24 ¡Mʉrã zuburia bꞌʉa! ¿Mʉrã kꞌaiba ẽdrʉbiipe mʉ kꞌakuaba mʉ aduabiita beaita nʉmʉrã?
Sobiaudua jẽga bꞌera, mawũã bꞌera Daizezebara kĩrãtũmabigaya.
Sobiaudua Daizezedꞌebema kꞌarea jarra bꞌera, aramaʉ̃ne izha krĩñata oya bꞌera maʉ̃ne nʉmabigaya.
Jawurebia Daizezedꞌera mʉne bꞌʉa, mʉrã jʉrʉsi baera bedꞌea biata jaramarẽã zuburia bꞌea. Mʉrã zokꞌasia sobia omarẽã sopua bꞌeta, ẽdrʉbiita jaramarẽã jida erubꞌeta, ne ũdubimarẽã daʉbꞌerrea bꞌeta, ẽdrʉbimarẽã zuburia obꞌeta.
Maʉ̃ta kꞌawuaidꞌera dazhita na bꞌadꞌara izhi ũme cruzdꞌe kꞌachibʉrʉba kꞌakua kꞌazhiruadꞌebemata beasia. Mawũẽ dazhira wueta kꞌazhirua nezokꞌa ẽã.
Zharadꞌebemane nʉmeãĩbʉrʉ aduaita beudꞌaya. Mawũãmina Jawurebiadꞌeba beubibʉdata zharadꞌebemata odꞌa ẽãrã Daizeze ũme bꞌai jõ ẽã bꞌeaya.
Bꞌai zhiwidꞌita Jawurebiaba Jesucristodꞌeba dia bꞌʉba dazhira kꞌazhiruadꞌeba ẽdrʉbisia aduaita beui badꞌata.
Bari maʉ̃rãtrʉ pua duanu ẽã, awuarabʉrʉ Jawurebiata naara jidadꞌapeadꞌata dazhirãsidꞌa puaba ʉ̃ĩ-ʉ̃ĩã bꞌedꞌe jʉ̃ã bꞌea Daizezeba zhi warrarã jʉre edemarẽã, aramaʉ̃ne beukꞌata bꞌʉmarẽã dazhi kꞌakuara.
Aramaʉ̃ kĩrãkꞌa dazhira Jawurebiaba kꞌareba bꞌʉa dazha bꞌe ẽãnebemane. Daizezea kꞌãrẽ bigata widꞌiira dazhara kꞌawua ẽã. Mawũãmina Jawurebiata dazhibari ʉ̃ĩ-ʉ̃ĩã zhiwidꞌi bꞌʉa, maʉ̃ sãwũãta jaraidꞌe bꞌʉ ẽã.
