25 ꤞꤢꤧꤕꤜꤢꤪ꤬ꤊꤟꤢꤨꤊꤟꤛꤢ꤭ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ꤕꤛꤢꤩꤗꤟꤢꤩ꤬ꤊꤛꤢ꤭ ꤢꤨ꤭ꤞꤢꤧꤕꤜꤢꤪ꤬꤯ ꤍꤟꤥꤗꤟꤥ꤬ꤍꤟꤥꤚꤛꤢ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭ ꤜꤢꤨ꤭꤯
ꤢ꤬ꤏꤢꤧ꤭ꤡꤟꤛꤢꤩ꤭ꤏꤢꤧ꤭ꤡꤟꤢꤦ꤬ ꤔꤛꤢ꤬ꤡꤢꤪ ꤠꤢ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭, ꤠꤢ꤭ ꤍꤟꤢꤪ꤬ꤒꤢ꤬ꤊꤟꤢꤪ꤬ꤜꤟꤛꤢ꤬ ꤔꤟꤤ ꤊꤛꤢ꤭ ꤡꤢꤪ꤯ ꤠꤢ꤭ꤍꤟꤌꤣꤠꤢ꤭ꤟꤢꤧ꤬ ꤡꤢꤪ ꤒꤣ꤬ꤑꤢꤩ꤭꤮ ꤗꤟꤢꤪꤟꤢꤩ꤯
ꤣ꤮ ꤠꤢ꤭ ꤡꤛꤣ ꤞꤢꤧꤕꤜꤟꤢꤧ꤭ꤔꤟꤢꤩ꤬ꤙꤢꤧ꤬ ꤔꤛꤢ꤬ꤡꤢꤪ ꤗꤟꤢꤩ꤬ꤒꤢꤩ꤭? ꤠꤢ꤭ ꤡꤛꤣ ꤊꤟꤢꤨꤊꤟꤛꤢ꤭ ꤔꤛꤢ꤬ꤡꤢꤪ ꤗꤟꤢꤩ꤬ꤒꤢꤩ꤭? ꤒꤢ꤬ꤚꤟꤢꤨ꤮ ꤗꤛꤢꤏꤢꤦ꤭ ꤡꤢꤪꤗꤢ꤬ꤚꤛꤢ꤬ꤘꤢꤨ꤬ ꤔꤌꤣ꤬, ꤠꤢ꤭ ꤊꤟꤢꤦ ꤓꤢꤨ꤬ꤞꤢꤧꤓꤛꤢ꤬ ꤋꤛꤢꤩ꤭ꤞꤛꤢ ꤡꤢꤪꤗꤢ꤬ꤚꤛꤢ꤬ꤘꤢꤨ꤬ ꤘꤣ ꤢ꤬ ꤗꤟꤢꤩ꤬ꤏꤤ꤬ꤕꤜꤢꤧꤊꤟꤢ꤬ ꤠꤢ꤭, ꤗꤟꤢꤟꤢꤪ ꤠꤢ꤭ꤡꤢꤪꤗꤢ꤬ꤚꤛꤢ꤬ꤘꤢꤨ꤬ ꤛꤢꤩ꤭ꤒꤣ꤬ꤕꤚꤟꤢꤧ꤬꤯
ꤍꤟꤥ ꤙꤢꤪ꤭ꤙꤛꤢꤩ꤬ ꤗꤢ꤬, ꤢ꤬ꤓꤛꤢ꤭ ꤞꤛꤢꤔꤢ ꤔꤢꤧ꤯ ꤍꤟꤥ ꤞꤤꤖꤢꤧ ꤗꤢ꤬, ꤢ꤬ ꤗꤟꤢꤩ꤬ꤏꤤ꤭ꤗꤟꤢꤩ ꤢꤨ꤭ꤒꤟꤢꤧ꤬ꤏꤢꤧ꤭꤯
ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤗꤢ꤬, ꤢ꤬ ꤐꤟꤢꤨ꤭ ꤕꤢꤩ ꤢ꤬ꤋꤥ꤭ ꤊꤜꤛꤢ꤯ ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤗꤢ꤬, ꤢ꤬ ꤡꤛꤣꤊꤜꤛꤢ ꤔꤌꤣ꤬ꤒꤣ꤬ꤙꤥ꤭ ꤞꤢꤨ꤭ꤞꤢꤦꤔꤟꤤ ꤋꤛꤢꤩ꤭ꤞꤛꤢꤘꤢꤦ꤬ ꤜꤢꤨ꤭꤯
ꤒꤣ꤬ꤕꤚꤟꤢꤧ꤬ ꤔꤢ ꤒꤣ꤬ꤕꤚꤟꤢꤧ꤬ ꤞꤢꤧꤑꤢꤩ꤭ ꤔꤟꤤꤘꤢꤦ꤬ ꤢ꤬ꤒꤟꤢꤧ꤬ꤞꤢꤧꤕꤜꤟꤢꤧ꤭꤯ ꤢꤨ꤭ ꤤ꤬ꤙꤢꤩ꤭ꤡꤟꤛꤢ ꤕꤢꤩꤋꤛꤢꤩ꤭ ꤜꤢꤨ꤭ ꤒꤟꤢꤧ꤬ꤞꤢꤧꤊꤚꤟꤢꤦ꤭ ꤒꤣ꤬ꤕꤚꤟꤢꤧ꤬꤮ ꤒꤥ꤬꤯
ꤊꤢ꤬ꤛꤢ꤭ ꤞꤢꤧꤕꤜꤢꤪ꤬ꤗꤟꤥ꤬ ꤗꤢ꤬, ꤢ꤬ ꤑꤟꤢꤩ꤭ꤒꤢ꤬ꤊꤚꤥ꤭꤯ ꤒꤟꤢꤧ꤬ꤞꤢꤧꤕꤜꤟꤢꤧ꤭ ꤗꤟꤢꤩ꤬ꤕꤛꤢꤩ ꤢꤨ꤭ꤞꤢꤧꤕꤜꤢꤪ꤬꤯
ꤊꤢ꤬ꤛꤢ꤭ ꤘꤣ ꤢꤨ꤭ ꤗꤟꤢꤩ꤬ꤡꤟꤛꤢꤩ꤭ ꤜꤢꤨ꤭ ꤔꤌꤣ꤬, ꤢ꤬ꤕꤟꤛꤢꤢ꤬ꤏꤢꤧ꤭ ꤡꤢꤪ ꤜꤢꤨ꤭ ꤕꤝꤟꤥ꤭꤮ ꤒꤣ꤬ꤑꤢꤩ꤭ ꤡꤢꤪ꤯ ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭ ꤔꤌꤣ꤬, ꤢ꤬ꤞꤛꤢꤔꤢ ꤢ꤬ ꤗꤟꤢꤩ꤬ꤕꤝꤢꤧ꤬ꤗꤟꤢꤩ꤬ꤜꤢ꤭ ꤕꤝꤟꤥ꤭꤮ ꤒꤣ꤬ꤑꤢꤩ꤭꤯
ꤕꤚꤟꤢꤧ꤬ꤜꤟꤢꤨ꤬ ꤞꤢꤧꤊꤚꤟꤢꤦ꤭ ꤔꤟꤤꤘꤛꤢꤩ ꤔꤢ ꤢ꤬ ꤟꤢꤩꤏꤢꤦ꤬ ꤕꤢꤩ ꤢꤨ꤭ ꤍꤟꤥꤔꤟꤤꤙꤝꤤ꤯ ꤟꤢꤩꤙꤢꤧ꤬ ꤒꤥ꤭ꤏꤛꤣꤒꤥ꤭ꤋꤢꤧ꤭ ꤍꤟꤥ ꤗꤢ꤬, ꤢ꤬ꤚꤛꤢ ꤔꤛꤢ꤬ꤡꤢꤪ꤯
ꤒꤟꤢꤧ꤬ꤑꤟꤢꤩ꤭ꤒꤢ꤬ꤊꤚꤥ꤭ ꤗꤟꤢꤩ꤬ꤗꤟꤥ꤬ ꤢꤨ꤭ꤞꤢꤧꤕꤜꤢꤪ꤬꤯ ꤒꤟꤢꤧ꤬ꤚꤤ꤬ꤒꤟꤢꤧ꤬ꤊꤛꤢ꤭ ꤘꤣ ꤢ꤬ꤚꤛꤢ ꤘꤛꤢꤩꤥ꤬ꤏꤛꤥ꤬ꤥ꤬ꤕꤚꤛꤢ꤭ ꤋꤛꤢꤩ꤭ꤞꤛꤢ ꤔꤟꤢꤩꤊꤜꤟꤢꤪ꤯
