2 Timoteo 2:19 - Manobo Western Bukidnon

¹⁹ Ne minsan pa zutun kenà egkehalin kes tuluuwen he midtukud te Megbevayà su zuen insurat he Lalag te Megbevayà he edhenduen te, “Egketuenan te Nengazen ke hentei is menge etew he g̵aked din,” wey zuen pa zaan lalag he edhenduen te, “Is minsan hentei he egkag̵i he g̵aked sikandin te Nengazen, ne kinahanglan he ed-iniyug̵an din is mezaat he ulaula.”

2 Timoteo 2:19 교차 참조

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Mateo 28:19

Umba, penhipanew kew en diyà te minsan hendei wey niw metukid te ebpesavut is langun he menge etew ziyà te langun he menge inged. Ne penurua niw he medsundan dan kedì. Pemewtismuwi niw sikandan wey metueni he nekidsevaha zan te Amey tew he Megbevayà, wey siak is Anak din, wey is Wag̵as he Mulin-ulin.

Mateo 7:23

Ne iyan tavak ku kandan dutun is: ‘Kenè ku sikiyu egkekilala. Sikiyu is memezaat is ulaula, awà kew kayi!’

Mateo 7:25

Ne mibegyuwan. Mid-uzan te mereg̵es ne midalem is menge wahig ne utew mevendes is keramag, iyan, wazà merundus haazà is baley su ziyà benguna te zivavew te zekelà he vatu.

Marcos 12:16

Ne impeehè dan dutun ki Jesus is sengeelad he selapì. Ne ke si Jesus te, “Hentei ki zagwey wey ngazan heini is nekesurat kayi?” Ne midtavak dan te, “Ngazan wey zagwey te hadì diyà te Ruma.”

Marcos 13:22

Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Lucas 13:27

Ne edtevaken kew zin te, ‘Kenè ku iyan egketuenan ke hentei kew wey ke hendei kew ebpuun. Sikiyu is memezaat is ulaula, awè kew en dini.’

Lucas 6:48

iring sikandin te etew he ebevaley te melig-en diyà te zivavew te zekelà he vatu. Memezalem is bangbang din he mibpesekan din te tukud. Ne nepasad haazà is baley ne mibagyu ne midalem is wahig ne nesug̵at haazà is baley te meseleg he wahig, iyan, wazà merundus su nevig̵eran man.

Juan 10:14

Iyan a kes ed-elima te menge kerehidu he utew meelima. Netuenan ku ke hentei is Amey ku, ne netuenan din daan ke hentei a is anak din. Iring din ded daan is menge etew he g̵aked ku, netuenan dan ke hentei a ne egketuenan ku zaan ke hentei sikandan, ne ebpehimatey a he elili te menge etew he g̵aked ku.

Juan 13:18

Kenè kew pudu is egkeg̵iyan ku kayi su netuenan ku ke hengkey is gehinawa te uman sevaha keniyu te menge pinilì ku. Duen sevaha keniyu he ed-ekalan e zin. Umba egkeulaula heini su wey metuman sikan is netagnà dengan diyà te insurat he Lalag te Megbevayà he edhenduen te, ‘Is duma ku he ebpekidtug̵en kediey, iyan nehimu he kuntada ku.’

Juan 3:33

Iyan, is minsan hentei he edawat kayi ebpekepenistig̵us he tutuu is egkeg̵iyen te Megbevayà.

Nengeulaula 11:26

Ne hein neturedu zin, miduma zin diyà te Entiyukya. Ne seled te sengetuig, diyè dan is dezuwa med-amur te menge tumutuu ziyà te Entiyukya ne mezakel is mibpemenurù dan. Ne ziyà te Entiyukya, sikan is menge sumusundan, aney en gerari he menge Kristiyanus.

Nengeulaula 15:17

Umba, is tivuuk he menusiyà, sikan is langun he menge etew he edhimuwen ku he meketuu kediey, egkesuat dan daan he ed-azap kediey.’

