Malaki 3:16 - Baibo Busansulushi Bwa Libuku Ili

¹⁶ Kuswawaawo bantu abo balemeka Mwaami Lesa bakalyaamboosha, mpeeke Mwaami wakakutika akunyumfwa kulila kwabo. Muliimfwa lyakwe mwakalinga libuku umo mwakalinga kulembetwe micito ya baabo bakalinga kuloonda akulemeka Mwaami Lesa.

Malaki 3:16 교차 참조

Ciyubululo 20:12

Lyalo ndakabona bafu, balemekwa abantubo, boonse kabeemfwi kunembo lya cuuna ca bwaami. Lyalo mabuku akacalulwa alimwi libuku limwi lyakacalulwa, ndyelibuku lya boomi. Bafu bakoomboloshekwa kweelana amicito yabo bweenka mbomwakalinga kulembetwe mumabuku.

Kulumbaisha 56:8

Matongooshi angu amwaalembe, Amulembe shaminsonshi yangu mulibuku lyanu. Sa te shoonse shililembetwe mulibuku lyanu?

Malaki 4:2

Sombi mwebo nomunyumfwila ndime, bululami bwangu bulaakuboneka pali ndimwe bweenka buswa lisuba akumushilika kwiinda mukubala kwa ndilyo. Mpeeke mulaakwaanguluka akutambala anga mboombe bacalwitwa mucimpati cabo.

Ciyubululo 15:4

NoBaami baLesa, ngani utamuloondi akulemeka liina lyanu? Mukwiinga mwebo nweenka ndimwe Musalalite. Mishobo yoonse ilaakuyoboloka mukumulambila mukwiinga micito yanu iluleme, ilaboneka kubantu boonse.”

Bene Ebulu 10:24

Katuyeeya bamakwabesu kwaamba ayi tunoocafwana kubonesha lusuno lwancinencine alimwi akucita shibotu.

1 Bene Tesalonika 5:11

Aboobo kamuyuminishanya akucafwana womwi awomwi bweenka mbuli mbomutoocita.

Malaki 3:5

Mwaami Lesa Shinkusu shoonse utokwaamba ayi, “Ndaakwisa pakati kanu cakutasowa ciindi mukoombolosha. Ndaakushinina beshimampelampela, beshibulale, beshikupa bukamboni bwakubeca, banyengelela beshincito pamaali ngobafola, abaabo banyengelela bamukalubinje banakashi, bana banshiwa alimwi abaswamashi. Nkokwaamba ayi ndaakushinina boonse batandemeki.

Milimo ya Batumwi 9:31

Muciindi ici, bashomi mushishi shoonse sha Judeya, Galili alimwi aSamaliya bakalinga muluumuno. Bashomi aba bakalinga kucatene pantu pomwi, bakafulilaako kwiinda mukuyuminishikwa aMushimu Usalashi alimwi bakalinga kulemeka Mwaami.

Isaya 26:3

Mwebo noBaami baLesa, mulapa luumuno lwiine lwiine kubaabo bashomeka lyoonse ceebo cakucinka manungo muli ndimwe.

Milimo ya Batumwi 10:2

Musankwa uyu alimwi abamuŋanda yakwe boonse bakalinga kulyaaba kuli Lesa akumulambila camoyo woonse. Alimwi wakalinga kucafwa bumbi baJuda bakandu akupaila kuli Lesa ciindi coonse.

Esekelo 9:4

akumwaambila ayi, “Koya mundabala ya Jelusalemu yoonse ukabike cishibilo pankumo sha baabo boonse batoolila akupenshekwa mumyoyo ceebo ca shintu shilensha bunya shitoocitwa muli njiyo.”

Kulumbaisha 34:15

Mwaami Lesa ulalama baluleme alimwi ulakumbula mipailo yabo,

Bene Efeso 5:19

Mulyeelete kwaamba kuli womwi awomwi mumaswi a kulumbaisha, nyimbo sha kulemeka alimwi ashimwi sha kulumbaisha Lesa. Kamwiimbila Mwaami cakukondwa amoyo woonse.

Milimo ya Batumwi 1:13

Ndibakashika, bakenjila muŋanda mucipinda ca peculu mobakalinga kwikala. Batumwi aba bakalinga Pita, Joni, Jemusi aAndulu, Filipo aTomasi, Batolomeyo aMateyo, Jemusi mwanaakwe Alufeyasi, Simoni shikulwanina lwaanguluko alimwi aJudasi mwanaakwe Jemusi.

