Jemisi 1:19 - BAṈARA KO VAIRU AMA LEVELEVEO

¹⁹ Lolo poso, me a roquemelani mela, meta kerukeruekomo komi quli! Kiada mela meta dikidauputole viqomo, melai pui jijiro pesio elo ni pui kapi avole korakorailo.

Jemisi 1:19 교차 참조

Matiu 5:22

Melai aṉata a bazuemela me, kala ta ovai korakorailou vovo lolo ta vo Baṉara inio o titizivou vo, ni kala ta o ruqe kasevou vovo lolo ta vota o titiziovou vo Baṉara ko matu raura kama titizato kale. Melai kala ta ovai korakorailou vovo lolo, ni vota ovai kuirikou ta vota kutumana kala, ta vo o korakoraivani ta o male tu ko qoloevou ko heli ko uza.

Maka 12:37

“Ni vo Devita ta ova nokae voa Pakio ta vovo Lekasa, sole noi nio voa Pakio ta vo Devita ko vikuvikula kale ala inio?” kiolake. Ni sea matuma vaki ta ke didievake vo Jisu ni keta zoleike.

Maka 2:2

Nio matu kubo maba madu ta keta padoivake koa pade kale ni keta sukatake, ni veutu ko kupekupe melai puliama rora. Nio so keru vo Jisu obe kai bazubazuta keru vo Baṉara ko bazu nia maba poso kasi,

Luke 15:1

Omadeu taku so keru kubo maba madu se takisi ke koani ni mata kake ruqe ama maba madu ke kuevi keru Jisu kasi tu didievole vo kikelake,

Luke 19:48

melai seta pui ke roveake kelo kama pado keve tu ke vouvaevo vo, ako kiadama maba poso ta pui ke dokolake didievo vo sole, pui keka zariake tu kai suato kama pado voko pesio sole.

Iruruputo 1:15

Ni kama poso ṉaniu ko tova nio seke tuvevo puteni ko pesipesito ko padoilo ta ko ereivake, ni seko ataataiti ta omadeu paizana karabete madu. Ni Pita ta o lojoake, ni eri kiolake,

Iruruputo 10:33

So sole aṉata a joroemala se ṉokasi maba koa taku kale, ni matu uri ṉota ṉo rovela kilo. Nio erisaṉa ta eṉea kiada ṉela ta ṉebeta eva koi vo Baṉara ko tanama kale ṉebe tareka tu ṉe viqo ko quli vo lula oṉai bazuekako ṉo tu ṉo ṉelai bazuekou eṉe,” kiolake.

Iruruputo 13:48

Nio so keru se pui Jiu amu ke viqe keru ko, seta keta zoleike ni matu uri ka kikeve vo Baṉara ko bazu, ni seke pitoini tu ke kovo amu koa noqola kama saevo ta ke tuvevo putake.

Iruruputo 17:11

Ni saizama maba poso ta uri ama kerukeru samu pui se Tesalonaika mu jaria ruqe amu. So inio seta ke matu uria didiekake ko bazubazu, ni kiadama ṉaniu seta ke tiromikake ko Tabu ama Riki tu keta ka kelo vo Paula ni Sailasi kiqolani koko tuveano kikelake sole.

Iruruputo 2:42

Ni seta ke vinaitake se apositolo madu ko nianiiekato tama viqo kale kiada keru, ni kekai zomanake seko baerebaereo ko saevo, ni seta omadeu vuato ni vararaito ke evake.

Epesasi 4:26

Ni so keru meme qorakorailou keru ta pui zarieko koa korakorailo tu boutare saṉa ko imelou, ni meta vaekomo meko korakorailo puliako vo ṉaniu sulupo.

Epesasi 4:31

So sole meta vaekomo kiadama pasopasoilo ni korakorailo ni bomuilo ni karaṉo ni ruqe kasemo edolomu. Ni meta pui mata me erekou kama kideipo sama quli.