Nengeulaula 9:14

Ne midhendini te Demasku su intug̵ut kandin te menge punuan he memumuhat is kebpendekepa te langun he ebpengumew-umew kenikew.”

Ruma 11:2

Is Megbevayà, ne kenà egkehimu he ed-engkezan din is menge etew he nepilì din dengan te wazè pa limbag̵a is minsan hengkey. Egkesavut ta heini ziyà te insurat dengan mehitenged ki Elias su hein mid-ampù sikandin diyà te Megbevayà tenged te menge mezaat he ulaula te menge zuma zin he menge kevuwazan ni Israyil, ke sikandin diyà te Megbevayà te,

Ruma 12:9

Kinahanglan he kenà tarù is kegkeg̵eg̵awi ta te menge zuma ta. Kinahanglan he utew ta igkeepes is mezaat he ulaula. Edhemenan ta is meupiya he ulaula.

Ruma 15:20

Ne egkesuatan ku layun he mepenudtul ku is Meupiya he Tudtulanen diyà te menge inged he wazè pa zutun mezineg is ngazan ni Kristu. Umba ed-ul-ulahan ku heini su wey ku kenà mesublì te ebpenudtul te Meupiya he Tudtulanen is menge etew he netudtulan en te zuma.

Ruma 15:9

Ne elin daan ketezengan ke maan is neulaula heini su wey sikiyu is kenà menge Hudiyu, mehizuwi kew zaan te Megbevayà ne tenged kayi ebpekezalig kew zaan kandin. Su zuen insurat he lalag ni Kristu ziyà te Megbevayà he edhenduen te, “Siak wey is menge etew he kenà menge Hudiyu, utew zekelà is kebpeselemati zey kenikew ne egkentahan ku is kedalig kenikew.”

Ruma 8:28

Sikitew is langun he mahal is Megbevayà diyà te g̵ehinawa zin, sikitew is midhimu zin he meketuu sumalà is tuyù diyà te isip din, netuenan tew he pinaag̵i te minsan hengkey he egkehitavù kenitew, edtuvazan kiw zin gihapun te meupiya.

Ruma 9:11

Ne si Rebecca, hein meg̵aan en ed-anak, migkeg̵iyan sikandin te Megbevayà, ke sikandin te, “Sulug̵uen is kakey te hazi zin.” Migkag̵i zin heini te wazè pa ianak haazà is sereping, ne wazè pa ulaula zan he mezaat wey meupiya. Ne umba neulaula heini su ibpesavut te Megbevayà he is kebpilia zin te menge etew, ne kenà tenged te menge meupiya he ulaula he nehimu zan, kekenà, tenged dà te iyan egkesuatan din.

1 Kurintu 8:3

Ne haazà mulà is etew he mahal ziyà te gehinawa zin is Megbevayà, iyan sikandin kes migkag̵i te Megbevayà he g̵aked din.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Gelasya 4:9

Iyan, guntaan te nekilala niw en is Megbevayà iring te kegkekilelaa zin keniyu, maan is edlikuan niw is wazà pulus he menge tuluuwen he kenà ebpekelibri keniyu te silut? Maan is egkesuatan niw he meuripen kew en maan kayi?

Ipisu 2:20

Ne sikitew is menge tumutuu, iring kiw te valey he ibpehitindeg te Megbevayà diyà te vatu. Iyan si Kristu kes batu he edtukuzan kayi te valey. Is menge epustul wey ebpemeneuven te Megbevayà, ne iyan menge tukud. Ne iyan kew menge zuma he himan kayi te valey.

Ipisu 3:15

Is langun he menge tumutuu he zini pa te lumpad wey ke ziyè en be te langit, ne migngezanan din sikandan he pemilya zin.

Ipisu 4:30

Ne kenè niw ul-ulaha is minsan hengkey he kenà egkesuatan te Wag̵as he Mulin-ulin su iyan sikandin tuus diyan te keniyu he g̵aked kew te Megbevayà, wey tuus daan he keuzemà egkeuma is andew he zutun edhimesaza te Megbevayà is langun he nepuunan din en he vaal te kedlibriya zin keniyu te kebpekesalà.

