Jone 14:26 - BAṈARA KO VAIRU AMA LEVELEVEO

²⁶ Melai vo Tauvezato, vo Tabu ala Auvana, vo Mama o soroevo ala aṉako ṉikale, ta o melai nianiiekikou kiadama ko quli ni o melai kerukeruekou me kiadama ko quli ko aṉa lula a melai bazuekako me.

Jone 14:26 교차 참조

Matiu 1:18

Eri nio vo Jisu Karisito ko alilo ko kaevo. Voko niania Mere ta lula keva korotika vo Josepa puliako nioqa raekinio, nio kota ko paqumukake ta vo Tabu ala Auvana ko naizato kale inio kota epia ko evake.

Matiu 1:20

So keru vo soa kerukeru obeta eva keru inio vo Baṉara vo mateana ta eri va kiolake voko uloi kale, “Ṉoela, Josepa, vo Devita ko vikuvikula kalea laṉa, ṉota pui ṉoda ka kaikuapou raeko ko Mere tu ṉoko reko kaqe. Ako vo Tabu ala Auvana ko naizato kale inio epia ko eva sole.

Matiu 28:19

Tu meta olamo kiadama maba poso kasi kiadama peuru ma peuru kale, tu aṉako disaipeli imomo se, ni bapitaiso imomo se vo Mama, ni vo Meqora, ni vo Tabu ala Auvana ko ṉikale,

Matiu 3:11

“Aṉata bapitaiso a imela mea maba poso mela jukale tu ko mamola pueko meko lilizio, melai vo mainio opa kilo ala aṉako tova inio bapitaiso o imelou me Tabu ala Auvana ni uza kale, ni vota matu raura kala aṉa kasi azo, ni aṉata pui a male tu vovo mabaku va elo tu ava boriko voko kiti ko kiazakiaza.

Maka 12:36

Melai Tabu ala Auvana inio o kativake ko kerukeru vo Aikovakova Devita ti vota eri kiolake o kera kale, ‘Vo Baṉara ta eri vati kiolake aṉavo Lekasa, ṉota papi aṉako palo rana tu ṉo lekasa puo, ti kobeta barolou so keru aṉa a vaemou keru kiadama ṉoko kana poso ṉoko pizato kale.’

Maka 13:11

Ni so keru seke noqoemelou keru, ni ke melati ziovou keru titizikinio kale, meta pui tiṉoliṉoli meqai elou ko noi nio me kimevo avo kio seke melai kuirikani me ko ruqe kasi. Melai so keru taku ko barolou keru inio meta me qasekou koa pesipesi meko kerukeru kale ko kilo ama, ako pui me ṉaviko kerukeru kale inio meba pesiovou sole melai vo Tabu ala Auvana inio o pesiovou mekale kude.

Luke 1:15

Vota raura kala maba o elou vo Baṉara ko vilu kasa, ni vota maba pui opa nozuekou ko vaini ko ju ni piza kama ju, melai Tabu ala Auvana ta ovai sukatou vo puliako vo alilo.

Luke 1:35

Nio vo mateana ta o kati tiorikake ko ni eri kiolake kokasi, “Vo Tabu ala Auvana ta o kilou ṉo tona, ni vo Baṉara ko pizato ta ko bouluṉou ṉo. Komia kalo kale inio voa tabu ala salua ta vo Baṉara vo Meqora kovai nokailou.

Luke 1:41

Ni so keru Ilizabeti ko viqa keru Mere ko zoleilo sama pesio, vo meqora ta o matu bokilikake koko siapa. Ni Tabu ala Auvana ta okai sukatake ko Ilizabeti,

Luke 1:67

Nio Jone vo mama Zekaraia ta ovai sukatake vo Tabu ala Auvana ni o pidokatake, ni eri kiolake,

Luke 11:13

Meta ruqea mela melai meta meqai zaria katimo ko uri ama quli meko meqora poso. Mevo aukale ala Mama ta o melai paloasa me, sole me rovea tuvevo pueko ta vota o katimou ko Tabu ama Auvana seke pasekani vokasi!” kiolake.

Luke 2:25

Ni inovoana kala pado maba vo obeta evani sai Jerusalema o ṉi ta Simeoni. Vota kala sidopu ala maba ni ovai oquani vo Baṉara, ni o tarevani Izireli vo Pakio. Vo Tabu ala Auvana ta ovai evake vo,

Luke 24:49

Ni aṉa inio a melai soroevou vo Tabu ala Auvana, vo aṉavo Mama o mela inainaeveni me. Melai meta me daruanou Jerusalema peuru kale ti kobe melai barolou koa pizato aukale azo ko kilo ama me tona,” ma kiolake.

