Romanos 12:1 - Kashinawa : Diosun Jesúswen taexun yuba bena yiniki

¹ En betsabu inun en puibuun, nukuwen dabanan ikin Diosun nuku duawakubainmiswen taexun jawada shinankin bechipaiai natian man axunkubainunbun xabakabi en shinain matu yununun ninkakanwen. Jaska Dios kenwankin yuinaka detetan menukin inankin apaunibu keskama jakia natian matun jiweawen Dios duawanun, iwanan, medibi paxkai pepatan Dios matun yuda inankuian keska wakin jawen kemu tapai benimawakubainkanwen. Jaska wakinan, chanima kayabi man Dios kenwaiin.

Kaxinawá Bíblia (BR)

¹ Ẽ betsabu inũ ẽ puibuũ, nukuwẽ dabanã ikĩ Deusũ nuku duawakubaĩmiswẽ taeshũ hawara xinãkĩ abuai natiã mã ashũkubainũbũ shabakabi ẽ xinaĩ matu yununũ nĩkakãwẽ. Haska Deus kẽwãkĩ yuinaka detetã menukĩ inãkĩ apaunibu keskama hakia natiã matũ hiweawẽ Deus duawanũ, iwanã, meribi pashkai pepatã Deus matũ yura inãkuĩa keska wakĩ hawẽ kemutapai benimawakubaĩkãwẽ. Haska wakinã, txanima kayabi mã Deus kẽwaiĩ.

Romanos 12:1 교차 참조

Lucas 7:47

Jaskaken ewen nuikin ea bechipaijaidaiwen taexun jawen chakabu midimabiaken ma en buaxuna min unantiduki. Jamen tsuanda chakabu eskadabes nun buaxuna mawaida ea inun en Epa shinankin midinwanmisbuki— iwanan,

Romanos 12:2

Jaska jabun ikunwanbuma natian mai anu jiwe bestixun jamapai tibi akin shinanmisbu keskakin ana shinanma jakia shinan betsa watan jaska Diosun matu jiwemakatsi ikai jaska bechipaiai besti tapinkubainkanwen. Eska jiweidan, jaska Diosun bechipaimis man tapinkubainxanaii, pepakinan, Dios benimawai kemu tapakinan, kanei jawa chintuanmadan.

Romanos 15:16

man Israelbuman jawama man Jesucristo ikunwanxanunbun ea jawen kenwanika betsa Diosun ea nichinkin jawen kakape jawen bake Jesúskidi en matu yusinbaunun man Israelbuma anu ea yununiki. Jaskawen taea man Israelbumadi Diosun Yushin Pepatun matu medibi wa jawa chakabuma inankuin pepa keska Dios bebun matu nichintan Dios en matu uinmakatsis ikaii.

Romanos 15:30

En betsabu inun en puibuun, nukun Xanen Ibu Jesucristowen ja Diosun Yushin Pepan betsabuwen nuiti nuku inanmis jaskawen taea man ea jakimayamanun en matu ea akaii, en daya bikakidi man ea Dios yukaxunkubainunbunan.

Romanos 2:4

Jakia Dios pepajaida man dananbiaya matun chakabu tanabiakubainkin jau ana ja shinanma Diosun buanun tsuabuda jakidi kakin shinan betsa watan man yukaxanunbun matu shinain matuwen nuikin jatianda man jakidi yukaxanai jin jin ikama Diosun manakubainikiki.

Romanos 6:13

Jaska inun, matun yuda ana chakabu tsumawamayamakanwen, ja jamapaiwen nukun yuda jawen chakabu watimakidan. Eska wakinan, matun shinan pe mekekin matun yuda jidabi Dios inankin mekemadiakubainkanwen. Ja inun, yudabu mawatan ana bestean keskatan matun yuda pe mekekin matun jiwea Dios inantan pepaxunkubainkanwen, matun yuda jidabiwen Dios duawakinan. Jawa kaneama ja bebuxun pepakin akubainkanwen.

Romanos 6:16

Yuda betsan yuda betsa tsumawamakin inan januxun jawen xanen ibu ja besti jau dayaxunkin jawen yunua besti axunmisdan, man unaiin. Jakia jabiaskadi wakin matun chakabun matu tsumawaken jaskai ja chakabu chibain man jawen mawa kayabi man benuxanaii. Jakia jaska binumakin Dios man ninkakin chibain jawen jaibuaibu matu wakin jiwekuinmakin jawenabu matu waxanikiki.

