Jelemiya 8:2 - Baibo Busansulushi Bwa Libuku Ili

² Alaakubikwabo patuba akanoobalilwabo lumwi, mweenshi anyenyeenshi shoonse sha mwiculu isho nshebakalinga kusuni, kusebensela, kwiipushako akulambila. Teshi bakaabunjikeewo nabi kwaafukila. Sombi alaakubabo anga ngamatombe apantantaala peculu lya nshi.

Jelemiya 8:2 교차 참조

2 Baami 23:5

Wakakusha ncito bapailishi boonse abo bamaami ba bene Juda mbobakenjisha ayi banoobenga milambu mumisena yakulambililaako ya patulundu mumandabala a muJuda alimwi ayeeyo yakalinga kushingulukite Jelusalemu. Nkokwaamba ayi bapailishi boonse abo bakalinga kubenga milambu kuli Baali, kulisuba, kumweenshi, alimwi akunyenyeenshi.

Milimo ya Batumwi 7:42

Sombi Lesa wakabafutatila akubaleka ayi banoolambila nyenyeenshi sha mwiculu, kweelana ambuli mbomulembetwe mulibuku lya balaluki bakulukulu ayi, ‘Mwebo nobene Isilaeli! Sa ndime mwakalinga kubengela milambu akupa shipo kwamyaaka makumi one muluyanga? Sobwe.

Jelemiya 9:22

Mwaami Lesa waamba ayi, “Baambile ayi, ‘Mituntu ya bantu ilaakunoolibo anga ngamatombe apantantaala muluundu. Ee, ilaakunoobonekabo anga ngamaila aceswabo kwakutaabunjika kwisule lya shikucesa.’ ”

Dutolonomi 4:19

Mutakeeleshi kulambila nabi kusebensela cimwi ncemubona mwiculu mbuli lisuba, mweenshi, alimwi anyenyeenshi. Shintu ishi Mwaami Lesa, Lesa wanu wakashilekela bantu boonse ba mishobo imwi.

Sefaniya 1:5

Ndaakunyonyoola baabo batanta pashiluli akulambila mimuni ya mwiculu. Ndaakunyonyoola abaabo balambila akushomesha kunyumfwila ndime neMwaami Lesa, sombi pesule balumbila muliina lyakwe Moleki lesa wakubeca.

Esekelo 8:16

Kuswawaawo wakantola mulubansa lwa mukati lwa Ŋanda ya Mwaami Lesa. Ono kumwinjililo wa Ŋanda iyi pakati ka mwinjililo ushitilishitwe acipaililo, pakalinga basankwa bakalinga mpashi 25. Bakalinga kufutatilite Ŋanda ya Mwaami Lesa kabalangite kwicwe. Bantu abo bakalinga kukoteme kabalambila lisuba lyakalinga kuswa.

Jelemiya 36:30

Paceebo ceeco, Mwaami Lesa utokwaamba kuli ndiwe Jeoiyakimu mwaami wa bene Juda ayi webo teshi ukabewo amuntu weshi akekale pacuuna ca bwaami bwakwe Defedi. Mutuntu wako ulaakusowekwa akunoobalilwa lumwi, acaandwa ciindi ca mashiku.

Jelemiya 22:19

Ulaakufukilwabo anga nimbongolo, nkokwaamba ayi ulaakukwelwa akusowelwa pansengwe lya minjililo ya Jelusalemu.”

Jelemiya 19:13

Lyalo maanda a muJelusalemu aayo a bamaami ba bene Juda alaakuba atasalalite bweenka mbuli musena uno wa Tofeti. Nkokwaamba ayi maanda oonse ayo acite shiluli shilya nshebakatentelelawo tununkila kabotu kunyenyeenshi akupa shipo sha shakunwa kubalesa bamwi.’ ”

Jelemiya 16:4

Balaakufwa kumalwashi ayoosha. Teshi bakalilweewo nabi kubikwa. Sombi mibili yabo ilaakubabo anga ngamatombe apantantaala peculu lya nshi. Balaakuloba kunkondo akunsala. Lyalo mituntu yabo ilaakuba cakulya ca bayuni abanyama bamuluundu.

Kulumbaisha 83:10

Bamaami abo mwakabalobya muEndoli, mituntu yabo yakabola pabulongo.

2 Baami 21:3

Wakayakulula misena yakulambililaako ya patulundu iyo yakanyonyoola Esekiya. Wakayaka ashipaililo shakulambililaawo Baali akubumba cikoshanyo cakwe Ashela lesa mwanakashi bweenka bwakalinga bwacita Aabu mwaami wa bene Isilaeli. Manase lakwe wakalinga kulambila anyenyeenshi.

