29 Ẽ Senhor Deus mã Israelĩ enabũ ekiri yuikĩ: ‘Senhor Deusũ pepawẽ nuku mekeismaki’, mã ikaya haskakĩ ẽ yunutiwẽ ẽ matu pe hiwemaismamẽ? Hakia mã matumamẽ, pepa aki mã hiweismarã?
Huni betsa patapakĩ hawẽ hiwea ibubis txakabuwa hanushũ: “Senhor Deusũ ea kanemashinaki”, iki unaĩsmapabu haki paranamisbuki.
“Israelĩ enabũ hatũ beya txakabu atiani habias txibãkĩ heneama yuikĩ: ‘Uva bimi bũkash pia keska wakĩ hatũ epabũ txakabuwakubainaibu hatũ sheta masheshai keskai hatũ bakebu nuitapai bika tenekubaĩmisbuki’, haska hãtxai haskakĩ Israelĩ enabũ haska yui beshtekeriabumamẽ?
Ea ẽ pepa bestiwẽ ẽ matu mekebia matũ shinã txakakĩ mã ea txitemisrã, matu yuinũ nĩkakãwẽ. Matũ yuikĩ: ‘Senhor Deusũ nuku pewakubainamaki’, mã ikaii. Hakia mã Israelĩ enaburã, ẽ eamaki, txakaburã. Hakia ea binumakĩ ea nĩkama mã txakabuwamisbuki.
Hamẽ betsarã, tsuãra hawẽ txakabu betsa betsapa unãtã henekĩ shinã betsa watã txanima hiweyushanikiki, ẽ kupiamarã.
Mã Israelburã, matu tibi haska mã hiwemiswẽ taea eã ẽ matu unãti watirumamẽ? Ea Senhor Deusũ ẽ hãtxa txanima ẽ mestẽwaiĩ. Ibubis mã ea sinatamabiamis hawẽ taeshũ ẽ matu kupiyamashanũ matũ txakabu dasibi hawaira hene keyurikãwẽ, hamẽ matũ hiwea mã benuyamashanunã.