ꤟꤢꤩꤙꤢꤧ꤬ꤗꤟꤥ꤬ꤟꤢꤩꤙꤢꤧ꤬ꤚꤛꤢ ꤍꤟꤥ ꤔꤌꤣ꤬, ꤢ꤬ꤞꤛꤢꤔꤢ ꤠꤛꤢꤓꤛꤢꤩ꤭ ꤥ꤬ ꤘꤣ ꤢ꤬ꤕꤛꤢꤩ꤬ꤊꤢꤨ꤭ ꤒꤟꤢ꤭ꤗꤢꤧ꤭꤯ ꤢ꤬ ꤘꤛꤢꤩ ꤗꤟꤥ꤬ꤞꤢꤨ꤬ꤗꤟꤥ꤬ꤞꤢꤧ ꤞꤢꤧꤕꤜꤢꤪ꤬, ꤢ꤬ ꤘꤛꤢꤩ ꤥ꤬ꤏꤛꤥ꤬ꤥ꤬ꤕꤚꤛꤢ꤭ ꤔꤟꤢꤩꤊꤜꤟꤢꤪ꤯
ꤒꤟꤢꤧ꤬ꤞꤢꤧꤊꤚꤟꤢꤦ꤭ ꤔꤌꤣ꤬ꤗꤢ꤬, ꤒꤟꤢꤧ꤬ꤋꤢꤨ꤬ ꤘꤣ ꤢ꤬ꤚꤛꤢ ꤒꤣ꤬ꤡꤣ꤬꤯ ꤒꤟꤢꤧ꤬ꤞꤢꤧꤕꤜꤢꤪ꤬ꤕꤛꤢꤩ ꤔꤌꤣ꤬ꤗꤢ꤬, ꤞꤢꤧꤘꤥ꤭ꤘꤥ꤭꤮ ꤢ꤬ ꤗꤟꤢꤩ꤬ ꤡꤟꤢꤧꤊꤢ꤬ꤜꤟꤛꤢ꤬ ꤢꤨ꤭ꤟꤢꤧ꤭ꤚꤢꤩ꤬꤯
ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤕꤜꤢꤪ꤬ꤏꤛꤥ꤬ ꤞꤢꤧꤕꤜꤢꤪ꤬ꤏꤢꤪ꤭ ꤔꤌꤣ꤬, ꤢ꤬ ꤋꤛꤢ꤭ꤙꤢꤧ ꤒꤟꤢꤧ꤬ꤏꤝꤤꤒꤟꤢꤧ꤬ꤏꤢꤧ꤭꤯ ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤕꤜꤢꤪ꤬ꤕꤛꤢꤩ ꤔꤛꤢ꤬ꤡꤢꤪ ꤔꤌꤣ꤬, ꤢ꤬ ꤋꤛꤢ꤭ꤙꤢꤧꤡꤟꤛꤢ ꤒꤟꤢꤧ꤬ꤞꤢꤧꤕꤜꤢꤪ꤬ꤕꤛꤢꤩ ꤢ꤬ꤜꤟꤢꤩ ꤒꤥ꤬꤯
ꤟꤢꤩꤙꤢꤧ꤬ ꤒꤟꤢ꤭ꤒꤥ꤭ꤒꤟꤢ꤭ꤙꤢꤧ꤬ ꤍꤟꤥ ꤔꤌꤣ꤬ꤗꤢ꤬, ꤢ꤬ꤞꤛꤢꤔꤢ ꤢꤨ꤭ ꤏꤢꤨ꤬ꤔꤟꤌꤣ꤭ꤒꤝꤟꤥ ꤓꤢꤧ꤭ꤗꤢꤧ꤬ꤞꤢꤧ꤬ꤕꤜꤢꤪ꤬ ꤘꤣ ꤚꤢꤦ꤭ꤜꤟꤥ꤬ ꤔꤌꤣ꤬ꤡꤢꤪ꤯
ꤗꤢꤢꤨ꤭ꤓꤛꤢꤩ꤭ ꤔꤢ ꤒꤟꤢꤧ꤬ꤔꤟꤌꤣ꤬ꤗꤢꤦ ꤗꤟꤢꤩ꤬ꤞꤢꤧꤊꤚꤟꤢꤦ꤭ ꤢꤨ꤭꤯ ꤋꤥ꤭ꤙꤢꤪꤞꤛꤥ ꤘꤣ ꤢ꤬ ꤘꤛꤢꤩꤞꤢꤧꤑꤢꤩ꤭ꤡꤝꤟꤥ ꤡꤟꤛꤢꤒꤟꤢꤧ꤬ ꤔꤌꤣ꤬, ꤢ꤬ꤚꤛꤢ ꤊꤜꤢꤪ꤭ꤕꤢ꤭ ꤡꤢꤪ ꤔꤢ ꤒꤟꤢꤧ꤬ꤔꤟꤌꤣ꤬ꤗꤢꤦ ꤔꤌꤣ꤬ꤒꤢ꤬ꤟꤢꤩ꤬꤯