1 Timoteo 3:15

Umba ebpesuratan ku sikew su kela ke mesanggen a. Ne emun egkesanggen a egketuenan nu g̵ihapun ke hengkey is hustu he ed-ul-ulahan he zait tew te menge anak te Megbevayà. Iyan kiw iglisya, he ke và dà egkeg̵iya, menge tumutuu te wazè din kemetayen he Megbevayà. Iyan kiw kes menge tukud wey vangel he zutun mekesavuk is tutuu he tuluuwen.

1 Timoteo 6:19

Pinaag̵i kayi egkekuwa zan is hustu he ketig̵eyunan he kenè dan egkesuwey keuzemà. Ne ebpekeangken dan te untung he iyan tutuu he untung.

Hibriyuhanen 11:10

Su si Abraham, ne iyan hustu he ebperetengen din he inged sikan is inged diyà te langit he kenà egkezeetan te wazè din pidtemanan. Ne iyan mibpelanu wey mibaal kayi is Megbevayà.

2 Pedro 3:14

Na menge suled, geina te kemulu tew pa edteg̵azi haazà is andew, kinahanglan he ebpurungan tew edtengkai is menge ulaula tew su wey wazà igkesewayi kenitew te Megbevayà ne wey melinew is kedepità te uman sevaha kenitew ziyà te kandin.

1 Juan 2:19

Ne heini is menge kuntada ni Kristu, kenè tew sikandan tutuu he menge zuma su umba mid-ewaan kiw zan. Angin ke tutuu zan he zuma tew su wazè kiw zan geina ewai. Tenged te ked-awè dan egketuenan ta he kenè dan tutuu he menge zuma tew.

Impezayag 17:8

Heeyan is langgam he egkeehè nu, ne zini sikandin te kelibutan dengan, iyan, wazè en guntaan. Ne meg̵aan en maan edlepew he ebpuun te vitu he wazà pidtemanan is kezalem din, ne zutun te kedlepew zin, id-agbur sikandin diyà te Impirnu su edsilutan. Ne is langun he menge etew he zengan te wazè pa limbag̵a is kelibutan, wazà isurat is menge ngazan dan diyà te libru he zutun ilista is langun he ebeg̵ayan te untung, utew zan egkengeinuinu zutun te ked-ehè dan te langgam. Iyan igkengeinuinu zan su haazà is langgam, dengan uuyag ne minatey en guntaan, iyan, egkevanhew zed.

Impezayag 2:13

Netuenan ku he sakup ni Setanas is inged niw. Ne minsan pa zutun midhemenan niw is kedtuu niw kedì ne wazè niw engkezi is menge penurù ku minsan dutun te kedhimetayi ki Entipas dengan. Metinumanen sikandin he ebpenudtul te menge lalag ku, ne midhimetayan sikandin diyan te inged niw he nesakup ni Setanas.

Impezayag 21:14

Ne is elavat dutun te inged, ne sepulù wey zezuwa is impepinuuwan dutun he zekelà he vatu. Ne midsuratan haazà is menge vatu te menge ngazan te sepulù wey zezuwa he menge epustul zuen te nati he kerehidu.

Impezayag 22:4

Egkeehè dan is paras din ne haazà is menge sulug̵uen, edsuratan is menge vuked dan te ngazan din.

Impezayag 3:8

Netuenan ku is menge ulaula niw. Ne minsan pa te pirapira kew zà he leg̵as, metinumanen kew te menge lalag ku ne wazè niw engkezi is kedtuu niw kediey. Umba, is gemawan he ibayè niw, mibpuwasan ku en ne kenè en egkelekevan te minsan hentei, he ke và dà egkeg̵iya, wazè en ebpekesanggen keniyu te ibpeulaula ku keniyu.