10 بله هپتمی رۆچ تئیی هُداوندێن هُدائے شَبَّتئے رۆچ اِنت. اے رۆچا هچّ کار مکن، نه تئو، نه تئیی بَچّ و جنکّ، نه تئیی گُلام و مۆلد، نه تئیی دَلوَت و نه هما ڈَنّی مردم که تئیی شهرا نِندۆک اِنت.
”اِسراییلیان بگوَش: ’منی شَبَّتان اَلّم برجاه بدارێت. اے په شمئے آیۆکێن نَسل و پَدرێچان منی و شمئے نیامئے اَهد و کَرارئے نشانیَ بیت تانکه شما بزانێت که من هُداوند آن، هما که شمارا گِچێنی کرتگ و شمارا پاک و پَلگارَ کنت.
