Jone 21:15 - BAṈARA KO VAIRU AMA LEVELEVEO

¹⁵ Ni seko vikalea keazaito ko tova inio Jisu ta eri kiolake Saimone Pita kasi, “Saimone, vo Jone vo meqora ṉa, ṉota ṉo qulepa roquelo aṉa komi quli kale azo, kio?” kiolake. Ni vo Pita ta o opatake ni eri kiolake, “Tuvevo, Lekasa, ṉota ṉoqai nianiia aṉata a roqueṉa ṉo,” kiolake. Sai nio Jisu ta o bazuevake vo, “Ṉota niaeka aṉako sipi meqora poso,” va kiolake.

Jone 21:15 교차 참조

Matiu 10:37

“Ni kala ta o matu roquekou voko mama ni niania ni kobe kai paloasou aṉako roquelo, ta pui o male tu aṉavo disaipeli elo. Ni kala ta o matu roquemou voko meqora poso ni kobe kai paloasou aṉako roquelo, ta pui o male tu aṉavo disaipeli elo.

Matiu 16:17

Nio Jisu ta o vati tiorikake vo Saimone ni eri kiolake, “Matu uri ṉo kiṉolani, Saimone, Jone vo meqora ṉa. Komia tuveano ta pui maba kasi azo ko kuevako, melai kota aṉavo Mama aukale ala o katiṉako ṉo,” kiolake vo Jisu.

Matiu 18:10

Nio vo Jisu ta mata eri kiolake sekasi, “Meta balauvomo ni pui zaraemo nia meqora poso jari amu, ako seta mateana samu sole aṉavo Mama kasi aukale, seke mati vailani.

Matiu 26:33

Nio Pita ta eri kiolake Jisu kasi, “Nia kiadamu ta keta ṉa soqoilou melai aṉata maba pui ti pui aba vaeṉou,” kiolake.

Matiu 26:35

Ni Pita ta eri kiolake, “Maba kebe vouvaelou ṉo sate melai aṉata pui aba taṉa zoliovou!” kiolake. Ni sea kiadama disaipeli madu ti omadeuvo kikelake vo jari.

Maka 14:29

Nio Pita ta eri kiolake Jisu kasi, “Nia kiadamu ta keta ṉa soqoilou melai aṉata pui aba vaeṉou ṉo,” kiolake.

Luke 12:32

Ni vo Jisu ta mata eri kiolake voko disaipeli madu kasi, “Meta pui ṉalo, mea silo ama rovaṉa sipi jaria mela, ako mevo Mama ta ota zoleiva tu o lekasa puemelou me o ṉaviko lekasa puo jari.

Luke 22:32

Melai aṉata lula a ṉati vararaitala ṉo, Saimone, tu ṉoko oqu ta pui ko maba epezou. Ni so keru mata ṉo ṉola lilitou keru aṉa, ta ṉota ṉo pizatimou ṉoko visi poso,” kiolake.

Jone 1:42

Nio vota o vati olake vo Saimone Jisu kasi. Ni Jisu ta o toiritoirivake vo ni eri kiolake, “Saimone, Jone vo meqora ṉa, erisaṉa ṉoko ṉi ta koṉai nokailou Sepasi,” kiolake. Koko kalo ta Pita ta “Lado” kio kio ko so.

Jone 13:37

Nio Pita ta eri kiolake, “Lekasa, noi sole inio aṉata pui aba lulueṉou ṉo erisaṉa? Ako aṉata a inainaovani lala inio tu aṉata aṉa vou ṉo sole,” kiolake.

Jone 16:27

melai o ṉavi a Mama ta o roquemela me, ako meta me roquela sole aṉa ni meta me duvevo pueka sole ko tuvevo ikio aṉata a quevini lala vo Baṉara kasi azo kio.

Jone 21:12

Ni Jisu ta eri kiolake sekasi, “Kuemo tu pa keazaitomo.” Ni sea disaipeli poso ta keta paṉaoke tu kuimaevo vo, “Lala ṉa inio ṉo?” kio, ako seta ke paqumuvake ta vota vo Lekasa sole.

Jone 21:7

Nio voa disaipeli Jisu o matu roqueveni ta eri kiolake Pita kasi, “Lekasa inio vo!” kiolake. Nio so keru Pita o viqa keru koa pesio, vo inio vo Lekasa kio sama, vota taukavole okai luitiziake voko topia sabosabo (vota lula o ivikake sole) ni ota jouparake toupa kale tu o baro taukavole Jisu kasi.

Jone 8:42

Nio Jisu ta eri kiolake sekasi, “Tuvevo avole Baṉara inio mevo mama tea, meta me roquelo inio aṉa, ako aṉata a quevi Baṉara kasi azo, ni erisaṉa aṉata koi. Aṉata pui aba kuevi a ṉaviko vatolo kale, melai vo inio o soroeleni aṉa.