Luke 3:22

ni vo Tabu ala Auvana ta o saqorake vo tona, ni voa Auvana ko velo ta ova kurou jari ala. Ni vota o viqake ko kora aukale azo ama ko eri kikolako, “Ṉota a ṉavivo meqora ṉa, a matu roqueṉani ṉa. Ṉo inio aṉa aṉa matu zoleivani ṉa,” kikolako.

Jone 1:33

Puliako kelo komi aṉata pui aba vai nianiiovi vo, melai vo Baṉara o soroeleni aṉa tu aṉata a bapitaiso puto jukale ta lula o uria bazuele, ‘Ṉota ṉo velou vo Baṉara vo Auvana ko saqoro ni vota o satou kala maba topi. Vo inio voa maba vo o bapitaiso puto ala vo Tabu ala Auvana kale.’

Jone 12:16

Ni voko disaipeli poso ta pui ke paqumukake koa taku kale, melai koko tova, voko mata saevo keru voko ṉaṉaidara sate inio seta ke kerukeruekake ta koa Tabu ama Riki va kikovevo ikio koko ereima quli Jisu kasi kikelake.

Jone 14:16

Nio aṉata a basevou vo Mama, ni vota o katimelou me kala pado Tauvezato, vo inio voa Tabu ala Auvana, vo kasa o ikani vo Baṉara ko tuveano, vo o elo ala mekasi latau ṉaniu ni ka ṉaniu. Komia peuru ma peuru kale amu ta pui ke ṉeamuva vo, ako seta pui ke vea ni pui kevai nianiia vo sole. Melai meta mevai nianiia vo, ako vota o eva me sase ni me melai me eva vo sase sole.

Jone 14:25

“Aṉata lula a melai bazueka komi so keru aṉa koi abeta eva keru mekasi.

Jone 15:26

“Melai so keru voa Tauvezato o kilou keru, vo aṉa a joroevo ala mekasi vo Mama kasi azo, inio vota olai bazubazutou aṉa. Vo inio voa Tabu ala Auvana vo kasa o iko ala vo Baṉara ko tuveano.

Jone 16:7

Melai tuvevo avole aṉata a bazuemela me, kota matu qulepo ama quli meko, tu aṉata a ziovou, ako aṉata pui a vaemelou me ni pui a ziovou tea, voa Tauvezato, vo Tabu ala Auvana ta pui opa kilou mekasi. Melai aṉata a ziovou inio aṉata a joroevou vo mekasi.

Jone 2:22

So sole vo o saeve keru voukale azo ko tova, inio voko disaipeli madu ta ke kerukeruekake komia vo o erekema pesio, nio seta ke tuvevo puekake ko Tabu ama Riki kikovevo ni Jisu kiovevo.

Jone 20:22

Vota so kiolake saita inio omai kozatake se, ni eri ma kiolake, “Vomo vo Tabu ala Auvana.

Jone 6:45

Ako se poropita madu ta ke rikieke ko eri, ‘Kiadama maba poso, Baṉara ta o nianiiekimou!’ So sole kiadamu keta va viqani vo Mama ni ke koani ko nianiio vokasi azo ta ke kilou aṉa kasi.

Jone 7:39

Jisu so va kioveni ta Tabu ala Auvana inio, vo seke tuvevo puevo amu vo ke vovo ala Tabu ala Auvana. Koa taku keru Jisu soa pesio o eve keru ta pui nio o katiziake vo Tabu ala Auvana maba madu kasi, ako Jisu ta pui nio o koivake voko ṉaṉaidara kama zaekale sole.

Iruruputo 1:2

ti kobeta baroi koa ṉaniu vo Baṉara o koivievo keru vo aukale. Puliako vo koilo aukale ta vo Tabu ala Auvana ko pizato kale vota o katimake ko bazu sea maba poso vo o pitoemeni tu voko apositolo madu ke elo.

Iruruputo 1:4

Ni so keru seke padoiva keru inio vota eri mati kiolake se, “Meta pui vaeko ko Jerusalema, melai meta tarekomo koa katizato aṉa lula a qasekema, koa katizato aṉavo Mama o kasekema ta me qovou ka kiovema.