Danyelo 7:10

Mulonga wa mulilo wakalinga kukunka, ee, kukunka kuswa muli ncico kuya kunembo lyakwe. Kwakalinga shuulu ashuulu sha baabo bakalinga kumusebensela. Kunembo lyakwe kwakalinga kwiimfwi bantu baanji cakutabelengeka. Nkuta yakatalika amabuku akacalulwa.

Luka 2:38

Ceenka ici ciindi Jesu ndyaakatolwa, Ana wakashika walumba Lesa akwaamba makani pamwaana uyo kuli baabo boonse bakalinga kulindilila kupulushikwa kwa Jelusalemu.

Esita 6:1

Ono mashiku eenka ayo, mwaami taakwe koonaawo. Aboobo wakaambila bantu ayi bamuletele libuku lya makani a bwaami bwakwe akumubelengela.

Milimo ya Batumwi 2:1

Bushiku bwa Pentekositi ndibwakashika, bashomi boonse bakalinga kubungene muŋanda yomwi.

Isaya 65:6

“Amubone mulandu wabo ulilembetwe kale, ncakwiila teshi nkoomunebo, sombi ndaakuboosha cishole cikwene, ee, cishole pabubi ubo mbobakacita.

Isaya 50:10

Ono ngani pakati kanu ulemeka Mwaami Lesa akunyumfwila shaamba musebenshi wakwe? Uyo woonse weendela mumunshinshe, ee, uyo utacite mumuni, aacinke manungo muMwaami Lesa akushomabo Lesa wakwe.

Isaya 26:8

Swebo tulacita kweelana akuyanda kwanu alimwi tulalangila muli ndimwe. Tulisuni kubona liina lyanu kalisumpulwa akuya mpuwo.

Tushimpi 13:20

Muntu weenda abasongo alakwe ulaba musongo, sombi shimweenda aumineme alakwe ulaminama.

Kulumbaisha 147:11

Sombi ulasangalalila muli babo bamulemeka, abo bacinka manungo mulusuno lwakwe lutamaani.

Kulumbaisha 139:4

Kaantana kukusha aliswi pamulomo wangu, noBaami baLesa mwebo inga kamulishi kale.

Kulumbaisha 119:63

Boonse abo bamusebensela mbeensuma, ee, abo boonse bakonkela milasho yanu.

Kulumbaisha 111:10

Kuloonda Mwaami Lesa ngomatalikilo a busongo. Boonse abo bakonkela milasho yakwe mbobacite lushibo lwiine lwiine. Aalumbaishikwe lyoonse alyoonse.

Kulumbaisha 94:19

Kulisukama ndikwakalinga kuncata, mwebo mwakanjumyayumya akunsangalasha.

Kulumbaisha 66:16

Kamwisa mukutike noonse nomulemeka Lesa, ntoomulwiita nshaakancitila.

Kulumbaisha 33:18

Sombi meenso a Mwaami Lesa ali pabaabo bamulemeka, abo bacinkite manungo mulusuno lwakwe lutamaani.

Kulumbaisha 20:7

Bamwi balicinkite manungo mushikoci sha maaki, abamwi mumaaki abo. Sombi swebo tulicinkite manungo muMwaami Lesa, Lesa wesu.

Kulumbaisha 16:3

Bantu bakwe Lesa bali pacishi ca panshi, ncakwiila balalemekwa, alimwi ndasangalala pali mbabo.

Kulumbaisha 10:4

Bamucita shibi tababikiiko amaano kuMwaami Lesa ceebo cakulisumpula. Mukuyeeya kwabo balabona Mwaami Lesa ayi taacite ncito kuli mbabo.

Jobo 28:28

“Mpeeke Lesa wakaambila muntu ayi, ‘Kuloonda Mwaami Lesa mbobusongo. Kufutatila bubi ndolushibo lwiine lwiine.’ ”

Esita 2:23

Ono makani aya ndyaakayandoolwa akucanwa ayi ngalushinisho, basankwa aba boonse bobilo bakacaikwa cakubaangilila kushisamu. Makani aya akalembwa mulibuku lya makani a bwaami kweelana abwakaamba mwaami paciindi ico.

2 Makani 6:7

Solomoni wakatolelela akwaamba ayi, “Bata baDefedi bakalinga babamba muyeeyo wakuyaka Ŋanda yakwe Lesa yakulambililaamo Mwaami Lesa, Lesa wa bene Isilaeli.

