Pilipai 3:10 - BAṈARA KO VAIRU AMA LEVELEVEO

¹⁰ Ako aṉako matuma zario ta aṉata avai nianiiovou vo Karisito ni voko mata saevo voukale azo ko puratikako pizato, ni aṉata aqai zomanou voko tolailo, ni aṉata aqa zaria tu talio zoripato ko keve vo jari ti kobe lati baro aṉako vou.

Pilipai 3:10 교차 참조

Matiu 20:23

Nio Jisu ta o kati tiorikake nioqa ni eri kiolake, “Tuvevo qeta roveovou aṉa jaria tolailo elo, melai aṉata puliama pizato tu a zarieqelo qe tu qe papuvou aṉako palo ni made rana. Ako koa zae ta vo Baṉara inio o katimou se oma inainaekani,” kiolake.

Jone 10:18

Puliala ta o rovea tala kovo aṉako saevo aṉa kasi azo. Melai aṉata a buarika aṉako saevo aṉako tuvevo ama zario kale. Aṉa inio koko raki lala tu a vaeko, ni aṉa inio koko raki lala tu mata a dova kovo. Ko ikio aṉavo Mama o lati soruekema tu aṉata a ereko sole,” kiolake.

Jone 17:3

Koa noqola kama saevo ko kio ni kalo ta maba poso ko ṉai nianiio ṉo, tuvevo ala Baṉara ṉa, ni seko lai nianiio aṉa Jisu Karisito lala, aṉa ṉoṉo joroeleni lala.

Romu 8:17

Animeta voko meqora poso mela, sole animeta me qovou koa mauruto ko lula vo o inainaekema voko maba madu kaqe, ni animeta me ṉeamukou vo Karisito sase ko quli ko lula vo ova inainaekema quli, ako animeta meqai zomana vo Karisito ko tola, sole animeta me zomanou voko ṉaṉaidara kale.

Romu 8:29

Anime vo Baṉara lula o pitoemelani ta o edolimelake tu animeta vovo Meqora Jisu jari me elo, nio voa Meqora ta kubo tamania poso vo kaka kala Meqora o elo.

Romu 8:36

Ko Tabu ama Riki ta eri nio kikolani sole, “Ṉoko ṉi ko kio kale, Baṉara, seta keka zaria vouvaeṉelo eṉe kiada keru, eṉeta ṉe bitasia omadeuvo ko sipi jari ko ke vouvaeko ama jari.”

2 Koriniti 1:10

Soa matuma vou ko tapata poso kale azo vota lula o pakieṉela eṉe, ni vota mata o pakieṉelou eṉe. Nio eṉeta ṉevai keruani ṉela vo ta vota mata o pakieṉelou eṉe.

2 Koriniti 1:5

Eṉeko omadeu vati elo kale vo Karisito eṉeta ṉeqai zomana kovo kubo voko tola poso ni so jari eṉeta mata ṉeqai zomana kovo vo Baṉara ko matuma patukato eṉeko omadeu vati elo vo Karisito.

2 Koriniti 13:4

Ako vota o vouvai korosi topi lekuleku ala, melai erisaṉa vota o saeva vo Baṉara ko pizato kale. Ni eṉe voko apositolo ṉela ta lekulekua ṉela, melai eṉeko mekasi ama iruruputo kale eṉeta ṉeqai zomanou kovo vo Baṉara ko pizato vo Karisito ko saevo kale, nio piza kavole ṉe jidopu puemelou me.

Qelesia 2:20

ni erisaṉa aṉata pui aqai saeva a ṉaviko saevo melai aqai saeva vo Karisito ko saevo vo o saevani aṉa tona. Ni aṉako erisaṉama saevo kale aṉata avai oqua vo Baṉara vo Meqora vo o roqueleni ni ola vovini aṉa.

Qelesia 6:17

So sole meta pui mata me qatilou aṉa kama tapata, ako aṉako tupu kale a qoema tabi ko taki ta kasa ko ila aṉa ta aṉata vo Jisu Karisito vo tuvevo ala nabulu lala sole.

Epesasi 4:13

Ni komia iruruputo ta kobeta ziovou ti kobeta barolou so keru animea kiada mela omadeu me elou keru animeko vai oqu kale vo Karisito, ni omadeu vai nianiio me elou keru vo Baṉara vo Meqora. Ni animeta muqaro ama maba mela me elou, ni animeta me rapukou tu Karisito jari me elou ni me ṉeamukou kiadama voko sidopu.

Pilipai 3:8

Ni pui koko kiada, melai aṉata vairutu melai so ka kiala ta koa kiadama quli ti utube ama, ako aṉata a qati podetika sole aṉako vai nianiio vo Jisu Karisito aṉavo Lekasa. Ako vo Karisito kale avo inio aṉata a vaeke sole aṉako lulama saevo ni ko quli ta utube ama ka kiala, tu aṉata a ṉeamuvo vo Karisito

Kolosi 1:24

Komia taku aṉata a doraeka ko tapata ni tola meko tauvemelo kale avo, melai aṉata ada zoleiva ako aṉako tolailo ta kokai zomana okotiko vo Karisito ko tola, ko vo o lainikema voko tauvemelo kale anime vo Baṉara ko maba madu mela.

Kolosi 2:13

Lulavo meta pui saevo mela auvana kale, ako so keru meta sarueko poso samela sole, ni meta pui Baṉara ko toutou Izireli kale amu mela, Baṉara ko Bazu pidea mela koko katiziovima Mosese kale kude. Melai erisaṉa vo Baṉara ta o saevimela me Karisito sase, Baṉara ta lula ota mela akoeka kiadama animeko sarueko poso.

Kolosi 3:1

Meta lula me jaeva Karisito sase voko voukale azo ama mata saevo kale, so sole meta viluloqu kai emo ko aukale ama quli, sai vo Karisito o papuakoi voko lekasa puo ko papupapu topi Baṉara ko palo rana vasia rana.

1 Pita 1:3

Animeta me ilusivo vo Baṉara, vo animevo Lekasa Jisu Karisito vo Mama. Ako voko matuma akoekato sama roquano kale inio vota o katimele anime vairu ama saevo. Ni so jari vota o katimele piza kama tuvevo puto sama kerukeru tu animeta me qovo ko noqola kama saevo, koa piza kama tuvevo puto sama kerukeru o katimelema vo Jisu Karisito ko mata saevo kale voukale azo.

2 Pita 1:13

Ako kota ko male sole tu aṉata a dauvemelou me tu me qerukeruekou so keru aṉa abeta saeva keru miduku kale.

1 Jone 2:3

Ni animeta me zorikou vo Baṉara ko bazu inio animeta me baqumukou kokale ta animeta tuvevo avole inio mevai nianiiani mela vo Baṉara.

1 Jone 2:5

Melai kala vo o zoriko ala vo Baṉara ko bazu ta vo Baṉara ko roquano ta kota maba okota vo tona. So inio animeta meqai nianiia ta animeta tuvevo avole vo Baṉara ko maba madu mela.

Kelokelozato 1:18

Aṉata noqola saevo a evani lala! Aṉata lula ada vovini lala inio melai erisaṉa ta a jaeva tu noqola saevo a elou latau ṉaniu ni ka ṉaniu. Aṉata pizato salala tu aṉata mata a jaevimou se voumu, ni aṉata pizato salala tu aṉata a jaqorimou se voumu seke piriziakoi kale azo.