43 Mawũẽ Jesúsbara izha jʉrʉkuadꞌata trʉ̃pe mawũãsia: Mʉã wãrĩnu marãã jaraya, naʉ̃ wũẽrã pẽdrata zuburia bꞌʉbara jõmaʉ̃ kꞌãñabara plata audre edꞌa kenabꞌaribʉrʉa.
Bariduba maʉ̃rãnebema abꞌa zhi zroma ẽã arigu baniã kũrãsãta dobira, mʉta pẽwã bꞌʉ baera mawũã dobira, mʉã wãrĩnu marãã jaraya, Daizezebara maʉ̃barira kꞌãrẽ diaya.
Maʉ̃ne wũẽrã pẽdrata zuburia bꞌʉta zepe moneda zakerãta ũme edꞌa kenabꞌarisia bio vale ẽãta.
Wuaabemabara edꞌa kenabꞌaribʉda plata audꞌubemata, mawũãmina naʉ̃ wũẽrãbara zuburia bꞌʉdꞌe jõma edꞌa kenabꞌaribʉrʉa izhi nekꞌoita erubꞌadꞌata.
Jesúsbara maʉ̃ bedꞌeata jarasia ofrenda bꞌʉbada maẽ Daizeze dedꞌa ewara maẽ miã ũrãgꞌa nʉmʉba. Maʉ̃nerã miõba jidadꞌa ẽbasia wadꞌi araba ẽãba izhi ewarita.
Maʉ̃nerã Jesúsdꞌebema ĩjã bꞌebara ãzha dia bꞌeita abꞌa abꞌaʉba ne erubꞌera kꞌarebata diabuedꞌaita krĩchasidꞌa mebẽrã bꞌema Judeadꞌe.