Kolosi 3:15

Koa bule vo Karisito o puarikako anime kasi ta ko aveavemelou me kiadama quli meme erekako quli kale, ako vo Baṉara ta lula o pitoemele me tu meta omadeu qoqono me elou bule ama kerukeru kale. Ni meta kativomo vo Baṉara meko uriavo kiada keru.

Kolosi 3:8

Melai erisaṉa meta pui memai korakorailou, ni pui me niumaemou edoloma maba poso. Puliama maulumauluto ni kovasa puto ta ko rukuilo meko suto kale.

1 Tesalonaika 2:13

Ni mata eri kale avo inio eṉeta pui ṉe lalamata ilusivo vo Baṉara. Ako so keru eṉe ṉe qati kuevi keru mekasi vo Baṉara ko bazu, ta meta me viqe ko ni me ṉeamukake ko, ako meko kerukeru kale ta kota pui kama maba ko bazu jari ama ikio sole, kimeve, melai kota o ṉavi Baṉara ko bazu kimeve. Ni meta meda tuveane, ako kota o ṉavi Baṉara ko bazu tisoiko. Ako vo Baṉara inio o iruruputani meme duvevo putani mela ko saevo ni bulo kale sole.

Jemisi 1:16

Me a lolo poso a roquemelani mela, meta pui zariemo kake tu seta ke saruemelo me!

Jemisi 1:2

A lolo poso mela, meta zoleimo so keru kiadama tapata poso ko barou keru mekasi,

Jemisi 1:26

Esa kala ta o kerukeruta ta vota lotu maba inio, melai pui o kati vailou voko lenio, ta voko lotu saevo ta pui ko malezia ni vota ota saruiva.

Jemisi 2:1

A lolo poso mela, meta mevai oquani mela vo animevo Lekasa Jisu Karisito, vo ṉaṉaidara kala Baṉara, so sole meta pui tama paṉao kake pala ni mai masapo kake seko kupekupe ama melo ko pitasimo kale.

Jemisi 2:5

Lolo poso, me a roquemelani mela, meta viqomo! Vo Baṉara ta lula o pitoema se peuru ma peuru kale ama ozaoza kamu tu seta piza kama oqu saṉa ke elo ni jiku ke iko vo Baṉara oma inainaekako quli voko lekasa puo kale seke roquevani vo.

Jemisi 3:10

Ilusato ni ruqe pesio ta ko saqora omadeuma suto kale. A visi poso mela, ko quli ta pui ko male tu ko ereilo.

Jemisi 4:11

Meta pui kuirikinio me ṉavio kude, me aṉako tamania kalea mela. Ako vo kuiripato saṉa o ivani kala lotu maba ma o titizivani, vota kuiripato saṉa o ika ko Tabu ama Bazu ni vota o titizika. Ni meta me ditizikou ko Tabu ama Bazu, ta me inio ko me pui me zorikani mela ko Bazu, ni me inio me ditizikani mela ko.

Jemisi 5:12

Matuma quli a melai bazuekou ta komi kio, a lolo poso mela, meta pui me erekou ko kejo so keru meme qasekou keru meko tuveano. Pui kejo kai ereko ko au ni miduku ni mata kama lomaloma. Melai meta “Zio” pala kiomo ni “Pui” pala kiomo meko tuveano kaseko kale, ako meta tuveano ko maba poso mela sole. So inio meta pui me qovou vo Baṉara ko titizato.

Jemisi 5:19

A lolo poso mela, meta kerukeruekomo ko komi. Kala me azo ta o vaekou ko tuveano, ti kala edolola ta mata o vaitoevou vo sidopu kale,

1 Jone 2:21

Noi sole inio aṉata a mela rikita me? Aṉata a mela rikita me ako meta pui meqai nianiia ko tuveano sole, kio? Maba pui, melai aṉata a mela rikita me ako meta meqai nianiiani mela sole ko tuveano, ni meta meqai nianiiani mela ko eri, puliama lipalipato ta ko kuevako tuveano kasi azo kio.