21 dabekekaũ hawẽ detenamenika betsa Etiópia nawa yuikĩ: —Haska mĩ uĩshu nukũ shanẽ ibuhaira hawaira kushikaĩ yuitãwẽ— aka Joabe bebũ ha Etiópia nawa dãti ika benitã kushikainaya
hakia Joabẽ kemakĩ yuikĩ: —Ma nukũ shanẽ ibuhairatũ bake mawashu haki txanikĩ datekĩ mĩ punu nukawai katirumaki. Shaba betsatiã kaka betsa bui mĩ ana txanikũkaĩshanaii. Ikis huni betsa kayutiruki— atã
hawẽ shinã betsa wakatsi ikama Aimaásĩ Joabe ana yuikĩ: —Habiaskabiakẽ Etiópia nawa itxũ txibaĩ kushiriakaĩtãpa?— aka hakia Joabẽ kemakĩ ana yuikĩ: —Haskai katanũ ika mĩ ea ikai? Ea nĩkawe. Mĩ shanẽ ibu banabimabia hawẽ manakuti mĩ bitirumaki— aka
Aimaásĩ kemakĩ: —Haska txanima mĩ ea yuibia nĩkamas ẽ ha itxũ kushikainaii— aka hawẽ shinã unãkĩ Joabẽ yunukĩ: —Peki. Txibaĩ kushikaĩtãwẽ— aka pãpa anu kushikaini Aimaásĩ Etiópia nawa daĩbaini ha dukũ bebui kaya
habiatiãri Etiópia nawa hikishũ shanẽ ibuhaira Davi yuikĩ: —Shanẽ ibuũ, kaka pepa ẽ mia yuiaii. Nĩkawe. Mia pepa washũkĩ dasibi miki sinataibũ kushipa nemakĩ hatu maemakĩ nũ keyushuki— aka