Romanos 6:19

Ja inun, dasibi man tapin keyudiamaken matu xabakabi yusinkin jancha bikamawen matu yusinun ninkakanwen. Jawada chakabu pepama Diosun dananmis betsa betsapa anun ika jawen kemui matun yudawen chakabu idumai man atimapakunkainiki. Jakia jabiaskadi wakin matun yuda Dios inantan pepakin Dios dayaxunkubainkanwen, jawenduai pepakinan. Jaska wakin matun chakabu putai tadi medibi paxkatan man pe besti jiwekunkainxanaii, Diosunabuidan.

Romanos 9:23

Jabiatiandi bebunkidi Diosun nuku duawakatsis ikin jawen kushipa nuku uinmanun ixun nuku tibi nuku katukin shinanmisdan, nun ma jawenabu nuku unanmaikiki.

1 Coríntios 1:10

En betsabu inun en puibuun, nukun Xanen Ibu Jesucriston kushipawen en matu yunuai ninkakanwen. Matunmebi paxkanameama shinan betsa betsapa wama unanuma Jesús ikunwainbube jiwekubainkanwen.

2 Coríntios 10:1

Jaska bestibu man ekidi janchamis en Pablon en matu yuiai ea ninkaidakanwen. Matu anuxun betsabun yuikin: “Pablo nukube jiwea janchajaidaisma yunuama unanxubida nuku jancha wabiamis chaikexun nuku kenexunkin jancha kushipawen yunukin nuku ja amiski”, iwanan, man ea yuanbiamisbun jaska duapakin en shinanmis matu yuinun ninkaidakanwen. Jaska man yuibiaya jancha kushipawen en matu kunyan atidubia jaska duapakin unanxubida Criston yudabu yusinkubaini keska wakin jancha xankamawen yuikin matu kunyan akatsi ikama matu anu en ana kaken jabun ea xeninkamisbu en jatube janchakatsi ikamaki. Jatun shinan betsa wamakin jau ana jamakidi shinan chakayamanunbun jatu mextanmakanwen.

2 Coríntios 4:1

Jaskaken Dios nukuwen dabanan ikin jawen yuba benakidi nun yusinun ixun nuku yununiwen taea jawen babui punu nukai nun bextekeisbumaki.

2 Coríntios 4:16

Jawada bika xabakabi mekin nun teneai jawaida keyuxanaiwen nuiama jaska Diosun mekekin niti akama nuku jabe jiwemaxanai uindiamabia shinankin nun uinkatsis ikaii, ikibi ika junea keskadan. Ja inun, natian na jiweawen nun jiweaidan, bikaishta nun teneai jawama keskaki, jawaida jayabiatan keyumisdan. Jakia jaska jawen taea nun bika teneaidan, Diosun pewen kupikin nuku benimawa chakayamaxanai akunjaida bikatsi nun manaii. Jaskaken nukun yuda ewanai babui mawabiaya badi tibi Diosun nukun jiwea tibi uke medanua benawakubainaya punu nukai nun chintuntidubumaki.

2 Coríntios 5:20

Jaskaken Criston kushipa nun jayawen taea nun jawen jancha buxunikabuki. Nukuwen Dios janchai keskaya Cristo ea axunkin nun matu yukaxunmiski. Eskaki. Matu yuinun ninkakanwen. Nukuwen taexun Diosun jancha ikunwain Cristo matu mawaxuniwen Dios daewai jabe jaibunamekanwen.

2 Coríntios 6:1

Ja dikabi yuda tibi Diosun yuikin: “En tsuada ninkakatsis ikaya min ea kenaya min jancha ninkatan ja xaba ikaitian en mia mekekin medabewaxanaii”, ikaya ninkatan Isaíasin keneniki. Jaska xabakabi en matu shinanmai ninkakanwen. Natianan, Diosun matu ninkakatsis ikikiki. Ja inun, natian matu mekekatsis idiaikiki. Jaskaken man Diosbe dayakin axunmis matu yununun ninkakanwen. Jamenmens Diosbe jaibunamei bepadameama ikun kayabi Diosun jawen pepa ma matu uinmaki. Dananyamakanwen. Jaskawen taea nukudan, nun Diosun daya axunkin medabewai dayaxunikabuki.

