Hibriyuhanen 11:4 - Manobo Western Bukidnon

⁴ Si Abel zengan, tenged te kedtuu zin te Megbevayà ne nehimu zin is utew pa meupiya he pemuhat kenà te impemuhat te kakey zin he si Kain. Ne tenged kayi te kedtuu ni Abel mid-isip te Megbevayà sikandin he metazeng su midawat te Megbevayà is impemuhat din. Ne minsan pa te zengan dà minatey si Abel zuen ketudluanan din kenitew tenged te mezesen is kedtuu zin.

Hibriyuhanen 11:4 교차 참조

Mateo 23:35

Tenged kayi, iyan kew edsilutan te kebpemunua te langun he menge metazeng he nevunù puunè dà dutun te kedhimetayi ki Abel he metazeng he etew zengan, taman te kedhimetayi te anak ni Berekiyas he si Zacarias he mibunù niw ziyà te pid-elangan te Valey te Megbevayà wey vangkù he pemuhatà.

Lucas 11:51

puunè pa te kedhimetayi ki Abel pehendiyà te kedhimetayi ki Zacarias he mibunù diyà te pid-elangan te simbahan he Valey te Megbevayà wey vangkù he pemuhatà. Benar is egkeg̵iyen ku he sikiyu is menge etew g̵untaan, elin kew zaan edsilutan tenged kayi!

Tito 1:16

Duen menge etew he egkeg̵iyen dan he emig̵u sikandan te Megbevayà, iyan, pinaag̵i te menge ulaula zan egketuusan ta he kuntada sikandan te Megbevayà. Utew zin sikandan egkeepesi su kenè dan ebpememineg te tutuu he tuluuwen. Ne tenged dutun kenè dan dait he ibpeulaula zin te minsan hengkey he meupiya.

Hibriyuhanen 11:2

Is menge tipehuna he etew, nezelig̵an sikandan te Megbevayà tenged te midtuuwan dan sikandin.

Hibriyuhanen 12:1

Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Hibriyuhanen 12:24

Mid-uvayan tew zaan si Jesus he iyan datù tew he midhimu te veg̵u en he paag̵i te kebpekidsevaha tew te Megbevayà. Pinaag̵i te lengesa zin nengepelisan is menge salè tew. Tuus is lengesa zin te g̵ag̵ew kenitew te Megbevayà he utew haazà meupiya kenà te lengesa ni Abel zengan su is lengesa ni Abel, iyan tuus te silut te Megbevayà.

Hibriyuhanen 5:1

Su ke zuen etew he ebpilien he lavew he memumuhat, idsarig kandin is ked-etuvang te Megbevayà ne iyan sikandin datù te menge etew. Ne idsarig daan kandin is menge ibeg̵ey ziyà te Megbevayà wey is kebpemuhat wey mepelisi is menge etew te menge mezaat he ulaula.

Hibriyuhanen 9:22

Impenurù te kesug̵uan he kinahanglan he ebpelisan te lengesa is hapit minsan hengkey he egemiten dan te ked-azap. Ne iring din ded daan wey zà egkepesaylu is menge salà te menge etew ke zuen ibpelengesa.

Hudas 1:11

Kehizu zan! Mid-iringan dan is mid-ulaula zengan ni Kain. Mid-iringan dan is paag̵i ni Belaam he utew sayep su minsan netuenan dan he mezaat is ed-ul-ulahan dan, ed-ul-ulahan dan gihapun su susuaten sikandan te selapì. Iring te midsukul si Kuri te Mebevayà, midsukul zan daan ne edsilutan sikandan iring te midsilutan daan si Kuri.