1 Baami 18:12

Ino na cicanike kwaamba ayi mushimu wa Mwaami Lesa wamutola kumusena utashibikitwe ndaswaawobo? Ono na ndwiite mwaami Aabu ayi muli kokuno, sombi abule kumucanaako, ncakwiila ulaakuncaya. Amwiibaluke kwaamba ayi nebo nemusebenshi wanu ndi muntu ulambila Mwaami Lesa abuumbi kuswabo kubwanike bwangu.

2 Samwelo 7:1

Ono mwaami Defedi wakakalikana muŋanda yakwe ya bwaami, Mwaami Lesa ndyaakamupa luumuno mukulengesha balwani bakwe boonse bakalinga kumushingulukite kubula luta.

Bene Ebulu 12:15

Amucenjele kwaamba ayi kutabi muntu nabi womwi weshi aswe kuluse lwakwe Lesa, nabi abe anga nimbuto shamilunda isho shicita na shakula, shabisha shimwi shoonse.

Bene Ebulu 3:13

Sombi cinene ncemweelete kucita nkuyumininshanya inshiku shoonse kwaamba ayi kutabi nabi womwi eshi abecekwe kwiinda mukubisha akuba shicimpamya, kulilabo liswi lya kwaamba ayi, “Sunu,” muMalembo akwe Lesa kalicitubikaako aswebo.

1 Bene Tesalonika 5:14

Twamusenga alimwi nobamakwesu, ayi mucenjeshe batolo. Amuyumyeyumye beshiboowa, mucafwe balefukite alimwi bantu boonse kamubakalikila myoyo.

Kulumbaisha 104:33

Ndaakunookwiimbila Mwaami Lesa kwabuumi bwangu boonse. Ndaakunookwiimbila Lesa wangu cakumulumbaisha kulila kaancili muumi.

1 Baami 18:3

Aboobo Aabu wakeeta Obadiya, uyo wakalinga munene kuŋanda ya bwaami. Ono Obadiya uyo wakalinga kulambila abuumbi Mwaami Lesa.

Matalikilo 22:12

Munjelo wakaamba ayi, “Utaciisi nabi kucita cili coonse kumwanike uyo. Ono ndeshiiba kwaamba ayi ulalemeka akunyumfwila Lesa ceebo tookwe kumamatisha mwanaako eenkabo kwaamba ayi utamubengi kuli nguwe.”

Kulonga 32:32

Ndakombelela amubalekelele. Sombi na mubule kubalekelela, mukushe liina lyangu mulibuku umo momwakalemba meena a bantu banu.”

Isaya 4:3

Bantu boonse beshi bakacaale muSiyoni, ee, muJelusalemu, balaakunokwiitwa ayi balisalalite.

Jelemiya 8:6

Ndakakutikisha, sombi mwebo tamukwe kwaambawo lushinisho. Taaku usanduka kuswa kububi bwakwe akwiipusha ayi, ‘Nciinshi ncendalubisha?’ Womwi awomwi ulatolelela munshila shakwe anga ndiaki litoocicila nkondo.

Jelemiya 31:18

“Ndushinisho ndakanyumfwa kulila kwa bene Efuleemu ayi, ‘Mwakatutambisha anga ngumucongoshi mucende aswebo twakabomba. Amutubooshe, aswebo tulilibambite kuboola kuli ndimwe ceebo ndimwe Baami baLesa, baLesa besu.

Danyelo 12:1

Mpeeke munjelo uyo wakalinga kufwete nsalu iteshimite wakaamba ayi, “Paciindi ico Mikaeli munjelo munene uyo ulama bene mishaanu ulaakunyamuka. Kulaakuba ciindi ca mapensho ico citana kubonekawo kale kuswa kumatalikilo amishobo kushikila asunu. Nakubi boobo paciindi ico, bene mishaanu boonse bacite meena alembetwe mulibuku lyakwe Lesa, balaakupulushikwa.

Neyemiya 1:11

Amukutike mupailo wangu nemusebenshi wanu pantu pomwi amipailo ya basebenshi banu bamwi boonse abo basangalala mukumulemeka. Amumpe coolwe nemusebenshi wanu kwaamba ayi mwaami uyo anyumfwile nkumbu.” Muciindi ico ndakalinga shikupa mwaami waini.

Kulumbaisha 56:9

Lyalo balwani bangu balaakupilukaamo kuboowa, bushiku ndaakupaila kuli ndimwe. Ncendabilite ncakwaamba ayi Lesa uli kulubasu lwangu.

Kulumbaisha 115:13

Ulaakupa coolwe bantu abo bamulemeka, balemekwa abatalemekwi boonse ulaakubapa coolwe.