibriyuhanen 12:23

Iring te mid-uvayan tew en is pengenayan he menge anak te Megbevayà he inlista is menge ngazan dan diyà te langit. Ne mid-uvayan tew en is Megbevayà he iyan edsusi te menge ulaula te tivuuk he menusiyà. Mid-uvayan tew zaan is gimukud te langun he menge etew he menge metazeng he minatey en he netapus en is kedlibriya kandan te mezaat he ulaula.

Hibriyuhanen 12:28

Umba, kinahanglan he zekelà is kebpeselemati tew kandin su iyan kiw menge sakup te g̵inhedian din he kenà egkehanew te wazè din pidtemanan. Kinahanglan he ed-azap kiw kandin te paag̵i he iyan egkesuatan din. Ne edtehuzan tew sikandin duma is kegkehandek;

Hibriyuhanen 13:16

Kenè niw lipati is kebpurung niw te minsan hentei he zuma niw, ne mebpetebtevangè kew su is ulaula he iring kayi, ne iring te pemuhat he egkesuatan te Megbevayà.

1 Pedro 2:5

Ne sikitew zaan is mibeg̵ayan te untung he wazà pidtemanan, ebpevayàbayè kiw kandin wey kiw zaan mehimu he iring te menge vatu he pengawid te valey he zutun ed-ezapa is Megbevayà. Ne zutun te valey zin edhimuwen kiw zin en he menge memumuhat he mibpilì din. Ne zutun, pinaag̵i te kedtavang ni Jesu Kristu, ebpekepemuhat kiw ne iyan pemuhat he egkesuatan din is: ed-ezapen tew sikandin pinaag̵i te Wag̵as he Mulin-ulin.

1 Pedro 4:2

Ne tenged kayi, puun dutun taman te kebpatey zin egkehimu he kenè din en human edtumanen is mezaat he kebayà te lawa zin, kekenà, iyan din edtumanen is egkesuatan te Megbevayà.

2 Pedro 3:18

Kinahanglan he pinaag̵i te kegkeg̵eg̵awi keniyu te Nengazen tew wey Menluluwas tew he si Jesu Kristu, med-iseg is kedsevuta niw te ibpesavut din. Berakat he iyan sikandin edelig̵en guntaan wey te wazà pidtemanan.

1 Juan 2:17

Egkehanew keuzemà is kelibutan wey egkehanew zaan is minsan hengkey he mezaat he egkesuatan te menge etew, iyan, sikan is edtuman te egkesuatan te Megbevayà, kenà mulà egkehanew, kekenà, duen din untung he wazà pidtemanan.

1 Juan 3:22

Ibeg̵ey zin kenita is ebuyuen ta su edtumanen ta is menge sug̵ù din wey ed-ul-ulahan ta is egkesuatan din.

Hudas 1:25

Edelig̵en tew sikandin su iyan dà sikandin Megbevayà; iyan sikandin Menluluwas tew pinaag̵i te Nengazen tew he si Jesu Kristu. Iyan sikandin egkevantug; iyan sikandin hadì; iyan sikandin mekeg̵eg̵ehem; iyan sikandin ebayàbayà dengan te wazè pa limbag̵a is minsan hengkey, wey g̵untaan, wey keuzemà te wazà pidtemanan.

Impezayag 4:6

Ne zutun daan te etuvangan te pinuuwà neehè ku is henduen be te meluag he zag̵at he iring te ispihu su utew metingew. Ne ziyà te teliwazà, iyan, ebpekeelingkus daan dutun te pinuuwà, duen heepat he linimbag he kedesenan he neeneb te mata is menge lawa zan diyà te egkesineruwan wey egkeiniyug̵an.

Impezayag 5:13

Ne zutun nezineg ku is kegkanta te langun he menge linimbag he ziyà te langit, dini te tanà wey ziyà daan te zizalem te tanà wey ziyà te zag̵at. Ne migkanta is langun he linimbag he ziyà te minsan hendei. Ke sikandan te, “Is ebpimpinuu ziyà te pinuuwà te edhadì wey is nati he kerehidu, delig̵a sikandan, tehuza sikandan, wey ventug̵a sikandan te wazà pidtemanan su iyan dan mekeg̵eg̵ehem!”

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.