Iruruputo 1:8

Melai so keru vo Tabu ala Auvana o kilou keru mekasi inio ko pizato ta ko melai sukatou me, nio meta melai bazubazutou aṉa sai Jerusalema, ni koa pado ama Jiudia ni Sameria peuru poso kale, ti kobeta barolou peuru ma peuru ko pakale,” kiolake.

Iruruputo 11:16

Nio a qerukeruekake vo Lekasa Jisu eri ka kiovema, ‘Jone ta o bapitaiso pute jukale melai meta bapitaiso me elou Tabu ala Auvana kale,’ ka kiovema.

Iruruputo 13:2

Ni so keru se kebe ilusiva keru vo Lekasa Jisu seko lotumato kale, ni kebeta tabutabua keru seko pui vuato kale, inio vo Tabu ala Auvana ta eri kiolake sekasi, “La edolikomo Banabasi ni Saula, tu nioqata qo ereko koa iruruputo ko lula aṉa aqai pitoekako nioqa,” kiolake vo Tabu ala Auvana.

Iruruputo 13:4

Vo Tabu ala Auvana ta o soroekake Banabasi ni Saula so sole nioqata qo olake Seleusia ni qo pakeake Saipirasi udu kale kala tepe vaka kale.

Iruruputo 15:28

Vo Tabu ala Auvana ni eṉe ta lula omadeu ṉe ika eṉeko zario tu puliama edoloma bouro ta ko elou me tona melai komia qulepo ama bazu poso ko kiada ta me qati vailou, ko eri:

Iruruputo 15:8

Ni vo Baṉara vo okai nianiiani maba ko kerukeru, ta kasa oma ike se pui Jiu amu voko mai zoleilo se, ako vota o katimake sole se vovo Tabu ala Auvana, omadeuvo vo o katimele anime Jiua mela jari.

Iruruputo 16:6

Ni seta keta olake koa Pirijia ni Qelesia ranama peuru poso kale kude, ako vo Tabu ala Auvana ta pui o zariemake se tu seta kekai bazubazuto ko Uri ama Bazu Eisia ranama peuru poso kale sole.

Iruruputo 2:33

Vovo Mama Baṉara ta o koivieve vo Jisu aukale ni vota o papueve vo o ṉavi Baṉara ko palo rana vasia rana, ni vo Jisu ta o voake vokasi azo vo Tabu ala Auvana vo lula ova kaseveni tu o kativo. Ko erisaṉa meme qeako ni me viqako quli, ko ikio vo Jisu ko katizato vo eṉe tona o ṉelai raibikake.

Iruruputo 2:4

Nio sea kiadamu ta omai sukatake Tabu ala Auvana, ni seta ke tanitake kai pesio edoedoloma pesio poso, voa Tabu ala Auvana ko ikirimo kale.

Iruruputo 20:28

So sole meta kati vailomo meko saevo ni kati vailomo kiadama koa lotu qoqono vo Tabu ala Auvana lula o vaekako meko vailo kale. Omadeuvo vo sipi o kati vailani maba ta o kati vaila voko rovaṉa jari meta kati vailomo vo Baṉara ko lotu qoqono ko lula o ṉaviko o ikema vovo Meqora siqasiqa ma elo kale voko voukale.

Iruruputo 20:35

Aṉata a mela kasa pueke tu komia keve kale animeta me matu iruruputo tu me dauvemo se lekuleku amu, kerukerueko kale ko bazubazu o ṉavi vo Lekasa Jisu o rukuekema, ‘Matuma zoleilo katizato kale ama ta kota ka qulepa koazato kale ama,’ ka kiovema,” kiolake vo Paula.

Iruruputo 28:25

So sole seta keta zolizoliekiniake, nio Paula ta o kasevake matu tovatovala quli sekasi, ni eri kiolake, “Vo Tabu ala Auvana ta uria kaseko o evake vo poropita Aisea ko riki kale ko tuveano meko taite poso kasi. Ako vota eri kiove sole, ‘Ola ni eri pa kive nia maba poso kasi: Meta viqo ti viqo me elou, melai pui meba paqumukou; ni meta kelo ti kelo me elou, melai pui meba patapataekou. Ako nia maba poso ko bulo ta zokele ke ikou sole, ni seta ke sutamukou seko taliṉa ni ke imadikou seko vilu tu seko vilu ta pui ko kelokelozatou, ni seko taliṉa ta pui ko viqaviqazatou, ni seko bulo ta zokele ko elou, melai pui so tea seta keta vaitou nio aṉa kasi, kiolake vo Baṉara, ni aṉata a urikimo inio se,’ ka kiovema.” Ni Paula ta o paikake pesio voko eri kio kale: “So sole meta paqumukomo ko eri; vo Baṉara ko pakiezato ko bazubazu ta lula ko soroiva pui Jiu amu kasi. Ni seta ke roveovou viqo ko!” kiolake. Ni voko so kio ko tova inio seta ke tanitake zio seko matuma zolizoliekinio kale ke ṉavio kude.

