2 Timoteo 4:17 - Manobo Western Bukidnon

¹⁷ Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu. Ne tenged dutun nelibri a ne wazà a mehimetayi.

2 Timoteo 4:17 교차 참조

Mateo 10:19

Ne emun ed-uwiten kew zan diyà te hukmanan, kenè niw ikeseeng ke hengkey is egkeg̵iyen niw wey ke hengkey is paag̵i te kegkag̵i niw, su wey niw en egketuenan ke ziyè kew en te etuvangan dan su zutun ibeg̵ey keniyu is hustu he egkeg̵iyen niw.

Lucas 1:1

Minahal he Teofilo: Mezakel is migezam medsurat te g̵ug̵ud te langun he neulaula zini te kenami he inged mehitenged te menge vaal ni Jesus.

Lucas 21:15

Su iyan e en metau te idtavak niw te menge insè dan. Ne ibeg̵ey ku zutun keniyu is ketau te ked-isip-isip wey kew meketavak. Ne zutun haazà is menge kuntada niw, kenè dan ebpeketavak te ketezengan niw ne kenè dan daan ebpekepeg̵intarù te tutuu he egkeg̵iyen niw.

Nengeulaula 23:11

Ne zutun te kebmezukilem din, mibpaahà ki Pablo is Nengazen tew he si Jesus ne migkag̵i te, “Sarig ke zà su iring te impenudtul nu is kedtuu nu kedì dini te Hiruselim, kinahanglan daan he ibpenudtul nu ziyà te inged he Ruma.”

Nengeulaula 9:15

Ne migkeg̵iyan si Eneniyas te Nengazen te, “Beyai nu su nepilì ku sikandin wey zin ikesangyew is ngazan ku ziyà te menge etew he kenà Hudiyu wey minsan diyà te menge hadì wey ziyà daan te menge zuma nu he kevuwazan ni Israyil.

Ruma 15:31

Iampù niw he kenà a mekeizi te menge etew he kenà tumutuu ziyà te inged he Hiruselim. Iampù niw zaan he ikelipey te menge tumutuu ziyà te Hiruselim heini is selapì he idhated ku kandan.

2 Kurintu 12:9

iyan, iyan tavak din kediey is, “Edtevangan ku sikew wey nu maantus ne hustu en. Su zekelà is egkehimu te g̵ehem ku ziyan te kenikew emun wazè nu en egkehimu,” ke sikandin. Ne tenged kayi utew ku egkesuati he idantal ku is kurang ku te ketau su wey a melig-eni te g̵ehem ni Kristu.

Ipisu 3:8

Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

1 Timoteo 1:12

Ebpeselematan ku is Nengazen tew he si Jesu Kristu su mibeg̵ayan e zin te zesen wey ku metuman heini is ebpeveelan din kedì. Mid-isip e zin he metinumanen ne tenged kayi intezù e zin he sulug̵uen din.

2 Timoteo 2:1

Sikew, Timoteo, is iring te tutuu he anak ku, heg̵eta nu is kedtuu nu su zekelà is tavang te Megbevayà kenita tenged te nekidsevaha ki ki Jesu Kristu.

2 Timoteo 2:9

Ne tenged kayi te kebpenudtul ku te Meupiya he Tudtulanen midrasey a te menge kuntada te Megbevayà ne neeg̵en a te kedina he iring te mesinupaken, iyan, kenà mulà egkeeg̵en is Lalag te Megbevayà.

2 Timoteo 3:11

Netuenan nu zaan is menge kemeresayan wey menge keseengan he nengeantus ku. Netuenan nu zaan is langun he neeg̵iyan ku ziyà te menge inged he Entiyukya, wey Ikunya, wey Listera wey is langun he utew merasey he naantus ku. Is Megbevayà, ne midlibri e zin kayi te langun.

2 Timoteo 4:5

Iyan, sikew mulà, tengkai nu is ed-ul-ulahan nu te minsan keenu he timpu. Entusa nu is kemereg̵enan. Peniguduwi nu te edsangyew is Meupiya he Tudtulanen. Purungi nu tumana is langun he ebpeveelan kenikew te Megbevayà.

Hibriyuhanen 11:33

Su pinaag̵i te kedtuu zan te Megbevayà nengezaag te zuma kandan is menge sundaru te menge zekelà he inged. Ne is menge zuma pa, metazeng is kedhedii zan te menge sakup dan, ne is duma pa, nezawat dan is impenaad kandan te Megbevayà, ne is duma, nezaag dan is ebpekekaid he erimaung ne wazè dan mekag̵at.

1 Pedro 5:8

Med-andam kew, mebantey kew su is kuntada tew he si Setanas, edrig̵urig̵u en he iring te erimaung he edhinig̵er su ebpen-ahà te edewiyen din.

2 Pedro 2:9

Iyan, is menge etew mulà he ed-azap te Nengazen, metau sikandin he edtavang kandan wey kenè dan mekesalà ke ebpenulayen sikandan. Metau zaan sikandin he ebakus te menge nemematey he lalung su wey itag̵ad sikandan taman te andew te kedsiluti zin kandan.