29 Kîd́ò̆ athodŏle Jè dèbwè ḿî Cò òkô Ja kă. Zè dèlè̄ladēdagè Jè ńò, manè̄ d́ō Jè mèdè htĕ ab́è Ca tha tòcò nu lò,” Cò d́ò̆sa lōwa tòcò do.
Cò tò d́ò hwă dè hnî̆ńò, gôlô̄gele dè̄tob́o agè̄gòbrò dokhlo la gāb́i cè tòcò. Kîd́ò̆ d́ŏ dè̄tob́o aklè̆ dèlē thèhtagè dèdè̆ ad́ò, “Ajo ḿî Jo Phokhŏ Jè b́èlò̄gudu, htè ab́èthob́ètha Jè dèbwè nu. Sòkhĕńebò̄ ze lē.”
Jezŭ d́òge cè, “Khŭnujo khòthad́ò̆ mè mò̄kô gōjo. Manè̄ kòd́òdo dō, ab́è wè gè̄ mè pĕhta dèdî̄dèhma lŏcăcè.” B́ĕnu zu ŭsab́ăkò̆ lōwa htĭ.
Kîdò̆ tcabò̄, dèlē thèhta d́ŏ Mò̄kho nu ad́ò, “Ajo ḿî jo pho jè b́èlò̄gudu htè amè thalōthalai thoŏthèè jè dèbwè nu.”
Barasă Ze le cab́ô̆htè Lākho gî̄ thîhè̆bò̄ Jè b́èlò̄ Apa, kî Jè mè dè htè Apa hmèla Jè tòcò nu. “Wè̄hto, gè̄ hèhtagè b́ĕjo,” Cò d́ò lōwa do.
Acab́ô̆ Jò òi htŏ Ja Pa adèhmèla tòcò nu kî ògè Zè dèb́èlò̄ abu nu, òibò̄ Jè dèhmèla tòcò nu kî òbò̄ Jè dèb́èlò̄ abu.
Tcabò̄, akhî kè b́èkò̆, kî ab́è htŏ dòkhò̆, htè thĭ gè̄ sè phrulaphrî̆hta, dèbwè dèbwè ge ahiaphă kî lè̄ladēdakò̆ Jè. Barasă Jò tò òladē da tèpwè ńò. Manè̄, Apa òkô Ja kă akhoacè̆ nu.
Jè bè̄dòbè̄the htŏ Nè d́ŏ Lākho akho jo. Jè mè pĕhta htŏ dèmè Ni ilani Jè nu.
Jezŭ d́ò cè tòcò, “Jè dèa ḿî agè̄ mè athodŏle jè dèbwè adèthaèni kî agè̄ mè pĕhta Zè dèmè nu,” Cò d́ò̆sagè lōwa tòcò do.
“Jè dè mè za dèjo lo Ja la dimĭ ńò. Acab́ô̆ Jî thîhè̆b́è nu Ji cirradè kî Jè dècirra ḿî adî̄ahma, manè̄ d́ō tè b́è Ja wāhlè Jè dèthaèni ńò, ḿî Pa athodŏle Jè dèbwè adèthaèni dòkhò̆,” Cò d́ògè lōwa do.
Manè̄ d́o, Jò ò d́ŏ Mò̄kho nu Ja la tè b́è Jè gè̄ mè Jè dèthaèni anikhĭ ńò, ḿî athodŏle Jè dèbwè adèthaèni lò.
B́eḿĕ Ji gī cirradè nu, Jè dècirra ḿî ab́è lò, manè̄ d́ō Jò tò ò dèbwè lò ńò. Ji ḿî akhathè̆thî, athodŏle Jè htè Apa nu òkô Ja kă.
Nòthò̆ hnò̆nu, Kib́ĭcè òkô ja kă kî i jè dèkhodèă, akhoacè̆ jò d́òhtôlai b́è Kib́ĭcè aVanzĕlo pĕhtazòhta cab́ô̆htè bijakhwĭpho alewe lŏcăcè tòcò gî̄ thîhè̆b́è anikhĭ, kî jô hlô̆htab́ègè d́ŏ dècirra thĭ jè lò.
Kib́ĭcè kò̄ òkô dò̆bò̄è na tha tîkî. Kib́ĭcè adèhludètă kè̄ b́è dò̆bò̄è thĭ gŏ abwè tîkî.
Manè̄ d́ō, wu Phŭgima tè b́è adò khòthad́ò̆i kèhta wè dèthò̆jò̄bò̄la tòcò nu dèbwè ńò. Zî ḿî ab́è dèhlòdèplè d́ŏ klè gŏ ab́ò̆ acab́ô̆ wè b́ègè akhò̆ nu, nòthò̆ hnò̆nu, Zè dè mè dèkhòwè ńò.
Phŭgima gî̄ ḿîb́è awîatcahtĭ, adèkèḿè tò ò ńò kî aplî̆atcă. Cò kò òb́è d́ŏ dèkhòwèpho tòcò akho kî Cè kè̄ b́è zāhtajî dŏ Mò̄kho akho nu.
Je hweni thĭ cè ajo, jo pho ji li tòcò, cab́ô̆htè thĭ gè̄ dè mèbò̄ dèkhòwè ńò nu; ḿî bija dèbwèbwè gè̄ mè dèkhòwè d́ō ad́ònikhĭsanikhĭ wa d́ŏ Apa ò nu ò tèpwè, htè Jezŭ Krĭstu, adî̄ahma dèbwè nu.
Kî gajă wa dadè tòcò nu, wi gī nib́èkò̆ d́ŏ cò ò nu. Wò òi Zè dèhmèla d́ō, wè mèdè tòcò ḿî ab́ètha cè akhoacè̆ nu.
