Romanos 14:13 - Kashinawa : Diosun Jesúswen taexun yuba bena yiniki

¹³ Jaska inun, tsuanda Cristo ikunwainkidi jatube ana yuanananyamakubainkanwen. Ja inun, nun jatu uinmachaka jau jaska shinain ana nukukidi jancha chakabu yuiyamanunbun jamapai piti tibiwen jabun ikunwain betsa jatu babu watidu inun jamapai piti tibiwen jatu kanematidu ana meama jenekubainkanwen.

Kaxinawá Bíblia (BR)

¹³ Haska inũ, tsuãra Cristo ikũwaĩkiri hatube ana yuãnanãyamakubaĩkãwẽ. Ha inũ, nũ hatu uĩmatxaka hau haska xinaĩ ana nukukiri hãtxa txakabu yuiyamanũbũ hamapai piti tibiwẽ habũ ikũwaĩ betsa hatu babu watiru inũ hamapai piti tibiwẽ hatu kanematiru ana meama henekubaĩkãwẽ.

Romanos 14:13 교차 참조

Mateus 16:23

Jesús jawen tsumabukidi nasauketan uinkin Pedro nemakin yuikin: —Satanásan shinanwen min ea teawakatsis ikai ana jadi jaskayamawe. Jawada Diosun uiain keska min uianmaki, eska shinankinan, jaska yudabun uinmis keskawen min ea nemaidan— abain

Mateus 18:7

Ja inun, jamapai betsa betsapawen kemukin yudabun chakabuwamisbuki. Jakia tsuabunda enabun Diosun yunumis inun nemamis shinanbiaibun juinti babubu padankin jatu chakabu ama akeakemisbu jabudi Diosun jatu kupia nuitapajaidaxankanikiki.

Mateus 7:1

ana jatu yuikin: —Tsuada ja akin chitekin unanti wayamaxankanwen. Man jatu jaska wamaken Diosundi jabiaskadi wakin matu chitekin ja akamadi ixanikiki.

Lucas 12:57

—Jaskai matunmebi unanbiakin ¿jawada pepa man pewaismamen?

Romanos 11:9

Jaska inun, ana Dios chibanbuma ixanaikidi Davidin yuikin: “Jamapai piti betsa betsapa jaya jawen besti beyusi unainsmapai jadakidi paxai kaintidubumaki, nawatikis ikabu jau Diosun jatu kupinunwen.

Romanos 14:10

Januxun Diosun yuikin: “En jancha chanima matu yuinun ninkakanwen. Yuda dasibibu unantan en jatu kupiaya danti itan ea kenwankin jaska ea besti kushipajaidatun en jatu kupiaya ea yuia akeakexankanikiki”, aka jawen jancha yuixunikatun keneniki. Jaskawen taexun tsuabunda Jesús chibain betsabu jatukidi nun jatu yuainbu inun tsuabunda Jesús chibain betsabu nun jatu dananmisbu nun jaska jatukidi janchamis Dios bebun nia nun jaki chaniaya nuku tibi unanti wa akeakexanaiwen taea nukubetan Jesús ikunwainbu ana jatu yuankin dananyamakubainankanwen, nukunmebidan.

Romanos 14:3

Ja inun, jadatubunda jamapai piti betsa betsapa dananma pimisbun ikunwain betsabundi piti betsa danainbu jatu ja akin dakewayamadiakubainkanwen. Jaska inun, jabiaskadi wakin yuda betsabun jamapai betsa betsapa pimisbu jadatubunda piti betsa danainbun jatu ja akin dakewadiayamakubainkanwen, Diosun jawa jatu danainsmawen taexunan.

Romanos 14:4

Ja inun, jabu xanen ibukin jatu yunuai tibibun jawen dayadu tibi ja akin pewamis inun kenwanmiskenan, tsuada ibumabia madiastun man jatu ja atidumaki. Jabiaskadi wakin nukun Xanen Ibu Jesucriston jamebi jawen dayadubu jatu kushipa wakin jawen bai kayatapia jatu chibanmakin jatu pewakubainmiski. Jaska jatu yunuai shinankin jau axuin jiwekubainunbunan.