Sefaniya 1:17

Mwaami Lesa waamba ayi, “Ndaakuleta mapensho kubantu balaakweenda anga mboofu mukwiinga bakabisha kuli ndime neMwaami Lesa. Bulowa bwabo bulaakutilwa anga ngamaanshi alimwi mituntu yabo ilaakubola mubulongo.”

Shikushimikila 6:3

Muntu ulakonsha kuba abaana bali mwaanda akwikala myaaka iinji. Sombi na wabula kusangalala mukuswitilila kwakwe nabi na wabula kulilwa kabotu, nebo ndaamba ayi kafunga nkabotu kwiinda nguwe.

2 Baami 21:5

Mumansa shobilo sha Ŋanda yakwe Lesa, wakayakaamo shipaililo shakulambililaamo nyenyeenshi.

2 Baami 17:16

Bakapwaya milawo yoonse ya Mwaami Lesa, Lesa wabo alimwi bakabumba bacende baana ba golodi ayi mbakulambila. Bakapanga acikoshanyo cakwe Ashela lesa mwanakashi, bakalinga kulambila nyenyeenshi akulambila Baali.

Dutolonomi 17:3

Nkokwaamba ayi wakalambila akusebensela balesa bamwi, lisuba, mweenshi nabi nyenyeenshi, ico citeendelani amulawo wa Mwaami Lesa.

Kulumbaisha 53:5

Ono bantu abo balaloonda abuumbi, banjilwa boowa mbobatana kubaabo kale. Lesa ulaakupalanganya shifuwa sha baabo boonse balwana bantu bakwe. Balaakulenshekwa nsoni mukubakoma ceebo Lesa wabakaka.

Jelemiya 14:16

Lyalo abantu abo mbobatoolalukilaako balaakuwaalwa mumikwakwa ya muJelusalemu ceebo ca nsala ankoondo. Teshi kukabeewo shikubabika nabi shikubika bamakaabo, bana babo basankwa nabi banakashi. Ndaakubapoomweta mapensho ayo abeelete.”

Jelemiya 16:11

Lyalo ukabakumbule ayi, ‘Nceebo ca bamashali banu bakulukulu bakansuula akukonkela balesa bamwi, bakabasebensela akubalambila. Bakamfutatila alimwi tabakwe kunyumfwila kwiisha kwangu.

Jelemiya 31:40

Kuswawaawo cinyika coonse uko kufukilwa bantu alimwi kusowelwa matombe amyuunda yoonse ili petala lya Kalonga ka Kidiloni kuya mukushika akuMwinjililo wa Liaki nkoubetele kwicwe, ulaakuba musena wangu usalalite. Ndabala inene iyi teshi ikapwayoolwewo tubili nabi kunyonyoolwa.”

Esekelo 6:5

Ndaakukungubika mituntu ya bene Isilaeli kunembo lya shibumbwabumbwa shabo akupalanganya mafuwa abo kushingulusha shipaililo shabo.

Esekelo 29:5

Ndaakukuwaala muluyanga akukushiya mumo pantu pomwi answi shoonse sha mumulonga wako. Ulaakufwita muluyanga mweenka umo, ulaakucaalabo cakutabikwa, sobwe. Ndaakukulengesha kuba cakulya ca banyama abayuni.

Kulumbaisha 83:11

Bantu babo balemekwa amubacite anga nguOlebu aSeeba. Amukome baleli babo mbuli mbomwakakoma Seba aSalumuna,

Jelemiya 9:20

Mpeeke ndabaambila ayi, “Mwebo nobanakashi, amunyumfwe maswi a Mwaami Lesa. Amunyumfwe maswi ngaatokwaamba. Amwiishe bana banu banakashi kulila cakooloma. Amwiishanye nyimbo shamalila.

Jelemiya 9:21

Lufu lwatunjilila pambwelyo akwinjila mumaandeesu acite malinga. Lwamana kucaya banike mumikwakwa abacikula bwangu mumisena icanikamo bantu baanji.”

Jelemiya 16:6

Babile abakandu boonse balaakufwitabo pantu pomwi mucishi ici. Teshi bakabikwewo nabi kulilwa, alimwi taakuuwo nabi womwi weshi akalinengoole nabi kulikulula mumutwi ceebo ca malilo.

Jelemiya 25:33

Ciindi ico abo boonse beshi bakacaikwe kuMwaami Lesa balaakunoolibo luundu loonse. Nkokwaamba ayi kuswa kweela cishi kuya mukushika ankoceela. Teshi bakabunjikweewo nabi kufukilwa. Sombi balaakubabo anga ngamatombe apantantaala peculu lya nshi.

Esekelo 39:5

Mulaakufwita muluundu. Nebo neMwaami Lesa Shinkusu shoonse ndaamba.