Iruruputo 5:3

Nio Pita ta eri kiolake vokasi, “Ananaiasi, noi sole inio ṉota ṉo lekasa pueva vo Setani ṉoko bulo kale ni ṉota ṉo lipalipaeva vo Tabu ala Auvana ṉo taka ṉeamuko kale kama kobu seleni ṉo ṉoqai tatabaraolama lomaloma kale azo ko puratalama kale azo?

Iruruputo 7:51

Ni Sitiveni ta obeta olake pesio ni eri ma kiolake, “Me matu meomeo kamela! Maba kutumana kamu mebeta eva meko bulo poso kale, ni puliama ka taku kale inio meqai zaria viqo vo Baṉara ko bazubazu! Meta omadeuvo meko taite poso jari meda kava, ako meta se jari kiada keru me bikoirivani mela vo Tabu ala Auvana!

Iruruputo 7:55

Melai Sitiveni, vo ovai sukatani vo Tabu ala Auvana, ta o tadatake aukale ni o keake vo Baṉara ko ṉaṉaidara ni Jisu vo obeta lojoani Baṉara ko palo rana vasi.

Romu 14:17

Ako vo Baṉara ko lekasa puo kale elo ta pui sailao ko kuo ko kio kale ama ni ju ko nozueko kale, melai kota sidopu, ni bule kale, ni zoleilo kale vo Tabu ala Auvana o puarikake kale inio sole.

Romu 15:13

Vo Baṉara, vo o katimelani anime ko keru tu me qovo ko noqola kama saevo, ta o melai avozikou me kiadama zoleilo ni bule meko vai oqu kale vo, tu koa meko keru ta ziole kobeta ziovou vo Tabu ala Auvana ko pizato kale.

Romu 15:16

vo Jisu Karisito nabuluputo kale se pui Jiu amu ma koidipo kale. Aṉata a nabuluputa kala pado siama jari kai bazubazuto kale vo Baṉara kasi azo ko kuevako Uri ama Bazu, tu se pui Jiu amu ta koroto ama siqasiqa jari ke elou Baṉara kasi tu seta tabu ke elou vokasi vo Tabu ala Auvana kale.

Romu 5:5

Ni koa keru ta pui quraqurati ama quli anime kasi, ako Baṉara ta lula o raibike voko roquano animeko bulo poso kale vo Tabu ala Auvana kale, vo lula o katiziovini tu anime kaqe.

1 Koriniti 12:3

Sokale aṉata a mela zaria me tu paqumukomo ko puliala vo o pesiani Tabu ala Auvana kale ta eri pa kiovou, “O leveziovou vo Jisu!” ni puliala ta eri pa kiovou, “Jisu ta Lekasa inio,” vo pui Tabu ala Auvana kale o pesiani.

1 Koriniti 6:19

Meta pui meqai nianiia ta meta vo Tabu ala Auvana ko Jelepade mela inio, vo o evani meko bulo kale ni vo Baṉara o katimeleni me kio? Pui meko mela inio ko me, melai vo Baṉara ko mela.

2 Koriniti 13:14

Vo Lekasa Jisu Karisito ko pakiezato sama roquano, ni Baṉara ko roquano, ni vo Tabu ala Auvana ko bairumuo ta ko elou me tona.

2 Koriniti 6:6

Eṉeta lula kasa ṉe ika eṉeko va nabuluputo vo Baṉara eṉeko bulebule ama saevo kale, ni eṉeko nianiio ni paṉao ni eṉeko puaropuaro kale, vo Tabu ala Auvana kale, eṉeko tuvevo ama roquano kale,

Epesasi 1:13

Ni so jari meta vo Baṉara ko meqora poso mela me eveni mela so keru me viqe keru ko tuvevo ama nianiiekato, koa meko pakiezato sama bazu. Ni me tuvevo me ive keru vo Karisito inio vo Baṉara ta o mamola puemele me tu o ṉavi kaqe voko katimelo kale voa Tabu ala Auvana vo leveleveo o iveni.