Romanos 16:17

En betsabu inun en puibuun, jaskaibu man uinunbun en matu yunuaii. Yusinan betsabun jabun matu padankin nun jaska matu yusinmis betsa wakin matu shinan betsamakin matu paxkatidubuki. Uindakanwen. Jaska nun matu yusian man ninkamis keskamaken jatu danankin jatun yusian ana ninkama ana jatube ichayamakubainkanwen.

1 Coríntios 10:32

Jaska jamapai tibi akin jawada danainbu jatun bedubi akin jatu uinmachakayamakanwen, judiobu kasmai judiobuma kasmai ikunwain betsabu jiweabudan.

1 Coríntios 11:13

Jamen betsadan, ainbu Diosbe janchaidan, ¿jawen buxka tadi tuaxwen mayabukuama itimen? ¿Mayabukutan iti daka? Matunmebi shinankanwen.

2 Coríntios 5:14

Cristo nuikipatun nun jawen kushipayabu nuku ma mestenwanixun nuku chixukubainikiki. Dasibibuwen taea juni bestichai nuku mawaxuni ikunwanixun nun unaiin. Jabiaskadiai jabun ikunwanxanaibu ichapabudi jabe mawanibu keskaki.

2 Coríntios 6:3

Dios nun dayaxunaiwen taexun jau tsuabunda: “Man kaneaii”, iki jau nukukidi janchayamanunbun pe jiwekunkainkin nun tsua kanekin uinmachakaismaki.

Filipenses 1:10

jaska pepa besti bechipaiai man katukubainunbunan. Jaskai jiwekin matun jiwea xunpin jawa chakabuma ewakaini jawa chakabuki juti ika keskama nukun Xanen Ibu Cristo judiamaken man pepa jiwekubaintidubuki.

1 Timóteo 5:14

Ikunwanbuman jau nukuki kaxeyamanunbun ainbu beneyabiaima ma jawen bene mawa kasmai jenebainima yuxabudiabumadan, jau ana beneyakubainunbunwen. Jaskatan bake bitan jatun jiwe medanua pe dayakin jau jatu duawakubainunbunwen.

Santiago 2:4

juni nuitapai dakewakin xanen ibu pe bestikidanai ikin man duawakubainmiski. Jaska katukin jaska Diosun matu amakatsis ikai man akama ikunkainaii, shinanchakakinan.

Santiago 4:11

En betsabu inun en puibuun, betsabun ikunwainbu betsabukidi jawada chakabu ninkatan yuda betsabu yuibaunkin man jabu yuaiin, jatukidi jaskatimabiakenan. Chanima Diosun nuku yusinkin: “Matunmebi man nuimis keskakin yuda betsa betsapa tibiwen nuikin jatu duawakubainkanwen”, iwanan, nuku yusiniki. Jaskaken tsuabunda ikunwain betsabu chitekin Diosun yusian chitediakin jadatuda yusian man bechipaiamabia jawen besti jatu unanti wakin man jatu chitea akeakeaii, matun yunukin akawakinan. Jatu jaska wai man daki ana Diosun yusian chibankatsi ikama danain man jaki meseamaki, jawen yunutikidan, Diosun abiaxanayadan.

1 João 2:10

Jakia tsuanda jawen jancha chibain ikunwain betsabube bechipainamemisdan, ana jawawen taea chintuain chakabun kanemakin achitidumaki.

Apocalipse 2:14

Man jaskabia kanei eska tibi matu anu jayabu matu yuinun ninkakanwen. Ja man jabube ichabiamis jatidibun Balaamin yusini putabumaki. Israelbu jau Dioskidi chakabuxanunbun Balaamin nawa xanen ibu Balac yusinchakakin yuikin: Jatu beyusmakin yushin dami kenwanti betsa nami inanshinabu jatu pimaxanwen, ani inun matun bake chipashbe jatu chutanamemati jatu shinanmaxanwen, ani jaska jeneabumaki.