Nio sea kiadamu seke tuvevo puteni ta omadeu vatolo ni kerukeru ke evake seko bulo poso kale. Ni puliala se azo ta oka zariake kai kiadailo voko lomaloma melai seta kekai tauvekiniake kiadama seko quli.
Melai a qaka ni visi poso, vo Baṉara ta o nokaemele me tu me rupasio. Melai koa meko rupasio ta pui tu meko ruqe ama zario kaqe, melai koko kio ni kalo ta meta tauvekiniomo roquano kale.
Ni eṉe omadeu ṉe evani ṉela Jisu Karisito sase ta ṉe baqumukani ṉela ta pui ko tauveṉela ko moveilo ni pui moveilo tu sidopu elo Baṉara ko kelokelozato kale. Ako qulepo ama quli ta oqu ikio sole, koa oqu ko kasa ko evako roquano kale.
Ni meta omadeu emo vo Tabu ala Auvana ko bule kale, ni meta matu madoekomo ni omadeu beta zio emo voko bule kale. So inio voko bule ta omadeu ko imelou me.
Ni saevomo roquano kale, ni roquemomo edolomu, omadeuvo vo Karisito ta o roquemele anime jari ni vota pui opa kaitiziovi tu o vou anime kaqe. So inio vota matu uria tui ala katizato ni siqasiqa o eveni Baṉara kasi.
Ṉe visi poso ni ṉe qaka poso mela, eṉeta ṉe ilusiva vo Baṉara kiada keru mekale avo. Ni kota sidopu tu eṉeta ṉe ereko koa kalo ako meko vai oqu vo Baṉara ta kota rapuka sole ni meko roquekinio melai kobeta ola rapuko sole.
Meta lula bulebule me evani mela vo Baṉara ko tuveano ko zoriko kale, tu me roquemou meko lolo poso lipalipa pide ama roquano kale. So sole roquekiniomo muli tuvevo avole meko bulo kale.
Meta meda ma paṉaovou kiadama maba madu, ni me roquemou seke luluevani vo Jisu, ni meda va matu paṉaovou vo Baṉara kiadamu kasi azo, ni meda va paṉaovou vo aikovakova.
Ni tovatovama aṉako pesio kale, aṉata eri kiala mekasi. Mea kiada mela ta omadeu elo emo bule kale. Madoekomo tu mati lainikomo edolomu ko duki ni zoleilo me ṉavio kude. Ni tamania jaria roquekinio emo. Ni tauvekiniomo ni pui aikailo me ṉavio kude.
Melai ko matu qulepako quli ta roquekiniomo muli meko pado ama bulo kale. So inio meta me mati odouvikiniou kiada keru meko lolo poso seke sarueko amu mekasi.
Ni komi quli kio vo Baṉara o melai bazuekako: animeta tuvevo me ivo vovo Meqora Jisu Karisito ni me roquekinio muli omadeuvo vo Jisu melati kiovevo jari.
Ni kala ta eri kiovou, “Aṉata a roqueva vo Baṉara” kiovou, ni ovai kaikuapou vovo lolo, ta vota lipalipa kala. Ako noni kale inio vota o roquevou vo Baṉara vo pui o veani, ni ovai kaikuapou vo vovo lolo obe veani o vilu kale? Puliala inio so opa roveovou sole!
