26 آ سجّهێن کارزانتێن جنێن که دلا پرماتنت، پَسئے مودِشَ زرت و جَلّکئے کارِشَ کرت.
هرکَس که دلا پرمات و اَرواها سِکێن دات، آییا په شاهدیئے تَمبوئے کاران، په سجّهێن هِزمتی کاران و په پاکێن گُدان شُگرانهَ آورت.
سجّهێن هُنرمندێن جنێنان جَلّکئے کار دستا کرت و اے چیزِّشَ گوَپت و آورتنت: آسمانی و جَمو و سُهرێن پَژم و شَرّێن لیلُم.
مهلوکئے سرۆکان په اێپۆد و سێنَگ‌پۆشا سِنگِ سُلئیمان و دگه گران‌کیمّتێن سِنگَ آورت.
اِسراییلئے هر جنێن و مردێنے که دلا پرمات، آییا په هُداوندا هما ٹێکیَ آورت که دلا گوَشت، په اے سَرجمێن کارا که هُداوندا موسّائے وَسیلها هُکم داتگ‌اَت.
بِسَلێل و اُهولیاب و سجّهێن هُنَرمند که هُداوندا دانایی بَکشاتگ‌اَتنت، بزان هرکَس که دلا پرمات که بیئیت و کار بکنت، موسّایا آ گْوانک جت.
اے هُنَرمندان شاهدیئے تَمبوئے دَهێن پرده اَڈّ کرتنت. اے پرده چه هورت‌گواپێن لیلُم و چه آسمانی و جَمو و سُهرێن پَژما گوَپَگ بوتنت. هُنرمندێن اِزمکارێا اے پردهانی سرا کَرّوبیئے نَکش جۆڑ کرت.
