1 Pedro 4:4 - Manityanati Tupax

⁴ Tapɨ kaɨma, axɨna chapisamutenkipɨ chepema axɨna chuxiampɨ nisɨborikixhimia, axɨma kiatax ñakionkoxɨma sane naukiche chuxiampɨ nuraxɨma aume.

Manitanati Tuparrü

⁴ Arrübama maquiataca caüma cütobüsoma, itopiqui chapisamutenquipü arrüba chomirriampü ichepema. Sane nauquiche unuma año.

1 Pedro 4:4 교차 참조

San Mateo 23:25

“¡Autakisɨrɨkatai axɨbama manunekana bakɨpukux uiti Moisés ichepe axɨbama fariseos, chapisamutempɨ axɨna amukanaño!, apiyaxɨbita auki tyɨrɨpo nauchapo axɨnaintyo aukiche aubaka, champɨ nɨmoche aboi axtɨ ataso ui napasɨpɨkɨ uityo nauxianka ane namenaxi.

San Lucas 15:13

Yopɨrɨkɨ mantukubatai nananeka axti maniki aɨtoxti yaɨxtiki nuxia pabenteo uiti nanaiña axɨmanu toxio ɨmoti enaxiboti, aɨbu axɨmanu nikuax sɨrotitɨ iche, au kiatax kɨx, akamanu nanaiña takɨrusu pɨnanakiti ui axɨna chuxiampɨ nisɨborikixhti.

Hechos 13:45

Naukiche axɨmanuma judíos astaimia sɨrɨmanama oberabarama, kuatɨ kiatax ñakionkoxɨma ɨnantɨ ɨmoma, sane naukiche tɨborikoma uratokioma ɨmoti Pablo.

Hechos 18:6

Tapɨ axɨma kaɨma ɨnantɨ ɨmoma auki chuxiampɨ nuraxɨma ɨmoti Pablo. Auki kaɨma ikɨtobitati Pablo naibixhti, nauki atusi ɨmoma ta ane nipɨnatema, nanti ɨmoma: –Aboiyapatoe axtɨ chautaesɨbukapɨ eanaki nomɨnantɨ. Axɨñɨ champɨki nɨmoche sobi. Aukina kaɨma yɨkatɨ suraboi sukarɨ axɨbama chɨtɨpɨ judíos.

Romanos 13:13

Uikoñokona nosɨboriki takana axtɨ usaka au sapes. Uiñokoniona axɨmanio yarusɨrɨka basapakax nantax aɨbu norisɨbakax, tapɨ apityoximiata naukɨtɨpɨ ɨmo nomɨnantɨ, tapɨ autɨborikia aumeampatoe tapɨ abubatio nenaxi makiataka.

Efesios 5:18

Tapɨ aborisɨbaka, tyopiki uixh chɨtusiupɨ aume isane axɨna apisamute. Chebo aboi tyone, aɨroti Espíritu Santo aukɨtɨpɨ tari uiti aipesɨnakati nausɨboriki.

1 Pedro 2:12

Taikiana uxia nausɨboriki axtɨ abaka axɨpekuma axɨbama chikokoropɨmati Tupax. Sane axtɨ kaɨma chuxiampɨ nuraxɨma aume, takana axɨbama chuxiampɨ nisɨborikixhimia, astaimia ñana axɨna uxia apisamute auki machampienkanama ɨmoti Tupax uimia au axɨmanu tyakɨrux nanenes ñana.

1 Pedro 3:16

apisamuse aɨbu nautakisɨrɨkɨ aɨbuityo napanaunku. Apisamuse nausɨboriki isiuki axɨna uxia napapanaunku, nauki axɨbama chuxiampɨ nuraxɨma ɨmo axɨna uxia nausɨboriki tyopiki apikokokati Cristo, akɨsoma tato oboi axɨba chomixhampɨ nuraxɨma.

2 Pedro 2:12

Axɨmanuma mañoñɨnka takana numukianka nisɨborikixhimia: champɨ ñapanaunkuxɨma, sɨborikoma takana numukianka aboma iku kɨx iyabubu makiataka nauki aityabairomaintyo. Chuxiampɨ nuraxɨma ñome axɨba chɨtusiupɨ ɨmoma. Koiñoma ñana takana niñokonko numukianka,

2 Pedro 2:22

Ui axɨna sane isamutema, ta ñemanauntu axɨmanu namatɨ sane: “Axɨna tamokox sɨrotɨ tatityo ane nuɨntux”, axɨmanuintyo “Axɨmanu nupauches aɨbo atopi sɨrotɨ tatityo aiñaxɨkɨnakanɨ eana taux.”

SAN JUDAS 1:10

Tapɨ axɨmanuma mañoñɨnka chuxiampɨ nuraxɨma yokɨtɨpɨ axɨba chɨtusiupɨ ɨmoma. Nisɨborikixhimia takana niyosɨboriki numukianka, yusuputakai nanaiña ta chɨtusiupɨ ñome kausane, au nityakɨrux obɨrio oboi ñomeampatoe.