Lúkɑ́shi 23:2 - Kɑɑ Fí

² Ńzɛ nɛfɛn wɛ́ ŋɡɔ: «Pɛk jʉ́ɔ ŋu wɔ pɔ́ ńjúk ŋ́kɑ́t tsɛt ŋɡɔŋ wɛk ḿbʉ́ʉpɛ tú-lɑ́Ꞌ, ńtɔꞋ wɔ́p nɛmɑꞋ ntsup-ntʉ̈ɔꞋ, ŋ́ɡɑ́ mbɔ̌ kɑ́sɑ-Pɑlɔ́mɑ. A pɛn ḿbɔ́ ńcú ŋɡɔ ɑ Nzɑ́Ꞌŋkʉ ẅí Sɛ́ kɑ kɑꞋnɛ mbɔ̌ pɛk, ńdɔk ńcú ŋɡɔ ɑ fɔɔ.»

Lúkɑ́shi 23:2 교차 참조

Mɑtʉ̈ɔ 17:27

Lɑ́ kɔɔ pûu ɡɛ nu pʉ́k pɑcẅɛ́ɛ ntsup. Gʉ ŋki ḿmɑꞋ mbɑꞋ. Ɔ ɡʉ ŋ́ɡẅɛɛ nduŋmbi mbɑŋ shú, ŋíɛꞋ ntsu wɛ́, ńjʉ́ɔ pɑk-ŋkɑ́p, ńcẅɛɛtɛ ńdɔk ŋ́ɡʉ ḿmɑꞋ yúu ntsup.

Mɑtʉ̈ɔ 22:21

Pɔ́p pʉ̈ɔt mbɔ̌ wɛ́ ŋɡɔ: “Ɛ́ shʉ́-Kɑ́sɑ, lík pɛn ḿbɔ́ pɔ yɛ́.” Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: “Ɛ́ lɑɑ ḿbɔ́ pɔ́Ꞌɔ, pʉʉ ɡɑ́ yúu mi ɛ́ yɛ́ Kɑ́sɑ mbɔ̌ Kɑ́sɑ, ŋ́ɡɑ́ yɛ́ Sɛ́ mbɔ̌ Sɛ́.”»

Mɑtʉ̈ɔ 27:11

Yɛ́su kúu mbi Ŋɡɔ́mnɑɑ Pilɑtɔ, ɑ píkŋɛ wɛ́ ŋɡɔ: «Ɔ fɔɔ-pɑyúdɑ ɔɔ?» Yɛ́su pʉ̈ɔt mbɔ̌ wɛ́ ŋɡɔ: «Ɔ cú pɔ́Ꞌɔ.»

Mɑ́lɛ́kúshi 12:17

A cú mbɔ̌ pɔ́p ŋɡɔ: «Ɛ́ lɑɑ ḿbɔ́ pɔ́Ꞌɔ, pʉʉ ɡɑ́ yúu-Kɑ́sɑ mbɔ̌ Kɑ́sɑ, ŋ́ɡɑ́ yɛ́ Sɛ́ mbɔ̌ Sɛ́.» Pɔ́p zúꞋ ntɛ́ yi ɑ lɔknɛ ḿbʉ̈ɔt, ɛ́ kʉꞋnɛ wɔ́p tɛꞋ. Ntsu wɔ́p zúu.

Mɑ́lɛ́kúshi 15:2

Pilɑtɔ píkŋɛ wɛ́ ŋɡɔ: «Ɔ fɔɔ-pɑyúdɑ?» Yɛ́su tsɔ́Ꞌ mbɔ̌ wɛ́ ŋɡɔ: «Ɔ cú pɔ́Ꞌɔ.»

Lúkɑ́shi 23:14

ńcú mbɔ̌ pɔ́p ŋɡɔ: «Pʉʉ lɑ́Ꞌ ŋ́ɡɔ ńdɔk ŋu wɔ ńtɔ́ mbi mɔ, ńcú ŋɡɔ ɑ sɛ́ ḿbʉ́ʉpɛ tú-lɑ́Ꞌ. Ŋ ŋɑk wɛ́ pɔ mbi pʉʉ. Ŋ ɡʉ nǔu mɛnu mi pʉʉ lɑ́Ꞌnɛ ńcú nǔu wɛ, ŋ kɑ́ jʉ́ɔ yɛcɔ́ mɛfɑɑnɛ pɔ́.

