Sekaliya 7:13 - Baibo Busansulushi Bwa Libuku Ili

¹³ Tabakwe kunyumfwa ndindakalinga kubaambila. Aboobo anebo nshikwe kubakumbulaawo ndibakalinga kupaila kuli ndime.

Sekaliya 7:13 교차 참조

Jelemiya 14:12

Nabi bakalikashe kulya, kulila kwabo teshi nkakunyumfweewo. Nabi bakabenge milambu yabo yakutenta akupa shipo sha fulaulo teshi nkashitambulewo, sobwe. Sombi ndaakubanyonyoola kunkondo, nsala alimwi akumwaalu.”

Isaya 1:15

“Mwaakunyamuna maansaanu pakupaila, teshi nkamulangilisheewo, sobwe. Teshi nkanyumfwe nabi mukapaile mankanda aanji buyani mukwiinga maansaanu aliswitebo milandu yakutila bulowa.

Jelemiya 11:11

Paceebo ceeco nebo neMwaami Lesa ndaamba ayi, ‘Ndaakubaletela mapensho ayo ngweshi bakaalilwe akwaacica. Nabi bakandilile, teshi nkabakumbuleewo, sobwe.

Mika 3:4

Ciindi cilaakushika ndyeshi mukalilile Mwaami Lesa, sombi lakwe ulaakukaka kumucafwa. Teshi akakutike kumipailo yanu ceebo ca bubi mbomwakacita.”

Jemusi 4:3

Alimwi nabi mwaseenga inga tamushitambuli ceebo miyeeyo njemucitila boobo njibiibi. Mulasenga shintu kwaamba ayi mushisebenseshe mukulikondelesha mwebo nobeene.

Luka 13:25

Mpomunyaawo mwine ŋanda ulaakunyamuka akucalaako kumulyango. Lyalo mulaakwiimikana akutalika kukonkoonsha akwaamba ayi, ‘Amutucalwiteeko nkambo!’ Sombi lakwe ulaakumukumbula ayi, ‘Nshishi ankomwaswita!’

Esekelo 20:3

“Webo omuntu, lwiita bamaloba bene Isilaeli aba ayi nebo neMwaami Lesa Shinkusu shoonse waamba ayi, ‘Sa mwesa mukwiipusha kuyanda kwangu kuli ndime? Kweelana ambocibete lushinisho ayi ndi muumi, teshi musuminisheewo kunjipusha nabi comwi. Nebo neMwaami Lesa Shinkusu shoonse ndaamba.’

Esekelo 14:3

“Webo omuntu, bantu aba batalika kulambila shibumbwabumbwa nabi balishi ayi shilaakuba mfumpu kunembo lyabo. Sa batooyeeya ayi inga ndabakumbula?

Isaya 50:2

“Anu ndindakesa kwakabulilanshi nabi womwi wakalingaako? Ceebonshi taaku nabi womwi wakakumbula ndindakeeta? Sa nceebo cakwaamba ayi lyaansa lyangu lyalela uko kwaamba ayi mupulushe? Sa nceebo cakwaamba ayi nshicite nkusu shakumupulusha? Amubone, nebo ndaambabo liswi, lweenge lwamana kuyuma. Ndaambabo liswi milonga ilamana kuyuma cakubabo anga nduyanga. Inswi shilamana kufwa akuboolabo nununu ceebo cakubula maanshi.

Tushimpi 28:9

Na muntu kaasuula milawo nabi mupailo wakwe ulalensha bunya kuli Lesa.

Tushimpi 21:13

Na muntu wacala matwi akwe ayi atanyumfwi kulila kwa mukandu, alakwe aakulila lucafwo, taaku beshi bakamukumbule.

Jelemiya 7:27

“Ono webo Jelemiya, nabi ubalwiite shoonse ishi, teshi bakakutikeewo. Ulaakubeeta, sombi teshi bakakumbuleewo.

Jelemiya 11:10

Bakapilukila kushibiibi sha bamashali babo bakulukulu abo bakalinga kukaka kunyumfwila maswi angu. Bakakonkela akusebensela balesa bamwi. Bene Isilaeli abene Juda boonse bakakaka kukonkela cipangano ncendakapanga abamashali babo bakulukulu.

Jelemiya 11:14

“Ono Jelemiya utapaililiiko bantu aba. Utabasengeliiko nabi kubakombelelako ayi mbafwite nkumbu ceebo paciindi baakuba mumapensho teshi nkabanyumfwewo baakunjita.”

Jelemiya 14:2

“Cishi ca Juda citoolila mandabala a mumo afwa. Bantu bekalaamo boona panshi kunsoni ayalo ndabala ya Jelusalemu itoolila lucafwo.

Malilo 3:44

Mwakalifwekelesha likumbi kwaamba ayi mutanoonyumfwa mipailo yesu.

Esekelo 8:18

Paceebo ceeco, balaakunyumfwa cilemeneshi coonse ca bukali bwangu. Teshi nkamufwite nkumbu nabi kumulangabo. Teshi nkakutikewo mipailo yabo nabi bakanokoolobesha cili buyani.”