Ni vo Jisu ta obeta olake voko bazubazuto kale, ni eri kiolake sekasi, “Meta lula me viqa ko bazu ko eri kikovema, ‘Meta me roquemou meko baerebaere poso ni memai kideipou meko kana madu,’ kikovema.
Ni voa Mosese ko Bazu okai nianiiekatani maba ta eri kiolake, “Voa maba vo o tauveveni vo, vo inio vo o roqueveni,” kiolake. Ni Jisu ta o opatake, ni eri kiolake, “So sole ṉota ola, ni pa ereka so jari,” va kiolake.
Ako koa kiadama vo Mosese ko Bazu ta komia omadeu pado Bazu topi ko kiada, ko eri kikolako, “Roquema edolomu omadeuvo ṉo ṉavi ṉo roquiva jari,” kikolako.
Ni eṉe omadeu ṉe evani ṉela Jisu Karisito sase ta ṉe baqumukani ṉela ta pui ko tauveṉela ko moveilo ni pui moveilo tu sidopu elo Baṉara ko kelokelozato kale. Ako qulepo ama quli ta oqu ikio sole, koa oqu ko kasa ko evako roquano kale.
Aṉata pui aba kai pesipesitou komia riki kale ko animea lotu tamania kalea mela ko roquekinio. Ako koa roquekinio ko kalo ta lula o melati vakakuka vo Baṉara me ṉavi sole.
Ni tovatovama aṉako pesio kale, aṉata eri kiala mekasi. Mea kiada mela ta omadeu elo emo bule kale. Madoekomo tu mati lainikomo edolomu ko duki ni zoleilo me ṉavio kude. Ni tamania jaria roquekinio emo. Ni tauvekiniomo ni pui aikailo me ṉavio kude.
Melai ko matu qulepako quli ta roquekiniomo muli meko pado ama bulo kale. So inio meta me mati odouvikiniou kiada keru meko lolo poso seke sarueko amu mekasi.
A roquemelania baerebaere poso mela, komia bazu aṉa a melai bazuekako aṉako mela rikito kale tu meta me erekou ta pui vairu ama bazu, kota lulavo ama ikio. Ni kota koa omadeuma soru ko meme qoema ko tanitanila keru azo. Ni ko ikio koa omadeuma bazu ko me mebe viqema.
Ako animeta meqai nianiia ta animeta lula me baloasika ko vou, ni erisaṉa animeta lula meda baroa vairu ama saevo kale. Animeta meqai nianiia komi quli animeko roquemo kale animeko lotu tamania kale amu. Melai vo pui o roquanani ta obeta evani nio voukale.
A meqora poso, animeko roquano ta pui pesio kale ko kiada ko elou. Melai animeko roquano ta tuvevo ama ko elou ni ko kasa puilou animeko tauvekinio kale.
Ni komi quli kio vo Baṉara o melai bazuekako: animeta tuvevo me ivo vovo Meqora Jisu Karisito ni me roquekinio muli omadeuvo vo Jisu melati kiovevo jari.