Lúkɑ́shi 23:5

Lɑ́ pɔ́p tsúŋ ńnʉʉ nʉʉnɛ, ńcú ŋɡɔ: «A sɛ́ mbɔ́ ŋ́kɑ́t ɛ́swɛtɛ pʉɔ ŋɡɔ pɔ́p tʉʉ tú. A kɑ zɛ Ŋɡɑlilɛɛ, ŋ́kúu Jẅidɛ̂, ɛ́ pʉ́ɔ lɑɑ ɑ lɔknɛ ńtɔ́ tɔ́nɛ tɛ ŋ́kúu zɑ́Ꞌnɛ lɑɑnɛ.»

Jɑ̂ŋ 18:29

Pilɑ́tɔ kẅɛ́ɛtɛ wɔ́p píi, ńcú ŋɡɔ: «Pʉʉ ɛ́fɛn ŋu wɔ mɛlɑ́Ꞌkʉ̈ɔ́?»

Jɑ̂ŋ 18:30

Pɔ́p tsɔ́Ꞌ ŋɡɔ: «Ŋu ɛ̂wɑ́ lɑ́Ꞌ ḿbɔ́ pɛ́Ꞌɛ ḿbɔɔ nu kɛpɔŋ ɡɛ, mbɔ pɛk kɑ́ lɔk wɛ́ ńtɔ́ mbi wú pɔ́.»

Jɑ̂ŋ 19:12

Pilɑ́tɔ zɛ ŋkɑ́ ɛ̂yɑ́ nɛlɔɔ shʉ́ pɑ́Ꞌ ɑ ɡʉ ńnɑ́ Yɛ́su. Lɑ́ Pɑyúdɑ zɛ nɛɡɑ́ ɡwɑ́t ŋɡɔ: «Ɔ lɑɑ ńnɑ́ wɛ́, mbɔ ɔ kɑ́ pɔ́ súu-kɑ́sɑ-pɑlɔ́mɑ pɔ́. Ŋu ẅí ɑ cúnɛ ŋɡɔ ɑ fɔɔ, ɑ pɔ ŋɡɑŋmbuu-Kɑ́sɑ.»

ŊwɑꞋnɛ-Gɑŋntúu Yɛ́su Kɛlístɔ 24:13

Mɛnu mɑ́ mi pʉɔ tíknɛ tú mɔ lɑ́, pɛ́ lɑɑ ŋɡɔ pɛɡɑŋ pɛ́ɛtɛ pɔ́p pɔɔ jí nɛpɛ́ɛtɛ pɔ́.

ŊwɑꞋnɛ-Gɑŋntúu Yɛ́su Kɛlístɔ 24:5

Pɛk kɑ jʉ́ɔ ŋu wɔ ɑ pɔ́ ŋu ẅi ɛ́ lɑɑ ḿbɔ́ pɛ́ pɔ́k wɛ́ tɛꞋ. A sɛ́ ḿmɑꞋ ntɑkŋɛ tsɛtsɛt pɑyúdɑ tsʉʉ, zʉꞋ tsʉʉ ndǔ tsɛ́tsɑ́Ꞌ. A pɑ́Ꞌɑ ḿbɔ́ tɑ́tndɑ́-pɛcɔ́ pɑfɑk mbʉʉ pi pɛ́ fúŋnɛ wɔ́p ŋɡɔ Nɑzɑlɛyɛ̂ŋ.

Pʉɔ-Lɔ́mɑ 13:7

Pɔ́Ꞌɔ lɑ́, ɛ́ ɡʉ nǔu pɑsɑ́Ꞌŋɡɔŋ, pʉʉ ɡɑ́ yúu mi ɛ́ sɛ́ ḿbíkŋɛ ŋɡɔ pʉʉ ɡɑ́ mbɔ̌ mbɑ wɛ́tɛ́ ŋu lɑ́ mbɔ̌ wɛ́. Ɛ́ lɑɑ ḿbɔ́ ntsup-ŋɡɔŋ, pʉʉ ɡɑ́ mbɔ̌ ŋu ẅí ɑ cẅɛ́ɛnɛ ntsup-ŋɡɔŋ, ḿbɔ́ ŋkɑ́p yi nɛpʉ́ʉ sɛ́ ḿbíkŋɛ mbɔ̌ pʉʉ nǔu yɛcɔ́ nu, pʉʉ ɡɑ́ mbɔ̌ ŋu ẅí ɑ cẅɛ́ɛnɛ. Pʉʉ zúꞋ ntsu-ŋu ẅí ɛ́ sɛ́ ḿbíkŋɛ ŋɡɔ pɛ́ zúꞋ ntsu wɛ́, ŋ́ɡɑ́ mɛkuꞋ ŋu ẅí ɛ́ sɛ́ ḿbíkŋɛ ŋɡɔ pɛ́ ɡɑ́ mɛkuꞋ mɛ́.