4 Inkoli isho ukashitole kuTente ya Cipangano akushibika kunembo lya Libokoshi lya Cipangano, uko nkoonkumanina awebo.
Kuswawaawo, Mose wakabika nkoli shoonse muTente, kunembo lya Libokoshi lya Cipangano ca Mwaami Lesa.
Shimwi ukatwe kwaamba ayi shibe busu akubutola muTente ya Cipangano. Ukabusanseele kunembo lya Libokoshi lya Cipangano uko nkweshi nkanookumanina amwebo. Tununkila kabotu uto ulyeelete kwishiba ayi tulisalalite cancinencine.
Cipaililo ici, ukacibike pansengwe lya cisani ico cileleela panembo lya Libokoshi lya Cipangano, panembo lya cifwekesho cankumbu ca Libokoshi lya Cipangano uko nkweshi nkanookumanina awebo.
Mpeeke ukalembe liina lyakwe Aloni pankoli itokwiimikanina bene Lefi. Anu kulaakuba nkoli yomwi ya mutanjilili wa mukowa uli woonse.
Kuswawaawo Mwaami Lesa wakaambila Mose ayi, “Boosha nkoli yakwe Aloni kunembo lya Libokoshi lya Cipangano. Ilyeelete kubikwa ayi njakucenjesha bene Isilaeli abo beshikubukila bamatanjilili ayi balaakufwa na kutongooka kwabo kubule kumana.”