Efésios 4:1

Nenu eska en bika tenei jiweyuxun meaidan, nukun Xanen Ibun ea yununi en akubainaiwen taexun ea achitan ea mekeimaxun ea jeneabumaken jau man ikunwainbu Diosun matu kenani jiwei pepai jaskakin man unankubainunbun en matu yunuai shinaindakubainkanwen.

Efésios 5:10

Jawada Diosun bechipaiai unantan jeneama axunkin benimawakubainkanwen.

Filipenses 1:20

Jaska inun, Dios dayaxuni tsuki en dakeamaki, jatun ea mekeawen taeadan. Jaskaken tsuabunda bedubi jawa jakidi dakeama natian en jiweawen inun en mawaxunxanaiwen Cristo kushipajaida ewen dasibibu en jatu uinmayukatsis ikaii.

Filipenses 2:17

En jiwea en matu inani keska wakin en matu ikunwanmaniki. Matundi ikunwankin matun jiwea man Dios inankuinyaiin. Jaskawen taea en jiwea yaushiama mawakinan, jau man ikunwankin jeneyamanun en jiwea Dios en matu inankuinxuntiduki. En matu jaskaxuni en benima paewen dasibi en matu yuiaii.

Filipenses 4:18

Epafrodito yunukin matun pei man ea bumaima dasibi en bimaki. Jawen en jamapai en paka keyubia texe en jayayuaki. Jaska inankuin ea yunukinan, Templo anuxun ininti pepa ininjaida kuakin Dios inanbu jaska xetei Dios benimamis keskai eadi matuwen en jabiaskadiaii.

1 Tesalonicenses 4:1

En betsabu inun en puibuun, Jesúsun nuku yununi jawen yusian nun matu yusintanima man unainwen taexun kenewendi nun ana matu kenexunai uindakanwen. Jaska badi tibi Dios man benimawatidu nun matu yusinkubainima man akai keska wakin ana jabiasdi jeneama akubainxankanwen, iwanan, nun matu ana yunuaii.

1 Tesalonicenses 5:12

En betsabu inun en puibuun, matu medabewanikabun matu medabewakin nukun Xanen Ibun daya akin jaska man kaneaibu matu pewakin yusiainbu jatukidi pechiama jatu shinankin bechipaikin duawadiakubainkanwen, jatun daya pepawen taexunan. Ja inun, matubetan ikunwainbube unanuma jiwekubainkanwen.

1 Timóteo 2:3

Jaska nun jatukidi shinankin jatu yukaxunaidan, jadan, peki, nukun mekenika Diosun jaska bechipaimiskenan.

1 Timóteo 5:4

Jakia beneyabiani nuitapaibu jatun bakebu inun jatun bababu jayadan, jabun dukun jau jatu medabewakin jawen tapinkubainunbunwen, jatunabu kayabibunan. Jaska jatunabu medabewakin jatuwen nuikinan, Dios benimawakin shinan chankanwantidubuki.

Filemom 1:10

Jaskawen taexun mia daewakin mia anu Onésimo en nichiaiin, jau mia dayaxundi kanunan. Nenu ea meneximabu anu jiwexun Onésimo Jesucristo ikunwanmakin en shinan betsa wamaimawen taea min dayadu esclavo en bake keskaki.

Filemom 1:9

jaskakidi en mia shinanma jakia nui nun jaibunameaiwen taexun en mia ea akaii. Eadan, en ma mestebuaii. Jaskabiaken Jesucristo en dayaxunkunkainaiwen taexun natian ea bichikin akawaxun ea meneximabuki.

Hebreus 13:22

En betsabu inun en puibuun, en kene chaipamawen en matu medabewakin benimawakatsis ikai jawa eki sinatama shinan pewatan uindakubainkanwen.

1 Pedro 2:20

Ja inun, man chakabuwaiwen taexun matun xanen ibun matu kupia yumain sinatama man pe bexmaski. Jakia Jesús ikunwain man pepaiwen taexun ja shinanma matun xanen ibun matu kupia yumain jawa yuiama man sinatamaken Dios matuwen shinan chankanmiski.

1 Pedro 2:5

Man jaskakunkainaya man Jesús ikunwainbu dasibi mishki jiwe keska wakin jawen kenwanti kayabi matu wakubainikiki, jaskai duanamei man ma jaki dasiabudan. Matu dasibi man Diosbe janchaxunikabudan, man jawenabu medibiki. Jesucristo man ikunwainbuwen taexun jaska Diosun bechipaiai akin man Dios benimawakubainaii.