Iruruputo 20:28

So sole meta kati vailomo meko saevo ni kati vailomo kiadama koa lotu qoqono vo Tabu ala Auvana lula o vaekako meko vailo kale. Omadeuvo vo sipi o kati vailani maba ta o kati vaila voko rovaṉa jari meta kati vailomo vo Baṉara ko lotu qoqono ko lula o ṉaviko o ikema vovo Meqora siqasiqa ma elo kale voko voukale.

Iruruputo 20:29

“Ni aṉata aqai nianiia ta aṉako tova, ta kade ama piru siele jari ama maba poso ta ke kilou mekasi tu ke madoeko ruvurimo meko rovaṉa.

Romu 14:1

Meta baroekimomo sea maba poso se lekuleku amu seko oqu kale, melai pui tamati zolizoliekinio seko kerukeru meko kerukeru kale.

Romu 15:1

Anime lula pizaka mela oqu kale ta me dauvemo se lekuleku amu seko niuniala kale. Animeta pui me zoleilo me ṉavi pala.

1 Koriniti 8:11

Nio koa ṉoko “nianiio” ta ko maba niumaevou nea lekuleku ala maba, vo Karisito ova vovini!

Qelesia 5:6

Ni eṉe omadeu ṉe evani ṉela Jisu Karisito sase ta ṉe baqumukani ṉela ta pui ko tauveṉela ko moveilo ni pui moveilo tu sidopu elo Baṉara ko kelokelozato kale. Ako qulepo ama quli ta oqu ikio sole, koa oqu ko kasa ko evako roquano kale.

Epesasi 4:14

So inio animeta pui se meqora poso jari me qalou. Ni animeta pui mola jari me elou omadeuvo ko ururu ta ko puzeka ni ko solea kiadakoi vasi jari. Ako animeta pui ke melai saruekou kiadama vairu ama nianiiekato poso. Ako se kekai nianiiekatani ko ta ke ereka seko vatovatolo ni ke ereka kiadama lipalipa kama quli tu ke saruemo se maba poso tu ke lulueko sarusaru ama keve.

Epesasi 6:24

Ni aṉata a vararaita tu vo Baṉara ko pakiezato sama roquano ni paito pide ama saevo ta ko elou seke roquevani vo Lekasa Jisu Karisito tona. A baika.

Hiburu 13:20

Baṉara ta o saevive vo Lekasa Jisu voukale azo, vo raura kala anime o melati vailani omadeuvo sipi o kati vailani maba jari. Vota o saevive vo koa dara ko pizato kale, koko vinaekema koa leveleveo, vo o erekema anime kasi tu kota noqola pizato ko elou.

Hiburu 4:13

Pulia quli ta ko rovea tava daipailo vo Baṉara, kiadama quli peuru ma peuru ko ereima ta kasale voko keazato kale. Animea kiada mela ta me lojolou voko kuleto ni animeta meqai eraeraovou kiadama quli ko lula anime me erekako quli.

1 Pita 1:8

Meta pui me veani nio vo, melai mebe roqueva. Ni meta pui me roveani mela inio velo erisaṉa, melai tuvevo mebe iva. So sole meta ko melai sukata ko ṉaṉaidara kama zoleilo puliala maba opa roveovo ama kaseko.

1 Pita 2:2

Melai meta kai zariomo ko bulebule ama ni tuvevo ama nianiiekato, omadeuvo se molele poso jari se kekai zariani ko susu, ako so inio meta me rapukou meko auvana kale ni me bakiovou.

1 Pita 2:25

Ni lula meta omadeuvo ko mumamuma kama sipi jaria mela, melai meta lula me vaita tu me luluevou vo Jisu, vo o melati vailani me omadeuvo vo vailo ko maba ta o kati vaila jari voko sipi poso.

1 Jone 4:19

Animeta me roqueva vo Baṉara, ako vo Baṉara inio o roquemele anime kuleto sole.

1 Jone 5:1

Ako kiadamu se tuvevo ke ivo amu vo Jisu inio vo Baṉara o soroeveni Pakio kikevo amu, se inio vo Baṉara ko meqora poso. Ni vo o roquevani vo Mama, vo inio mata o roquemani vo Mama ko meqora poso.

Kelokelozato 2:23

Ni aṉata a ruvurimou se seke luluekani koa reko ko kalo. So inio kiadama lotu qoqono ta kelai nianiiovou ko aṉa inio aqai nianiiani lala se maba poso ko kerukeru ni zario poso ni aṉata a qatimelou me koko vaitotola ma koko reketekete omaomadeu kale kude ko me lula me erekako quli kale avo.