Epesasi 1:17

Ni kiada keru aṉata a vararaita Baṉara kasi, animevo Lekasa Jisu Karisito vo ṉaṉaidara kala Mama, tu vota o katimelou vo Tabu ala Auvana, vo o nianiiekimelo ala ni kasa o mela ivo ala vo Baṉara tu meta mevai uria nianiiovou vo.

Epesasi 4:30

Ni meta pui duki me ivou vo Tabu ala Auvana, ako vo inio vo Baṉara vo mamola me o melai ṉeamukani sole. Ni vo Baṉara ta o katimele me voa Auvana tu kasa o ikou ta vo Baṉara ta o rupasimelou me komi ko kuevako taku kale.

1 Tesalonaika 4:8

So sole voa maba vo okai keduvo ala komia nianiiekato, ta pui ovai kedua kala maba, melai vo Baṉara inio ovai kedua, vo o katimelani me voko Tabu ama Auvana.

2 Timoti 1:14

Vo Tabu ala Auvana ko pizato kale, vo obeta evani anime tona, ṉota kati vaile ko Uri ama Bazu ko tuveano, vo Baṉara ṉai keru kale lula o vaekako ṉoko ṉase topi.

Taitasi 3:5

vota o pakiemele anime. Pui kama quli uri ama anime lula me erekako kale, melai voko pakiezato sama roquano kale inio vota o pakiemele anime vo Tabu ala Auvana kale ama pusailo kale, vo o katimeleni anime vairu ama alilo ni vairu ama saevo.

Hiburu 10:15

Vo Tabu ala Auvana melai uria kasa o mela ika anime ko quli ta tuvevo ama quli ikio. Kuleto vo Baṉara ta eri kiolake,

Hiburu 2:4

Koa taku kale vo Baṉara ta o mati vinaekake ko voko pizato kale, voko ereko kale kiadama aqasiele ama iruruputo ni voko puariko kale azaazama iruruputo ko pizato Tabu ala Auvana kasi azo ko kuevako o ṉaviko vatolo kale.

Hiburu 3:7

So sole animeta me viqou vo Baṉara vo Tabu ala Auvana ko pesio kikolani, “Meta me viqou vo Baṉara ko pesio vairutu,

Hiburu 9:8

Kiadama ko quli kale Tabu ala Auvana ta uria kasa o mela ika anime ko anime mebeta ziovou lulueko ko tepe pade ko kalo tea, animeta pui nio me zarizia amaqeo ko Matu Tabu ama Zaekale, vo Baṉara ko tanama kale.

1 Pita 1:12

Ni vo Baṉara ta kasa o ike se poropita madu kasi, ta seko bazubazuto ko iruruputo ta pui ke ṉaviko uri, melai kota meko ikio sole. Ako seta ke mela irurupute inio me so keru se kekai bazute keru lulavo ko tuveano ko meda ma viqako vairutu sea bazubazuto ko maba poso kasi, se kekai bazutani ko Uri ama Bazu vo Tabu ala Auvana ko tauvemo kale vo o kuevini aukale azo. Se mateana madu melai kekai matu zaria paqumuko komi quli.

2 Pita 1:21

Ako puliama se poropita madu ko bazu ikio kopa utu erei vo maba ko vatolo kale. Melai sea maba poso seke odiziani Tabu ala Auvana kale inio kekai pesiake vo Baṉara ko bazu.

1 Jone 2:20

Melai meta Tabu ala Auvana samela vo Jisu o katimeleni. Sole mea kiada mela ta meqai nianiia ko tuveano.

1 Jone 2:27

Ako vo Karisito ta o katimele me voa puaro sole, vo Tabu ala Auvana, ni voa puaro ta inevoana mekasi. Sole meta mata pui meba va zariovou kala edolola nianiiekato ko maba. Ako voa puaro o katimeleni ta obe nianiiekimela me sole. Ni voa puaro ta tuvetuve ala sole, melai pui lipalipa kala. So sole meta vinaimo Karisito kale, ako vovo puaro ta obe melati nianiiekata me tu meta me vinailou Karisito kale.

1 Jone 5:7

Ni zouke quli kio kasa ko ivako vo Jisu:

Jiudi 1:20

Melai me a baerebaere poso mela, meta rapukomo me ṉavi meko matu tabu ama oqu kale. Meta vararaitomo vo Tabu ala Auvana ko pizato kale,

Kelokelozato 2:11

“Uri tu meta paqumukomo meme viqako quli vo Tabu ala Auvana kiolani sikeura lotu qoqono kasi! Seke koqotaeko amu ko ruqe ta pui kopa tolaemou ko omuqama pado vou.