38 هرکَسا په وتی دِلوَشّیا اے پئیمێن سۆچُکیے اَڈّ کرت، چه وتی مهلوکا سِندگَ بیت.“
هر سُنّت نکرتگێن مردێن که جِسمی سُنّت کنگ نبوتگ، چه وتی کئوما سِندگَ بیت، چێا که منی اَهد و پئیمانی پرۆشتگ.“
هپت رۆچا بێهُمیرێن نگن بوَرێت. هرچے هُمیر که شمئے لۆگان هست، ائولی رۆچا دئورِش بدئیێت. چێا که هرکَسا که ائولی رۆچا بگر تان هپتمی رۆچا هُمیری چیزّے وارت، آ مردم چه اِسراییلئے کئوما سِندَگَ بیت.
هرکَسا اِشیئے پئیمێن وشبۆے اَڈّ کرت یا اَنچێن مردمێا پِری مُشت که دینی پێشواے نه‌اِنت، چه وتی مهلوکا سِندگَ بیت.‘“
هُداوندا گۆن موسّایا گوَشت:
شَبَّتا برجاه بدارێت چێا که په شما گیشّێنگ بوتگ و پاک و پَلگار اِنت. هرکَسا اِشیئے بےاِزّتی کرت، آییئے سِزا مَرک اِنت. هرکَسا که اے رۆچا کار کرت، چه وتی مهلوکا سِندگَ بیت.
